Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lapachaka la Ŵakaboni ŵa Yehova 2016

Pakuchita maungano ghakuru ŵakapusikizgiranga kuchita maukwati

 INDONESIA

Ŵakaleka Yayi Kuwungana Pamoza

Ŵakaleka Yayi Kuwungana Pamoza

Mu nyengo iyo ntchito yithu yikakanizgika, mipingo yinandi yikalutilira kuwungana mu nyumba zawo. Kweni mipingo yinandi yikayimbanga yayi sumu pa maungano chifukwa chakopa kuti ŵanthu ŵangamanya. Munyumba zinyake izo ŵabali ŵakawungananga, ŵalara ŵa boma ŵakizanga mwamabuchi, kweni kanandi ŵabali ŵakachitanga maungano ghawo mwamtende.

Kuti ŵachite maungano ghakuru, ŵabali ŵakasangirangapo mwaŵi pa vinthu nga ni vikondwelero na maukwati. Tagor Hutasoit wakati: “Ŵakutorana ŵakalembeskanga nthengwa na kupoka chikalata ku boma cha kuŵazomerezga kuti ŵachite chikondwelero chikuru cha ukwati wawo. Pa nyengo ya ukwati, awo ŵakupelekezga ŵeneko ŵa nthengwa ŵakakhalanga kunthazi kwa pulatifomu ndipo ŵabali ŵakayowoyanga nkhani za Baibolo zakupambanapambana.”

Pa ungano unyake, mpolisi wakakumana na Tagor kumphepete.

Mpolisi uyu wakamufumba kuti: “Maukwati ghanandi ghakutora waka maora ghaŵiri panji ghatatu. Chifukwa wuli maukwati ghinu ghakwamba mulenji m’paka namise?”

Tabor wakazgora kuti: “Ŵakutorana ŵanyake ŵakuŵa na masuzgo ghanadi ndipo ŵakukhumbikwira kuŵawovwira na Malemba ghanandi.”

 Mpolisi wakazomerezga na mutu, wakati: “Ichi ntchakupulikikwa.”

Kuti ŵachite Ungano wa Chigaŵa wa mu 1983 wa mutu wakuti, Kingdom Unity (Kukolerana Chifukwa cha Ufumu) ŵabali ŵakapusikizgira kuti ŵali na maukwati ghanandi, ndipo ŵakachitira ungano uwu mu sitediyamu ya ku Jakarta. Ŵanthu ŵakukwana 4,000 ŵakiza pa ungano uwu  ndipo 125 ŵakabatizika pambere ungano undambe. Ŵakabatizikira ku malo ghambura kuwonekera. Boma likati laleka kusuzga chomene, ŵabali ŵakamba kuchita maungano ghakuru chomene. Umoza mwa maungano agha pakiza ŵanthu ŵakujumpha 15,000.

Kuzenga Ofesi ya Munthavi Panyengo Iyo Ntchito Yithu Yikakanizgika

Mu vyaka vya m’ma 1980 na 1990, ofesi ya munthavi yikapempha boma mwakuwerezgawerezga kuti lizomerezge ntchito ya Ŵakaboni ŵa Yehova. Ŵabali mu vyaru vinyake nawo ŵakalembera makalata boma la Indonesia ndiposo ŵimiliri ŵa boma ili, kuŵafumba chifukwa icho ŵali kukanizgira ntchito ya Ŵakaboni ŵa Yehova. Ŵalara ŵa boma ŵanandi ŵakakhumbanga kuzomerezga ntchito yithu, kweni wupu wakuwona vya visopa mu charu ichi ndiwo ukalimbikiranga kuti ntchito yithu yilutilire kukanizgika.

Mu 1990, ŵabali ŵakawona kuti vingachitika kuzenga ofesi yiphya ya munthavi ku malo ghambura kuwonekera ku ŵanthu. Mu chaka chenechichi, Wupu Wakulongozga ukazomelezga kugura malo pafupi na Bogor, tawuni yichoko iyo yikaŵa pa mtunda wa makilomita 40, kumwera kwa Jakarta. Kweni ŵabali ŵachoko chomene mu charu ichi ndiwo ŵakamanyanga vyakuzenga. Ipo kasi ofesi iyi yikate yizengekenge wuli?

Wovwiri ukafuma ku ŵabali pa charu chose. Ofesi yakulaŵilira vyakuzenga ku Brooklyn na ku Australia, yikatumizga pulani ya ofesi yiphya ya munthavi. Ŵabali 100 ŵakufuma mu vyaru vyakupambanapambana ŵakalongozga pa ntchito ya kuzenga ofesi iyi, iyo yikatora vyaka viŵiri.

Hosea Mansur, mubali wa ku Indonesia uyo wakadumbiskananga na ŵalara ŵa boma pakwendeska ntchito iyi, wakati: ‘Para ŵalara ŵa boma awo Mbasilamu ŵawona H.M., pa chisoti icho nkhavwaranga, ŵakaghanaghananga kuti H wakwimira ‘Hājjī,’ uyo ni munthu wakuchindikika chomene ku  Ŵasilamu. Ndipo wakuŵa yumoza wa awo ŵakunozga maulendo ghakukasopa ku Mecca. Ntheura ŵakanichindikanga chomene. Ivi vikawovwira kuti tigwire makora ntchito yithu.

Ofesi ya munthavi iyi yikazengeka mu nyengo ya bani

Ofesi yiphya ya munthavi ŵakayipeleka kwa Yehova pa Julayi 19, 1996. John Barr, wa mu Wupu Wakulongozga ndiyo wakayowoya nkhani ya kupatulira ofesi iyi. Pakaŵa ŵanthu ŵakukwana 285. Awo ŵakapulikizga nkhani iyi, ŵakaŵa ŵapayiniya ŵapadera, ŵabali ŵakufuma mu vyaru vinandi awo kumanyuma ŵakaŵa ŵamishonare, ndiposo ŵabali awo ŵakateŵeteranga pa Beteli ya ku Indonesia. Pakati pajumpha mazuŵa ghaŵiri, ŵanthu ŵakukwana 8,793 ŵakaŵa pa Ungano wa Chigaŵa wa mutu wakuti, “Mathenga gha Mtende wa Chiuta” ku Jakarta.

 Yehova Wakawombora Ŵanthu Ŵake

Mu 1998, pulezidenti wa ku Indonesia, Soeharto (Suharto) wakathura pasi udindo wake, ndipo boma liphya likanjira m’malo. Ntheura ŵabali ŵakalimbikira chomene kupempha boma liphya kuti liŵape wanangwa wa kusopa.

Djohan Effendi, uyo wakaŵa mulembi wa boma la Indonesia wakati waluta ku New York mu 2001, wakayendera Beteli ya Brooklyn ndipo wakakumana na ŵabali ŵatatu ŵa mu Wupu Wakulongozga. Wakakondwa chomene na ivyo wakawona ndipo wakazomerezga kuti Ŵakaboni ŵa Yehova ŵali na mbiri yiwemi pa charu chose. Effendi wakawona kuti ntchiwemi nadi kuti ntchito yithu yiŵe yakuzomerezgeka ku Indonesia. Kweni wakati mazgu ghaumaliro ghakwenera kufuma kwa loya mulara wa boma la Indonesia, Marzuki Darusman.

Loya uyu nayo wakakolerana na fundo ya mulembi wa boma, kweni ŵalara ŵanyake mu boma awo ŵakatinkhanga Ŵakaboni ŵakazerezgeranga dara nkhani iyi. Ŵakaghanaghananga kuti loya uyu wawukengepo kale ndipo panjirenge munyake. Pa Juni 1, 2001, Tagor Hutasoit wakachemeka ku ofesi ya loya mulara wa boma. Tagor wakati: “Vyaka 25 kumanyuma, ni mu ofesi yeneyiyi umo ŵakanipira chikalata chakukanizga ntchito ya Ŵakaboni ŵa Yehova. Kweni pa zuŵa ili, ilo likaŵa laumaliro kwa loya uyu kugwira ntchito mu ofesi iyi, wakanipa chikalata chakuzomerezga ntchito yithu.”

Pa Malichi 22, 2002, Wupu Wakuwona vya Visopa ku Indonesia, ukalemba Ŵakaboni ŵa Yehova kuti ni chisopa chakuzomerezgeka. Mulara wa dipatimenti iyi wakaphalira ŵabali awo ŵakatumika na munthavi kuti: “Nangauli chikalata ichi chikuti chisopa chinu ntchakuzomerezgeka, kweni ndise yayi tamupani wanangwa wa kusopa. Wanangwa uwu ukufuma kwa Chiuta. Chikalata ichi, chikuyowoya kuti chisopa chinu chazomerezgeka na boma. Sono namwe muli na wanangwa uwo visopa vyose vili nawo, ndipo boma limovwiraninge.”