Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lapachaka la Ŵakaboni ŵa Yehova 2016

 INDONESIA

Kupharazga Zina la Yehova Mwakukondwa

Kupharazga Zina la Yehova Mwakukondwa

Mu vyaka vinandi ivyo ntchito yithu yikaŵa yakukanizgika ku Indonesia, ŵabali ŵakachitanga vinthu mwamahara. Ŵakalondezga ulongozgi wa Yesu, wakuti: “Muŵe ŵakuchenjera nga ni njoka, kweni ŵakuzika nga ni nkhunda.” (Mat. 10:16) Kweni bani yikati yamara, ŵabali ŵanandi ŵakeneranga kusambizgika kuti ŵapharazgenge “mwachikanga.”—Mil. 4:31.

Mwachiyelezgero, ŵabali ŵanyake ŵakapharazganga yayi nyumba na nyumba kweni ŵakalutanga waka ku ŵanthu awo ŵakaŵapharazgirapo kale ndiposo ku masambiro gha Baibolo. Ŵanyake ŵakawopanga kupharazgira Ŵasilamu. Ŵabali ŵanandi pakujilongosora ŵakatenge waka Mbakhristu m’malo mwa kuyowoya kuti Mbakaboni ŵa Yehova. Kweniso ŵakagwiliskiranga ntchito Mabaibolo ghakung’anamulika na visopa vyautesi m’malo mwa kugwiliskira ntchito Baibolo la Chiindonesiya la Mang’anamuliro gha Charu Chiphya. * Ŵanyake ŵakachitanga soni kugaŵira mabuku ghithu.

Ŵakachitanga tunthu tunyake uto ŵakazgoŵera kuchita mu nyengo ya bani. Kweniso ŵakachitanga vinthu vinyake chifukwa chakuti waka ndimo ŵanthu mu chikaya chawo ŵakuchitira. Ku Indonesia, ŵanthu ŵakutemwa kukhala waka chete para vinthu vyabudika. Ŵakutemwa yayi vya kususka munthu para wabuda kweniso ŵakuchita soni kumuphalira unenesko. Kasi ŵabali ŵakawovwirika wuli kuti ŵasinthe?

Yehova wakagwiliskira ntchito ŵabali ŵakukhwima mwauzimu kuti ŵawovwire ŵabali. (Efe. 4:11, 12) Mwachiyelezgero, mu 2010, ku Indonesia kukiza mubali Stephen Lett wa mu Wupu Wakulongozga. Iyo wakawovwira ŵabali na kuŵachiska kuti ŵathuwuskenge zina la Chiuta mwakugwiliskira ntchito Baibolo la Mang’anamuliro gha Charu Chiphya mu uteŵeti. Misja Beerens wakati,  “Nkhani ya mubali Lett yikaŵachontha chomene ŵabali ŵanandi. Ŵakawona kuti ŵanthu wose ŵakwenera kumanya kuti iwo Mbakaboni ŵa Yehova kweniso ŵakwenera kuvikilira Mazgu gha Chiuta.”

Pakuti Ŵasilamu ŵa ku Indonesia ŵakuwona kuti Ŵakaboni ŵa Yehova ŵakuyana waka na visopa vyose Vyachikhristu, mu Uteŵeti Withu wa Ufumu wa ku Indonesia mukaŵa ulongozgi wakuti: “Ntchiwemi chomene kuti para mwayamba waka kudumbiskana na munthu mumuphalirenge kuti ndimwe Ŵakaboni ŵa Yehova. . . . Tikwimira Yehova, ndipo tikukhumba kuti ŵanthu mu chigaŵa chinthu ŵamanye zina lake na ivyo wachitenge munthazi.” Shinsuke Kawamoto, uyo wakuteŵetera pa ofesi ya munthavi ku Indonesia, wakati: “Vinthu vikwenda makora chomene chifukwa cha kulondezga ulongozgi uwu. Ŵasilamu ŵanandi mbakunweka kupulikizga ku Ŵakaboni ŵa Yehova. Ŵakukhumba kumanya kuti tikupambana wuli na matchalitchi ghanyake. Chifukwa chakuti mbakunweka chikuŵa chipusu kuŵapharazgira makani ghawemi.”

Ŵapharazgi ŵakachiskikaso kuti ŵagaŵirenge chomene magazini gha Gongwe la Mulinda na Wukani! Lothar Mihank, uyo ni mulaŵiliri wa milimo ya Komiti ya Munthavi, wakati: “Kuti ŵanthu ŵatimanye makora, ŵakwenera kuŵerenga magazini ghithu. Magazini ghakovwira kuti ŵanthu ŵaŵe na mtima uwemi. Para ŵaŵerenga, chikuŵa chipusu kuzomera unenesko. Para tikugaŵira magazini ghanandi, tikovwira ŵanthu ŵanandi kuti ŵamanye Yehova.”

Kupharazga ku Malo Uko Kukusangika Ŵanthu Ŵanandi Kukawovwira Chomene

Mu 2013, Wupu Wakulongozga ukazomerezga ofesi ya munthavi ku Indonesia kwambiska nthowa ziŵiri ziphya zakupharazgira. Kupharazga na shelufu ya matayala mu matawuni ghakurughakuru kweniso kuti mpingo upharazgenge ku malo uko kukusangika ŵanthu ŵanandi. Nthowa ziphya zakupharazgira izi zikovwira ŵanthu ŵanandi ku Indonesia kuti ŵapulike makani ghawemi.

Malo ghakwamba kuyalako mabuku pa shelufu ya matayala kukaŵa ku malo ghakuguliskirako vinthu ku West Jakarta. Kufuma apo, mipingo yikamba kupharazga ku malo uko kukusangika  ŵanthu ŵanandi mu vigaŵa vyawo. Ŵabali ŵakayalanga mabuku pa mashelufu na mathebulu. Mu chaka chimoza pera, mathebulu na mashelufu ghakujumpha 400 ghakaŵikikanga ku malo agho kukusangika ŵanthu ŵanandi mu matawuni ghose gha ku Indonesia. Kasi ntchivichi chachitika chifukwa cha kuchita nthena?

Yusak Uniplaita, uyo ni mubali mulara ku Jakarta wakati: “Pambere tindayambe kupharazga ku malo uko kukusangika ŵanthu ŵanandi, mpingo withu ukachemeskanga magazini 1,200 mwezi uliwose. Pakati pajumpha myezi 6, tikamba kuchemeska magazini 6,000 mwezi uliwose. Pasono tikuchemeska magazini 8,000 mwezi uliwose. Tikugaŵiraso mabuku na maburosha ghanandi chomene.” Ku Medan, North Sumatra, gulu la ŵapayiniya likaŵika mashelufu gha matayala mu malo ghatatu. Mu mwezi wakwamba, ŵakagaŵira mabuku 115 na magazini pafupifupi 1,800. Pakati pajumpha myezi yiŵiri, ŵapayiniya 60 mu vigaŵa vyakupambanapambana, ŵakagaŵira mabuku ghakujumpha 1,200 na magazini 12,400. Jesse Clark, uyo ni mishonale, wakati: “Ŵabali ŵakukondwa chomene na nthowa ziphya izi zakupharazgira, ndipo vikulongora kuti ŵanthu ŵanandi ŵasambirenge unenesko mu Indonesia. Tizamulekapo yayi kupharazga ku malo agho kukusangika ŵanthu ŵanandi.”

Chiyowoyero Icho Chikufika pa Mtima

Charu cha Indonesia ntchimoza mwa vyaru ivyo vili na viyowoyero vinandi chomene pa charu chose chapasi. * Nangauli ŵanthu ŵanandi chomene ŵakuyowoya Chiindonesiya, kweni ŵanandi ŵakuyowoyaso viyowoyero vyawo vyakonkhera, viyowoyero ivyo vikuŵafika pa mtima.

Awo ŵakung’anamura mabuku kuya mu chiyowoyero cha Batak-Toba ku North Sumatra

Mu 2012, ofesi ya munthavi yikakhumba kuwona usange ntchakukhumbikwa nadi kung’anamura mabuku mu viyowoyero vyakupambanapambana. Tom Van Leemputten wakati: “ Tikamba kung’anamura mabuku kuya mu viyowoyero 12 ivyo vikuyowoyeka na ŵanthu 120 miliyoni. Awo ŵakang’anamuranga mabuku kuya mu Chijavani ŵakati ŵakawona thirakiti lakwamba la  chiyowoyero chawo, ŵakathiska masozi. Ŵakakondwa chomene kuŵa na chakurya chauzimu mu chiyowoyero chawo.”

Kweni mipingo yinandi yikalutilira kuchita maungano ghawo mu Chiindonesiya nanga ni mu vigaŵa ivyo ŵanthu ŵanandi ŵakayowoyanga viyowoyero vinyake. Lothar Mihank wakati: “Mu 2013, ine na muwoli wane Carmen tikaluta ku ungano wadera wa mazuŵa ghaŵiri ku Chirwa cha Nias ku North Sumatra. Pa ungano uwu pakaŵa ŵanthu 400 ndipo ŵanandi ŵa iwo ŵakayowoyanga Chiniasi, kweni nkhani zose zikayowoyekanga mu Chiindonesiya. Tati tadumbiskana na ŵabali awo ŵakayowoyanga nkhani, tikapharazga pa ungano uwu kuti zuŵa lakulondezgapo nkhani zizamuyowoyeka mu Chiniasi. Zuŵa lakulondezgapo, ŵanthu ŵakujumpha 600 ŵakiza pa ungano.” Carmen wakatiso: “Apo ŵabali ŵakamba kuyowoya nkhani mu Chiniasi, ŵabali na ŵadumbu ŵakapulikizganga chomene kuluska apo zikayowoyekanga mu Chiindonesiya. Ŵakaŵa ŵakukondwa chomene kupulikizga maungano mu chiyowoyero chawo chifukwa ŵakapulikanga makora uthenga wa mu Baibolo.”

Munthu uyo wali na suzgo la makutu wakovwirika mwauzimu

 Nanga mbanthu awo ŵali na suzgo la makutu sono ŵakupulika mu chiyowoyero chawo. Kufuma mu 2010, dipatimenti yakung’anamura Chiyowoyero cha Mawoko cha ku Indonesia yafumiska maburosha 7 na mathirakiti 8 gha Chiyowoyero cha Mawoko cha ku Indonesia. Kweniso ofesi ya munthavi yambiska makilasi 24 ghakusambizga chiyowoyero cha mawoko, ndipo makilasi agha ghawovwira ŵanthu ŵakujumpha 750 kuti ŵamanye chiyowoyero ichi. Mazuŵa ghano, kuli mipingo na magulu 23 gha chiyowoyero cha mawoko. Mipingo iyi yikovwira mwauzimu ŵanthu ŵakujumpha 3 miliyoni awo ŵali na suzgo la kupulika ku Indonesia.

Pasono Dipatimenti Yakung’anamura mabuku yili na magulu 37 ghakung’anamura viyowoyero vyakupambanapambana. Kuli ŵabali na ŵadumbu 117 awo ŵakuchita ntchito yakung’anamura, kweniso ŵabali na ŵadumbu 50 awo ŵakugwira ntchito zinyake zakovwira awo ŵakung’anamura. Ndipo awo ŵakung’anamura ŵali mu malo ghakukwana 19.

^ ndime 2 Baibolo lose la Mang’anamuliro gha Charu Chiphya la Chiindonesiya likafumiskika mu 1999. Awo ŵakang’anamuranga, ŵakachita ntchito iyi mu nyengo ya bani ndipo likatora vyaka 7 kuti limare kung’anamulika. Vyaka vikati vyajumphapo, ŵakafumiskaso mabuku ghaŵiri gha Insight on the Scriptures ndiposo Watchtower Library pa CD-ROM mu Chiindonesiya. Ichi chikulongora kuti awo ŵakang’anamuranga ŵakajipeleka chomene.

^ ndime 2 Ku Indonesia kuli viyowoyero 707, ndipo charu cha Papua New Guinea icho chili pafupi na charu ichi, kuli viyowoyero 838.