Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lapachaka la Ŵakaboni ŵa Yehova 2016

Kupharazga pa msika ku Jakarta

 INDONESIA

Ntchito Yithu Yikaluta Panthazi

Ntchito Yithu Yikaluta Panthazi

Ŵaliska ŵa matchalitchi ŵati ŵapulika kuti Ŵakaboni ŵa Yehova ŵapikaso wanangwa wa kusopa, ŵakakwiya chomene. Ŵalara ŵa ma matchalitchi ŵakujumpha 700 na ŵalongozgi ŵakufuma mu matchalitchi 7 gha Chipurotesitanti, ŵakachita ungano ku Jakarta kuti ŵaphalire boma kuti likanizgeso ntchito ya Ŵakaboni ŵa Yehova. Kweni boma likasintha yayi.

Nkhani yati yapulikikwa kuti bani yamara mu charu cha Indonesia, ŵanthu ŵanandi ŵakunweka ŵakalembera makalata ku ofesi ya munthavi kupempha mabuku panji sambiro la Baibolo. Mu 2003, ŵanthu ŵakujumpha 42,000 ŵakasangikapo pa Chikumbusko. Chiŵelengero cha ŵapharazgi wose mu charu ichi chikanjirangamo kaŵiri mu chiŵelengero ichi. Ŵanthu pafupifupi 10,000 pamoza na mulara wa Dipatimenti Yakuwona vya Chisopa, ŵakiza pa ungano wadera ku Jakarta. Mulara uyu wakazizwa chomene kuwona ŵalara na ŵana wuwo ŵakujura Malemba mu Mabaibolo ghawo. Wakasimikizgira ŵabali kuti wamuŵalongosolera makora ŵanthu kuti ŵakasinthe maghanoghano ghakubudika agho ŵali nagho kulazga ku Ŵakaboni ŵa Yehova.

Bani yati yamara, ŵamishonale ŵakalutaso ku Indonesia. Ŵamishonale ŵakwamba kuwelera ku Indonesia ni: Josef na Herawati Neuhardt * (kufuma ku Solomon Islands), Esa na Wilhelmina Tarhonen (kufuma ku Taiwan), Rainer na Felomena Teichmann (kufuma ku Taiwan), kweniso Bill na Nena Perrie (kufuma ku Japan). Pamanyuma kukiza ŵamishonale ŵaphya awo ŵakafuma waka ku sukulu ya Giliyadi na kutumika ku North Sumatra, Kalimantan, North Sulawesi, na ku madera ghanyake ghakutali mu charu ichi.

“Nkhakondwa chomene kovwira ŵana ŵa sukulu kuti ŵasambizgenge mwaluso na kuyowoya makora nkhani.”—Julianus Benig

 Mu 2005, ofesi ya munthavi yikachitiska masukulu ghaŵiri gha uteŵeti. Julianus Benig uyo wakaŵa yumoza wa ŵasambizgi ŵa Sukulu Yakusambizga Uteŵeti (iyo sono yikuchemeka Sukulu ya Ŵapharazgi ŵa Ufumu), wakati: “Nkhakondwa chomene kovwira ŵana ŵa sukulu kuti ŵasambizgenge mwaluso na kuyowoya makora nkhani kuti ŵaŵe ŵakovwira chomene mu gulu.” Ŵanandi awo ŵakanjira sukulu iyi, ŵakuteŵetera nga ŵapayiniya ŵapadera panji ŵalaŵiliri ŵa dera. Ŵabali ŵanandi awo ŵakanjira kilasi lakwamba la Sukulu Yakusambizga Ŵalaŵiliri Ŵakwendakwenda (iyo sono yikuchemeka Sukulu ya Ŵalaŵiliri ŵa Dera na Ŵawoli Ŵawo), ŵakasambizgika mu nyengo ya bani. Sukulu yiphya iyi, yikaŵawovwira kuti ŵachite makora ntchito yawo pamanyuma pakuti bani yamara. Ponco Pracoyo uyo wakanjira kilasi lakwamba, wakati: “Sukulu iyi yikanovwira kuti niŵenge walusungu kweniso kuti niŵikengepo mtima pa uteŵeti wane nga mulaŵiliri wa dera. Yikaŵa yiwemi chomene kweniso yakukhozga.”

 Ŵakachitapo Kanthu Mwaluŵiro

Mu vyaka 25 ivyo ntchito yithu yikaŵa yakukanizgika, mipingo yinandi ku Indonesia yikawungananga mu nyumba. Mipingo yichoko waka ndiyo yikate yikwaniskenge kuzenga Nyumba ya Ufumu. Kweniso chikaŵa chakusuzga kupoka chikalata chakuzomerezga kuzenga malo ghaphya ghakusoperapo. Chifukwa chakuti mipingo yikakuranga luŵiro chomene, ofesi ya munthavi yikanozga kuti paŵe dipatimenti Yakuzenga Nyumba za Ufumu (iyo sono yikuchemeka Dipatimenti Yakulemba Mapulani na Kuzenga) kuti yiwovwirepo mwaluŵiro.

Chirwa cha Nias ku North Sumatra, ndicho chikaŵa chakwamba kuŵa na Nyumba ya Ufumu yiphya. Haogo’aro Gea, uyo wakawungananga mu mpingo wa Gunungsitoli kwa nyengo yitali, wakati: “Tati tapulika kuti tiŵenge na Nyumba ya Ufumu yiphya, tikakondwa chomene. Ofesi ya munthavi yikatumizga ŵabali 7 kuti ŵazakalongozge ntchito ya kuzenga. Nyumba ya Ufumu yikamara kuzengeka mu 2001.” Faonasökhi Laoli uyo wakaŵa mu komiti ya kuzenga, wakati: “Kale tikawungananga mu nyumba zithu, ndipo ŵanthu mu chigaŵa chithu ŵakawonanga kuti Ŵakaboni ŵa Yehova mbanthu ŵapasi chomene. Kweni tikati tamara waka kuzenga Nyumba ya Ufumu, chiŵelengero cha ŵanthu ŵakwiza ku maungano chikakwera chomene kufuma pa 20 kufika pa 40. Mu myezi 12 pera, chiŵelengero chikakwera chomene (na 500 peresenti). Nyumba ya Ufumu yithu ndiyo njakutowa chomene kuluska tchalitchi lililose mu chigaŵa chithu ndipo ŵanthu sono ŵakuchindika chomene Ŵakaboni ŵa Yehova.”

Nyumba ya Ufumu ku Bandung

Mu 2006, ku Bandung, West Java, ŵabali ŵakamba kupenja malo ghakuti ŵazengepo Nyumba ya Ufumu yakwamba mu tawuni iyi. Singap Panjaitan uyo ni mubali mulara kweniso wakateŵeteranga mu komiti yakuzenga, wakati: “Pakatora myezi 12 kuti tisange malo ghawemi. Kweniso pambere ŵalara ŵa boma ŵandazomerezge kuti tizenge Nyumba ya Ufumu, pakakhumbikwiranga ŵanthu 60 awo Mbakaboni yayi kuti  ŵazomerezge. Ŵanthu 76 pamoza na mwanakazi munyake uyo kumanyuma wakasuskanga Ŵakaboni, ŵakazomerezga kuti tizenge. Yati yamara kuzengeka, tikachema ŵazengezgani na meya wa mu Bandung kuti ŵazakaŵepo pa kujulira Nyumba ya Ufumu yiphya. Meya wakati: ‘Agha ni malo ghawemi chomene kweniso ghakutowa, ndipo matchalitchi ghose mphanyi ghakuzenga nthena.’” Nyumba ya Ufumu iyi, yikaŵa yakudikanya ndipo yikapelekeka kwa Yehova, mu 2010.

Kwambira waka mu 2001, Nyumba za Ufumu zakujumpha 100 zazengeka ku Indonesia, ndipo zinyake zichali kukhumbikwa.

^ ndime 3 Nkhani yakulongosora umoyo wa Herawati Neuhardt, yili mu Galamukani! ya Febuluwale 2011.