Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Buku Lapachaka la Ŵakaboni ŵa Yehova 2016

Mpingo wa Surabaya mu 1954

 INDONESIA

Kukiza Ŵamishonale

Kukiza Ŵamishonale

Mu Julayi 1951, mpingo uchoko wa ku Jakarta ukawungana kuti upokelere Peter Vanderhaegen uyo wakaŵa mishonale wakwamba kufika ku Indonesia. Pakufika kuumaliro wa chaka ichi, ŵamishonale ŵanyake 13 ŵakufuma ku Australia , Germany, na Netherlands ŵakaŵa kuti ŵiza. Ŵamishonale aŵa ŵakajumpha chiŵelengero cha ŵapharazgi wose mu charu ichi.

Fredrika Renskers, uyo wakaŵa mishonale wakuyowoya Chidachi, wakati: “Nkhaghanaghaniranga umo namupharazgira na majesicha (mawoko) ku nyumba na nyumba. Kweni pakwamba nkhapharazganga mu chiyowoyero cha Chidachi chifukwa ŵanthu ŵanandi ŵakayowoyanga chiyowoyero ichi.” Ronald Jacka uyo wakafuma ku Australia wakati: “Taŵanyake pakupharazga tikagwiliskiranga ntchito makadi agho tikalembangapo upharazgi ufupi mu chiyowoyero cha Chiindonesiya. Pambere nindagogode pa nyumba ya munthu, nkhawonanga dankha pa kadi na kusunga pa mtima mazgu.”

Pakuti ŵamishonale aŵa ŵakalongozganga makora, mu chaka chimoza pera chiŵelengero cha ŵapharazgi chikakwera luŵiro chomene kufuma pa 34 kufika pa 91. Pa Seputembala 1, 1951, ofesi ya Watch Tower Society yikajulika ku nyumba ya André Elias ku Central Jakarta. Ronald Jacka ndiyo wakalaŵiliranga ofesi iyi (wakaŵa muteŵeti wa munthavi).

Mwaŵi Unyake Ukajulika

Mu Novembala 1951, Peter Vanderhaegen wakatumika ku North Sulawesi uko Theo Ratu na muwoli wake ŵakambiska kagulu. Ŵanthu ŵanandi ku chigaŵa ichi ŵakajichemanga kuti Mbakhristu ndipo ŵakachindikanga chomene Mazgu gha Chiuta. Ŵanthu ŵanandi ŵakachemeranga Ŵakaboni mu nyumba zawo na kuŵapempha kuti ŵaŵalongosolere visambizgo vya mu Baibolo. Kanandi Ŵakaboni ŵakayambanga  kudumbiskana na ŵanthu 10. Para pajumpha maminiti 15, pakaŵanga ŵanthu 50. Para ora likukwana, pakaŵanga ŵanthu 200 ndipo ŵakafumanga mu nyumba na kuluta pa luŵaza kuti ŵalutilire kudumbiskana.

Kukwambilira kwa 1952, Albert na Jean Maltby, ŵakajura nyumba ya ŵamishonale ku Surabaya, East Java, mu tawuni ya ku Indonesia. Kukizaso ŵadumbu ŵanyake 6 ŵamishonale. Mazina ghawo ghakaŵa: Gertrud Ott, Fredrika Renskers, Susie Stoove, Marian Stoove, Eveline Platte, na Mimi Harp. Fredrika Renskers wakati: “Ŵanthu ŵanandi ku malo uku ŵakaŵa Ŵasilamu kweni ŵakaŵanga ŵaubwezi. Ŵakaŵa nga kuti ŵakalindizganga waka unenesko. Ntheura chikaŵa chipusu kwamba  kusambira nawo Baibolo. Mu vyaka vitatu pera, ku Surabaya kukaŵa mpingo wa ŵapharazgi 75.”

Nyumba ya ŵamishonale ku Jakarta

Panyengo yira, Musilamu munyake zina lake Azis wa ku Padang, West Sumatra, wakalembera kalata ofesi ya munthavi kupempha sambiro. Azis wakasambirapo na ŵapayiniya ŵa ku Australia mu chaka cha 1930 kweni wakamanyanga yayi uko ŵamishonale aŵa ŵakaŵa panyengo iyo charu cha Japan chikapoka malo agha. Zuŵa linyake wakasanga kabuku kakulembeka na Ŵakaboni ŵa Yehova. Iyo wakalemba kuti: “Nkhati nawona adiresi ya ofesi ya ku Jakarta mu kabuku aka, nkhaŵaso na njara yauzimu.” Mwaluŵiro ofesi yikatuma mulaŵiliri wa dera Frans van Vliet ku Padang kuti wakakumane na Azis. Mulaŵiliri wa dera wakasanga kuti Azis wali kupharazgirapo Nazar Ris uyo wakakhalanga nayo pafupi ndipo wakagwiranga ntchito mu boma. Nazar Ris wakaŵa na njara yauzimu. Wose ŵaŵiri ŵakazomera unenesko pamoza na mabanja ghawo. Nyengo yikati yajumphapo, Azis wakaŵa mulara wakugomezgeka. Nazar Ris, wakaŵaso mupayiniya wapadera, ndipo ŵana ŵake ŵanandi Mbakaboni ŵakulimbikira uteŵeti.

Frans van Vliet na mudumbu wake Nel

Frans van Vliet wakati wafika waka ku Padang, wakaluta kukakumana na mubali wakulopwa yura ndipo wakamusanga wakuzenga nyumba yakupangiramo mafuta ku Balikpapan, East Kalimantan. Frans wakamba kuluta na mbali uyu mu uteŵeti wa m’munda na kumovwira kuti wasambirenge Baibolo na ŵanthu ŵanandi. Pambere Frans wandawelere ku Netherlands, wakaŵa kuti wambiska kagulu ku Balikpapan.

Nyengo yikati yajumphapo, mudumbu munyake uyo wakaŵa kuti wabatizika waka, zina lake Titi Koetin wakasamukira ku Banjarmasin, South Kalimantan. Titi wakapharazgira ŵabali ŵake mu muzi wa Dayak ndipo wakawovwira ŵanandi kumanya unenesko. Ŵanthu ŵanandi awo wakaŵawovwira ŵakawelera mu mizi yawo mukati mwa Kalimantan ndipo ŵakambiska tumagulu uto tukakura na kuzgoka mipingo yikuru.

Mabuku gha mu Chiindonesiya

Ntchito yakupharazga yati yaluta panthazi chomene, ŵabali  ŵakakhumbanga mabuku ghanandi gha mu Chiindonesiya. Mu 1951, buku lakuti Mulungu Akhale Woona likang’anamurika mu Chiindonesiya. Kweni ŵaboma ŵakasintha kalembero ka masipeling’i ya Chiindonesiya. Ntheura ofesi ya munthavi yikanozgaso vyakuti kabuku aka kaŵe na masipeling’i ghaphya. * Buku ili likati lafumiskika, ŵanthu awo ŵakayowoyanga Chiindonesiya ŵakalitemwa chomene.

Mu 1953, ofesi ya munthavi yikasindikizga magazini gha Gongwe la Mulinda ghakukwana 250 mu Chiindonesiya. Aka kakaŵa kakwamba mu vyaka 12 kuti magazini gha chiyowoyero ichi ghasindikizgike. Magazini iyi yikaŵa na mapeji 12 ndipo pakwamba mukaŵa nkhani zakusambira pera. Pati pajumpha vyaka vitatu, magazini iyi yikaŵa na mapeji 16 ndipo kampani yinyake ndiyo yikasindikizganga. Mwezi uliwose yikasindikizganga magazini 10,000.

Mu 1957, Wukani! yikamba kusindikizgika mwezi uliwose mu Chiindonesiya. Mwaluŵiro ŵakamba kusindikizga magazini gha Wukani! ghakukwana 10,000 pa mwezi. Chifukwa cha kuchepa kwa mapepara ghakusindikizgira, ŵabali ŵakeneranga kusanga layisensi ku boma yakuchemeskera mapepara. Mulara  wa boma uyo wakapokera kalata yakupempha layisensi, wakati: “Nkhuwona kuti magazini ya Menara Pengawal (Gongwe la Mulinda) njimoza mwa magazini ghawemi chomene kuno ku Indonesia. Ntheura nakondwa chomene kupulika fundo iyi, ndipo nimovwiraninge kuti musange layisensi yakuchemeskera mapepara ghakupangira magazini yinu yiphya iyi.”

^ ndime 4 Kwambira mu 1945, ŵasinthapo kaŵiri kalembero ka masipeling’i gha Chiindonesiya kuti ghanjire m’malo mwa masipeling’i gha Chidachi agho ŵakalembanga kale.