Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lapachaka la Ŵakaboni ŵa Yehova 2016

Ungano uwo tikachita nyengo iyo ntchito yithu yikakanizgika, ndipo ŵabali ŵanyake ŵakategherezganga uku ŵali mu boti

 INDONESIA

Ŵakathera Yayi

Ŵakathera Yayi

Ŵabali ku ofesi ya munthavi ŵakati ŵapulika waka kuti boma lakanizga ntchito yakupharazga, ŵakachitapo kanthu mwaluŵiro. Ronald Jacka wakati: “Tikabisa makalata na mafomu ghose ghachisisi, mabuku, na ndalama za gulu. Tikachita ivi mu Jakarta mose. Pamanyuma tikasamuskira ofesi ya munthavi ku malo uko ŵanthu ŵakamanyangako yayi ndipo tikaguliska ofesi ya munthavi yakale mwachisisi.”

Ŵabali ŵanandi ŵakalutilira kuchita vinthu vyauzimu ndipo ŵakawopanga yayi. Ŵakaŵa kuti ŵazizipizga kale masuzgo ghanandi m’paka apo ntchito yithu yikakanizgika, ndipo ŵakalutilira kugomezga Yehova. Kweni ŵabali ŵanyake masuzgo agha ghakaŵabuchizga. Ŵalara ŵanyake ŵakachita wofi ndipo ŵakasayina vikalata vyakuti ŵalekenge kupharazga. Ŵanyake ŵakavumburanga mazina gha ŵabali mu mpingo. Ofesi ya munthavi yikatumizga ŵabali ŵakukhwima mwauzimu kuti ŵakakhozge mipingo na kovwira ŵabali awo ŵakathera. John Booth, uyo wakaŵa mu Wupu Wakulongozga, nayo wakiza ku Indonesia ndipo wakapeleka ulongozgi wachitemwa ku ŵabali.

Yehova ni Muliska Mulara nadi, wakakhozganga na kupembuzga ŵanthu ŵake. (Ezek. 34:15) Ŵalara ŵakamba kulimbikira kulongozga pa vinthu vyauzimu, ndipo ŵapharazgi ŵakasanga nthowa ziphya za umo ŵangapharazgira kwambura kumanyikwa na boma. (Mat. 10:16) Ŵabali ŵanandi ŵakagura Mabaibolo ghaphya ku Wupu wakuguliska Mabaibolo ku Indonesia ndipo ŵakagaŵiranga ŵanthu mu uteŵeti. Kweniso ŵakapharazganga uthenga wa Ufumu mwakuchenjera para mphakwenelera. Ŵabali ŵanyake ŵakawuskangamo pepara ilo pakuŵa mazgu ghakuti buku ili ndakusindikizgika na Ŵakaboni ŵa Yehova na kugaŵira ŵakunweka.  Ŵapayiniya ŵanandi pakupharazga ŵakatetezgeranga kuguliska vinthu nyumba na nyumba. Ivi ndivyo ŵakachitangaso ŵanyawo awo ŵakaŵako mu nyengo iyo charu cha Japan chikalamuliranga Indonesia.

Margarete na Norbert Häusler

Mu 1977, dipatimenti yakuwona vya chisopa yikawukiraso Ŵakaboni ŵa Yehova. Yikakana kupangiraso ŵamishonare ŵa Ŵakaboni ŵa Yehova vikalata vyakuti ŵakhalire mu Indonesia. Ŵamishonale ŵanandi ŵakasamuskikira mu vyaru vinyake. * Norbert Häusler uyo wakaŵa mishonale ndipo wakateŵetera na muwoli wake Margarete, ku Manado, North Sulawesi,  wakati: “Ŵabali ŵanandi ŵakiza ku chiŵanja cha ndege kuzakalayirana nase. Apo tikakweranga masitepu ghakunjilira mu ndege, tikimilira dankha pa mulyango na kulaŵiska ŵabali. Tikawona mawoko gha ŵabali ghali nyomi muchanya, kutibabayiska, ndipo wose ŵakachemerezga lumoza kuti: ‘Tikuwonga chomene. Tikuwonga kuti mukiza kuno.’ Tikanjira mu ndege na kwamba kulira.”

Kukasuzga ku Chirwa cha Sumba

Ŵanthu ŵanandi ŵakati ŵamanya kuti ntchito ya Ŵakaboni yakanizgika, Wupu wa visopa ukaphalira ŵanthu mu matchalitchi ghawo kuti ŵakaphare ku boma para ŵasanga Kaboni wakupharazga. Ivi vikapangiska kuti ku vigaŵa vinandi Ŵakaboni ŵakakike. Ndipo Ŵakaboni ŵanyake ŵakatoleka na kuŵaphulunga na mafumbo.

Ku Waingapu, ku chirwa cha Sumba, mulara wa ŵasilikari ku malo agha wakachemeska ŵabali 23 kuti ŵize ku kampu ya ŵasilikari. Ŵakati ŵiza, wakamba kuŵachichizga kuti ŵasayine chikalata chakuti ŵaleka kuŵa Ŵakaboni. Ŵabali ŵakati ŵakana, mulara wa ŵasilikari uyu wakaŵaphalira kuti ŵakizeso zuŵa lakulondezgapo. Ŵabali aŵa ŵakeneranga kwenda pasi, mtunda wa makilomita 14 kuluta na kuwerako.

Ŵabali ŵakati ŵalutaso mulenji, ŵakachemekanga yumozayumoza ndipo ŵakamuphaliranga kuti wasayine chikalata chira. Para mubali wakana kusayina, ŵasilikari ŵakamutimbanga na maluswazu gha minga. Msilikari waliyose wakatimbangapo waka, m’paka ŵabali ŵanyake ŵakafenta. Panyengo iyo mubali wakutimbika, ŵabali ŵanyake ŵakalindiliranga waka kuwaro kuti nyengo yawo yikwane. Paumaliro, mubali munyake muwukirano zina lake Mone Kele wakanjira na kwamba kusayina chikalata chira. Ŵabali ŵanyake ŵakakhuŵara chomene kuwona kuti wakwamba kusayina, kweni mulara wa ŵasilikari yura wakathukira chomene. Mone wakalembapo kuti: “Nkhukhumba kuŵa Kaboni wa Yehova muyirayira!” Ŵasilikari ŵakamba kumutimba ndipo ŵakamupweteka chomene mwakuti wakagonekeka mu chipatala.  Kweni wakawelera nyuma yayi mwauzimu.

Mulara wa ŵasilikari yura wakasuzga ŵabali kwa mazuŵa 11 kuti ŵathere. Wakaŵaphalira kuti ŵimilire zuŵa lose pa zuŵa. Wakaŵaphaliraso kuti ŵakhwaŵe pasi mtunda utali ndiposo kuti ŵachimbire mtunda utali uku ŵayegha katundu muzito. Uku chimayi cha futi chili pa singo za ŵabali, wakaŵaphalira kuti ŵagwadire ndembera. Kweni ŵabali aŵa ŵakakana nipera. Ntheura wakalamura kuti ŵatimbikeso.

Mulenji uliwose ŵabali ŵakalutanga ku kampu ya ŵasilikari uku ŵakujifumba kuti ntchivichi chamutiwira mwahuno. Mu nthowa ŵakalomberanga lumoza na kukhozgana kuti ŵakalutilire kugomezgeka. Ndipo zuŵa lililose pakuwelera ku nyumba, vilonda vikaŵanga palipose ndipo ndopa zikaŵanga waka khachikhachi. Kweni ŵakakondwanga kuti ŵagomezgeka kwa Yehova.

Ofesi ya munthavi yikati yamanya kuti ŵabali ŵakutambuzgika, yikalembera makalata mulara wa ŵasilikari ku Waingapu, mulara wa ŵasilikari wakulaŵilira chigaŵa cha Timor, mulara wa ŵasilikari ku Bali, mulara wa ŵasilikari ku Jakarta, na ŵalara ŵanyake ŵa boma. Chifukwa cha kopa kuti nkhaza izo zikachitikanga zimanyikwenge mu Indonesia, mulara wa ŵasilikari ku Waingapu wakakanizga kusuzga ŵabali.

“Ŵakaboni ŵa Yehova Ŵali nga ni Mizumali”

Mu vyaka vyakulondezgapo, Ŵakaboni ŵanandi mu Indonesia ŵakaŵakoranga, kuŵafumba mafumbo, na kuŵatimba. Mishonale munyake zina lake Bill Perrie wakati: “Mu chigaŵa chinyake, ŵabali ŵanandi ŵakaŵakhura mino ghapanthazi. Para ŵabali aŵa ŵakumana na mubali uyo wali na mino ghapanthazi, ŵakamufumbanga mwakuseka kuti: ‘Wamba waka  sono unenesko, panji ukathera?’ Nangauli ŵakakumana na viyezgo vinandi, kweni ŵabali aŵa ŵakalutilira kuŵa ŵachimwemwe. Kweniso ŵakalimbikiranga kuteŵetera Yehova.”

“Chifukwa cha kukhala mu jele, nkhasambira kuti nigomezgenge chomene Yehova, kweniso kuti niŵe wakukhora chomene mwauzimu”

Mu vyaka 13 pera, Ŵakaboni ŵa Yehova ŵakukwana 93 ŵakajalirika mu jele. Ŵanyake ŵakajalirikanga myezi waka, kweni ŵanyake m’paka vyaka 4. Nkhaza izo ŵakaŵachitiranga zikaŵakhozganga waka kuti ŵalutilire kugomezgeka kwa Yehova. Mubali Musa Rade wakati wagwira jele myezi 8, wakendera ŵabali mu chigaŵa chake na kuŵakhozga kuti ŵalutilire kupharazga. Iyo wakati: “Chifukwa cha kukhala mu jele, nkhasambira kuti nigomezgenge chomene Yehova, kweniso kuti niŵe wakukhora chomene mwauzimu.” Lekani ŵanthu ŵanyake ŵakati: “Ŵakaboni ŵa Yehova ŵali nga ni mizumali. Para muzumali ukuwukhoma chomene, ukunjira chomene pasi. Para Ŵakaboni waŵatimba chomene ndikuti ukuŵatuma kuti ŵakhore chomene mwauzimu.”

Ŵapharazgi ŵakuluta kukapharazga ku Ambon, Maluku

^ ndime 1 Ŵamishonale nga ni Peter Vanderhaegen na Len Davis ŵakaŵa na vyaka vyakujumpha 60 ndipo Marian Tambunan (uyo kale wakachemekanga kuti Stoove) wakatorana na munthu wa ku Indonesia, ndipo ŵakazomerezgeka kukhala ku Indonesia kwenekuko. Wose ŵatatu ŵakalutilira kuchita makora mwauzimu ndipo ŵakawovwira ŵanthu ŵanandi mu nyengo iyo ntchito yithu yikakanizgika.