Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Mazgoro Gha Mafumbo 10 Agho Ŵachinyamata Ŵakufumba

 FUMBO 1

Kasi Nkhwendera Fundo za Njani?

Kasi Nkhwendera Fundo za Njani?

ICHO MUKWENERA KUMANYA

Para mukujimanya makora kweniso mukumanya ivyo mukugomezga, musankhenge vinthu mwamahara para ŵanyinu ŵakumunyengelerani kuchita viheni.

KASI IMWE MUNGACHITA WULI?

Wonani ivyo vyachitikira Kareni: Iyo wafika waka ku pate, ndipo wati wakhalapo kanyengo kachoko waka, mubwezi wake Jesika wakumufumba kuti:

“Chifukwa wuli wati waka khuma?”

Kareni wakuwona kuti mubwezi wake Jesika wali na mabotolo yaŵiri ya moŵa. Jesika wakupeleka botolo limoza kwa Kareni na kuyowoya kuti, “Ndiwe mulara ayise, kunjoyangako nyengo zinyake, ene mwapo.”

Kareni wakukhumba kukana, kweni wakuwona kuti Jesika ni mubwezi wake. Ndipo wakukhumba yayi kuti mubwezi wake wamuwone kuti ngwakukhalira. Kweniso Kareni wakuwona kuti Jesika ni msungwana muwemi chomene. Kareni wakughanaghana kuti usange Jesika wakumwa, ndikuti palije suzgo lililose. Iyo wakuwona kuti moŵa nguwemi waka, kweni munkhwala wakuzweteska wongo ndiwo nguheni.

Kasi imwe muŵenge Kareni, mwate muchitenge wuli?

YIMANI NA KUGHANAGHANA!

Kuti musankhe mwamahara para ivi vingachitikira imwe, mukwenera kujimanya makora. Munthu uyo wakujimanya makora, kweniso wakumanya kuti ivyo wakugomezga ni vyakuzirwa, wakuyeyeka bweka yayi.—1 Ŵakorinte 9:26, 27.

Kasi mungachita wuli kuti muleke kuyeyeka waka na ŵanyinu? Mafumbo ghakulondezgapo agha ghangamovwirani.

 1 NI VICHI IVYO NKHUCHITA MAKORA?

Para mukumanya makora maluso agho muli nagho kweniso mikhaliro yinu yiwemi, vimovwiraninge kuti muleke kujikayikira.

CHIYELEZGERO CHA MU BAIBOLO: Paulosi wakalemba kuti: “Nanga ningaŵa mulemwa mu kayowoyero, kweni nkhumanya vinthu vinandi.” (2 Ŵakorinte 11:6) Paulosi wakamanyanga makora mazgu gha Chiuta, lekani wakathera yayi apo ŵanthu ŵanyake ŵakamususkanga. Iyo wakazomerezga yayi kuti fundo izo ŵakayowoyanga zimugongoweske.—2 Ŵakorinte 10:10; 11:5.

JISANDANI: Pasi apa lembanipo maluso ghinu panji vinthu ivyo mukuchita makora.

Sono lembani mikhaliro yiwemi iyo muli nayo. (Mwachiyelezgero, kasi ndimwe walusungu? Kasi mukutemwa kupako ŵanyinu vinthu? Kasi ndimwe wakugomezgeka? Kasi mukusunga nyengo?)

2 NI VICHI IVYO NKHUTONDEKA KUCHITA MAKORA?

Mikhaliro yinu yiwemi yinganangika mwaluŵiro chomene usange mukughanaghanira waka ivyo mukutondeka kuchita makora.

CHIYELEZGERO CHA MU BAIBOLO: Paulosi wakamanyanga ivyo wakatondekanga kuchita makora. Iyo wakalemba kuti: “Mu mtima wane nkhukondwa na dango la Chiuta. Kweni nkhuwona dango linyake mu thupi lane ilo likulimbana na dango la maghanoghano ghane, ndipo likunizgora muzga wa dango la kwananga ilo lili mu thupi lane.”—Ŵaroma 7:22, 23.

JISANDANI: Ni vichi ivyo mukutondeka kuchita makora ndipo mukukhumba kuti mwambe kuchita makora?

 3 NILI NA VILATO WULI?

Kasi mungapanga hayara galimoto na kuphalira dilayivala kuti wazingilirenge nyumba m’paka apo mafuta ghamalirenge mu galimoto yake? Uwu ungaŵa uchindere kweniso mungananga ndalama zinu pawaka!

Kasi tikusambirapo vichi? Vilato vikovwira kuti muleke kuzingilira waka pa malo ghamoza. Munthu uyo wali na vilato, wakumanya icho wakukhumba ndipo wakusanga nthowa za umo wangasangira ivyo wakukhumba.

CHIYELEZGERO CHA MU BAIBOLO: Paulosi wakalemba kuti: “Nkhuchimbira waka yayi.” (1 Ŵakorinte 9:26) Paulosi wakakhalanga waka yayi. Wakaŵa na vilato ndipo wakachitangapo kanthu kuti wafiske ivyo wakakhumbanga.—Ŵafilipi 3:12-14.

JISANDANI: Lembani vinthu vitatu ivyo mukukhumba kuzakafiska chaka chikwiza.

4 KASI NKHUGOMEZGA VICHI?

Para mukujimanya makora, muŵenge nga ni khuni ilo misisi yake yajintha pasi, ndipo nanga kwize chimphepo chikuru likuwa yayi

Usange mukuvimanya makora yayi ivyo mukugomezga, muyeyekenge waka maghanoghano na chilichose. Muŵenge nga ni lwivi uyo wakusinthasintha ndipo muchitenge waka vilivyose ivyo ŵanyinu ŵakukhumba kuti muchitenge kuti muŵakondweske. Munthu uyo wakuchita nthena wakulongora kuti wakujimanya makora yayi.

Para munthu wakuchita ivyo iyo wakugomezga, wakuyeyeka bweka yayi.

CHIYELEZGERO CHA MU BAIBOLO: Apo Daniyeli wakaŵa munyamata, “wakasimikizga mu mtima wake” kuti wapulikirenge malango gha Chiuta nangauli wakaŵa kutali na banja lakwake kweniso ŵanthu awo wakasopanga nawo. (Daniyeli 1:8) Daniyeli wakalongora kuti wakaŵa munthu wakugomezgeka. Iyo wakachitanga vinthu mwakukolerana na malango gha Chiuta agho wakagomezganga.

JISANDANI: Kasi imwe mukugomezga vichi? Mwachiyelezgero: Kasi mukugomezga kuti Chiuta waliko? Para mwati enya, chifukwa wuli mukugomezga kuti kuli Chiuta? Kasi muli na ukaboni wuli wakuti Chiuta waliko nadi?

Kasi mukugomezga kuti malango gha Chiuta ghangamovwirani? Para mwati enya, chifukwa wuli mukuwona kuti ghangamovwirani?

Tiyelezgere kuti pali hamba ilo likuputa na mphepo ya mtundu uliwose, kweniso pali khuni ilo likuwa yayi nanga kwize chimphepo chikuru, kasi imwe mungatemwa kuŵa nga ni vichi? Mungaŵa nga ni khuni lakukhora para mukulutilira kuvimanya makora ivyo mukugomezga. Ivi vingamovwirani kusanga zgoro la fumbo lakuti, Kasi nkhwendera fundo za njani?