Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

  A2

Ivyo Vili mu Baibolo Ili

Baibolo Lachingelezi la Mang’anamuliro gha Charu Chiphya (Mateyu-Chivumbuzi) likafumiskika mu 1950. Ndipo Baibolo lose la Mang’anamuliro gha Charu Chiphya likafuma mu 1961. Kufuma mu nyengo iyi, Baibolo ili lang’anamulika mu viyowoyero vyakujumpha 120. Ndipo ŵanthu ŵanandi ŵakusanga chandulo na Baibolo ili, ilo lili kung’anamulika makora ndiposo ndambura kusuzga kuŵazga.

Komiti yakung’anamura Baibolo la Mang’anamuliro gha Charu Chiphya yikumanya kuti uthenga wa mu Baibolo ungafika pa mitima ya ŵanthu para lingaŵa na mazgu agho ŵakuyowoya zuŵa na zuŵa. Pa chifukwa ichi, Baibolo ili lalembeka munthowa yipusu ndiposo lili na mazgu ghapusu. Lalembeka mwakuyana na fundo zakulondezgapo izi:

  • Mazgu ghasono, ghakupulikikwa makora. Mazgu ghanyake ghakale chomene ghakusuzga kupulika nga ni agho ghali mu Tumbuka Bible, mu Baibolo ili tawuskamo ndipo muli mazgu ghasono agho ghakupulikikwa makora. Mwachiyelezgero, pa Zintharika 12:2, pali mazgu ghakuti, “wakusanga cinthemwa kwa Yehova,” kweni mu Baibolo ili pali kulembeka kuti, “wakutemweka na Yehova.” Pa Dotoronome 31:14, pali lizgu lakuti “kujiwonya,” kweni mu Baibolo ili pali kulembeka kuti, “kuwonekera.” Kweniso mu Baibolo ili, masipeling’i gha mazgu ghakuti “ng’ombe,” “ŵanthu” “thebulu,” ghalembeka nga umo ŵanthu ŵanandi ŵakulembera mazuŵa ghano.

  • Ng’anamuro la mazgu. Mazgu ghanyake mu Baibolo la Mang’anamuliro gha Caru Ciphya (Mateyu-Uvumbuzi) kanandi ghakakhumbanga kughalongosora dankha kuti ng’anamuro lake lipulikikwe makora. Mwachiyelezgero, lizgu Lachihebere lakuti “Sheole”  na Lachigiriki lakuti “Hadesi,” mu Baibolo ghakung’anamura dindi. Kweni ŵanthu ŵanandi ŵakughamanya yayi mazgu agha. Ntheura mu Baibolo ili mwalembeka ng’anamuro la mazgu agha lakuti “Dindi.” Ndipo mazgu ghakuti “Sheole” na “Hadesi” ghalembeka mu mazgu ghamusi.—Salimo 16:10; Milimo 2:27.

    Lizgu lakuti “ziso” (figho) apo likuyowoya za ziso yeneko palembeka ziso. Apo lili na ng’anamuro linyake palembeka waka ng’anamuro lake. Chiyelezgero ni lemba la Salimo 7:9 na Salimo 26:2 ndiposo Chivumbuzi 2:23. Mu mavesi agha, lizgu lakuti ziso likuyowoya za “maghanoghano,” ntheura mwalembeka waka ng’anamuro lake, ndipo lizgu lakuti ziso lalembeka mu mazgu ghamusi.

    Lizgu lakuti “mtima” pa Chitumbuka likung’anamura mtima weneko kweniso likwimiraso vinthu vinyake. Ntheura lalembeka mu malo ghanandi apo fundo yikupulikikwa makora. Kweni apo fundo yikupulikikwa makora yayi, palembeka waka ng’anamuro lake. Chiyelezgero ni lemba la Zintharika 7:7. Mazgu ghanyake agho ghalembeka nthena ni “vyakututuŵa,” “thupi,” na “sengwe.” (Genizesi 45:18; Mupharazgi 5:6; Yobu 16:15) Mazgu ghanyake ghalongosoreka mu “Mang’anamuro gha Mazgu gha mu Baibolo.”

  • Kalembero ka mazina. Mu Baibolo ili, mazina gha mabuku ghanyake ghalembeka munthowa yambura kusuzga kuzunura. Mwachiyelezgero, Genesis sono ni Genizesi. Ruth sono ni Rute. Job sono ni Yobu. Habakuk sono ni Habakuku.

Vinyake ivyo vili mu Baibolo ili:

Baibolo ili lili na mazgu ghamusi. Wonani umo ghanyake ghali kulembekera:

  • “Panji kuti” Nthowa yinyake iyo ghangalembekera mazgu Ghachihebere, Chiaramu, panji Chigiriki kweni ng’anamuro lake likuyana waka.—Genizesi 1:2, mazgu ghamusi pa  “mzimu wa Chiuta”; Joshuwa 1:8, “kughanaghanirapo.”

  • “Pangayowoyekaso kuti” Nthowa yinyake ya kalembero ka mazgu kweni ng’anamuro lake lingaŵa lakupambana.—Genizesi 21:6, “wasekenge nane”; Zekariya 14:21, “Mukenani.”

  • “Mazgu gheneko” Kung’anamura lizgu pa lizgu kufuma ku Chihebere, Chiaramu, panji Chigiriki chakale.—Genizesi 30:3, “wanibabire ŵana”; Ekisodo 32:29, “Jipaturani.”

  • Mang’anamuro na vinyake Mang’anamuro gha mazina (Genizesi 3:17, “Adamu”; Ekisodo 15:23, “Mara”); uzito na vyakupimira (Genizesi 6:15, “mikono”); kulongora Vyakusazgirapo na Mang’anamuro gha Mazgu.—Genizesi 37:35, “Dindi”; Mateyu 5:22, “Gehena.”

Kukwambilira kwa Baibolo ili kuli chigaŵa cha mutu wakuti “Kasi mu Baibolo Muli Vichi?” Chigaŵa ichi chili na fundo izo Baibolo likusambizga. Paumaliro wa buku la Chivumbuzi pali ndondomeko ya “Mazina gha Mabuku gha mu Baibolo,” kufuma apo pali “Chilongolero cha Mazgu gha mu Baibolo,” na “Mang’anamuro gha Mazgu gha mu Baibolo.” Chigaŵa cha Mang’anamuro gha Mazgu chikovwira kupulikiska mazgu ghanyake gha mu Baibolo. Chigaŵa cha Vyakusazgirapo A, chili na mitu iyi: “Fundo Izo Zikovwira pa Kung’anamura Baibolo,” “ Ivyo Vili mu Baibolo Ili,” “Kasi Baibolo Lafika Wuli kwa Ise?” “Zina la Chiuta mu Malemba Ghachihebere,” “Zina la Chiuta mu Malemba Ghachigiriki,” “Tchati: Ntchimi na Mathemba gha Yuda na Israyeli,” na “Ivyo Yesu Wakachita apo Wakaŵa pa Charu Chapasi.” Mu Vyakusazgirapo B muli mapu, matchati, na vinyake ivyo vikovwira pakusambira Baibolo.

Buku lililose kukwambilira lili na mazgu agho ghakulongora ivyo vili mu buku ilo. Chigaŵa ichi chikovwira kuti munthu waŵe na chithuzithuzi cha fundo izo zili mu buku lose. Pakati pa peji lililose pali kolamu iyo yili na malemba agho ghakulongora mavesi ghanyake agho ghali na nkhani yakuyanako.