Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Zintharika 8:1-36

IVYO VILI MU BUKU ILI

  • Vinjeru vikuyowoya (1-36)

    • ‘Ndine wakwambilira wa milimo ya Chiuta’ (22)

    • ‘Nga ni misiri pafupi na Chiuta’ (30)

    • ‘Nkhakondwanga na ŵana ŵa ŵanthu’ (31)

8  Asi vinjeru vikuchemerezga? Umanyi nawo, asi ukutumphuska mazgu ghake?+   Vimilira pa mphatukano, Pa malo ghakukwera+ musi mwa nthowa.   Pafupi na vipata vya ku msumba, Pakunjilira mu milyango, Vikuchemerezga kuti:+   “Nkhuchemerezga kwa imwe, mwaŵanthu. Nkhutumphuska mazgu ghane kwa waliyose.*   Imwe ŵazeleza, muŵe ŵakuchenjera.+ Imwe vindere, muŵe na mtima wakupulikiska.*   Pulikizgani, pakuti ivyo nkhuyowoya ni vyakuzirwa, Milomo yane yikuyowoya vyakunyoloka.   Pakuti mulomo wane ukuyowoya unenesko, Uheni mbukazuzi ku milomo yane.   Vyose ivyo mulomo wane ukuyowoya mburunji. Palije icho ntchakunyongoloka panji chakubendera.   Vyose ni vyakunyoloka kwa munthu waumanyi, Ni vyakwenelera ku awo ŵakumanya tunthu. 10  Pokelerani chisambizgo chane, siliva chara, Kumanya tunthu kuluska golide liwemi,+ 11  Pakuti vinjeru ni viwemi kuluska malibwe gha korali,* Vinthu vinyake vyose vyakukondweska vingayana navyo chara. 12  Ine vinjeru, nkhukhala pamoza na kuchenjera. Nasanga kumanya na kaghanaghaniro kawemi.+ 13  Kopa Yehova nkhutinkha uheni.+ Ine nkhutinkha kujikwezga, kunotha,+ nthowa yiheni, na kayowoyero kauryarya.+ 14  Nili na ulongozgi uwemi kweniso vinjeru viwemi.+ Kupulikiska vinthu+ na nkhongono ni vyane.+ 15  Mathemba ghakuwusa kwizira mwa ine, Ndipo ŵalaraŵalara ŵakulangura kuti urunji uchitike.+ 16  Kwizira mwa ine, ŵakaronga ŵakuwusa, Ndipo ŵanthu ŵakuchindikika ŵakweruzga mu urunji. 17  Nkhutemwa awo ŵakunitemwa, Ndipo awo ŵakunipenja ŵanisangenge.+ 18  Usambazi na uchindami vili na ine, Vyuma vyambura kumara* na urunji. 19  Chipambi chane ntchiwemi kuluska golide, enya, kuluska golide lakwengeka, Ndipo vuna yane yikuluska siliva liwemi chomene.+ 20  Nkhwenda mu nthowa ya urunji, Mukatikati mwa nthowa zakunyoloka. 21  Nkhuŵapa chiharo chiwemi awo ŵakunitemwa, Ndipo nkhuzuzga nthamba zawo. 22  Yehova wakanipanga nga nkhwamba kwa nthowa zake,+ Wakwambilira wa milimo yake yakale.+ 23  Nkhimikika papo kale,*+ Pakwambilira penecho, pambere charu chapasi chindaŵeko.+ 24  Zindaŵeko ndimba za maji,+ ine nkhababika, Apo kukaŵavya viziŵa vyakuzura na maji. 25  Nkhababika pambere mapiri ghandakhazikike, Pambere tumapiri tundaŵeko, 26  Apo wakaŵa wandalenge charu chapasi na minda Panji vibuma vyakwamba vya dongo la charu. 27  Apo wakanozganga machanya,+ nkhaŵapo. Apo wakagwaranga chimzere zingilizge* pachanya pa vimaji,+ 28  Apo wakakhozganga mabingu kuchanya, Apo wakapanganga ndimba za maji, 29  Apo wakimikanga dango pa nyanja Kuti maji ghaleke kujumpha languro lake,+ Apo wakakhozganga malufura gha charu chapasi, 30  Penepapo ine nkhaŵa pafupi nayo nga ni misiri,*+ Wakakondwanga nane+ zuŵa na zuŵa, Nane nkhakondwanga pamaso pake nyengo zose.+ 31  Nkhasekelera na charu chake chakukhalamo ŵanthu, Ndipo nkhakondwanga chomene na ŵana ŵa ŵanthu. 32  Sono imwe, ŵana ŵane, pulikizgani kwa ine. Nadi, mbakukondwa awo ŵakusungilira nthowa zane. 33  Pulikani chisambizgo+ ndipo muŵe ŵavinjeru, Mungavisuranga yayi. 34  Ngwakukondwa munthu uyo wakupulika kwa ine Wakutendekera kwiza* pa vijaro vyane zuŵa na zuŵa, Na kulindilira pa milyango yane. 35  Pakuti uyo wanisanga ine, wasangenge umoyo,+ Ndipo Yehova wakukondwa nayo. 36  Kweni uyo wakuniswaya, wakujipweteka yekha, Ndipo awo ŵakunitinkha ŵakutemwa nyifwa.”+

Mazgu Ghamusi

Mazgu gheneko, “ku ŵana ŵa ŵanthu.”
Mazgu gheneko, “manyisiskani mtima.”
Panji kuti, “Chiharo chambura kumara.”
Panji kuti, “nyengo yambura kukumbukika.”
Mazgu gheneko, “chizingo.”
Mazgu ghanyake, “fundi; nkhwantha.”
Panji kuti, “Wakuŵa maso.”