Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Zintharika 24:1-34

IVYO VILI MU BUKU ILI

  • Kuchita sanji na ŵanthu ŵaheni yayi (1)

  • Nyumba yikuzengeka na vinjeru (3)

  • Munthu murunji wangawa, kweni wakuwuka (16)

  • Kuwezgera chara (29)

  • Ukavu ukwiza chifukwa cha kutemwa tulo (33, 34)

24  Ungachitanga sanji chara na ŵanthu ŵaheni, Ungadokeranga chara kuŵa nawo pamoza,+   Pakuti mitima yawo yikughanaghana nkhaza, Ndipo milomo yawo yikuyowoya vyakusuzga pera.   Nyumba yikuzengeka na vinjeru,+ Ndipo yikukhozgeka na umanyi.   Chifukwa cha kumanya vinthu, vipinda vyake vikuzuzgika Na mtundu wose wa usambazi wakuzirwa na wakukondweska.+   Munthu wavinjeru ngwankhongono,+ Ndipo munthu wakusazgirako nkhongono zake chifukwa cha kumanya vinthu.   Na fundo zavinjeru* urwenge nkhondo yako,+ Ndipo mu ŵakupeleka fundo ŵanandi muli chiponosko.+   Vinjeru vyeneko vili kutali chomene na chindere.+ Walije chakuyowoya mu chipata cha msumba.   Uyo wakwata viheni Wachemekenge kuti wachiŵembu.+   Maghanoghano ghauchindere* nkhwananga, Ndipo ŵanthu ŵakunyanyara munthu wakugoska.+ 10  Usange ukulopwa mu zuŵa la soka,* Nkhongono zako ziŵenge zichoko. 11  Thaska awo ŵakutolekera ku nyifwa, Wezgako awo ŵakupenthyapenthya kuya kukakomeka.+ 12  Usange mukuti: “Ichi tikachimanya chara,” Asi uyo wakusanda mitima* wakuchimanya?+ Enya, uyo wakukuwona* wakumanya Ndipo wamuwezgerenge munthu waliyose kuyana na mulimo wake.+ 13  Mwana wane, uryenge uchi, pakuti nguwemi. Uchi wakufuma ku chisa ukunong’omera mu mulomo. 14  Mwakuyana waka, umanye kuti vinjeru ni viwemi kwa iwe.*+ Usange wavisanga, ukhazgenge viwemi munthazi Ndipo chigomezgo chako chidumulikenge chara.+ 15  Ungajoŵeleranga nga ni muheni pafupi na nyumba ya murunji chara. Ungabwanganduranga yayi malo ghake ghakupumulirapo. 16  Pakuti murunji wangawa kankhondi na kaŵiri ndipo wawukengeso,+ Kweni muheni wakhuŵarenge na soka.+ 17  Para mulwani wako wawa, ungasekeleranga chara, Ndipo para wakhuŵara, mtima wako ungakondwanga chara.+ 18  Chifukwa Yehova wawonenge, na kukwiya, Ndipo wawezgengeko ukali wake kwa iyo.*+ 19  Ungakwiyanga* chifukwa cha ŵanthu ŵaheni chara. Ungachitiranga sanji ŵabendezi chara, 20  Pakuti muheni waliyose walije kawemi munthazi.+ Nyali ya muheni yizimwikenge.+ 21  Mwana wane, wopenge Yehova na themba.+ Ungendezgananga na ŵamtafu* chara,+ 22  Pakuti soka lawo lizenge mwamabuchi.+ Ni njani wakumanya pharanyiko ilo wose ŵaŵiri* ŵizenge nalo pa iwo?+ 23  Mazgu agha nagho nga ŵavinjeru: Ntchiwemi yayi kutemwera pakweruzga.+ 24  Yose uyo wakuyowoya kwa muheni kuti: “Ndiwe murunji,”+ Watembekenge na ŵanthu ndipo mitundu yimutinkhenge. 25  Kweni awo ŵakumuchenya, vinthu viŵayenderenge makora,+ Vitumbiko viwemi vizenge pa iwo.+ 26  Ŵanthu ŵafyofyonthenge milomo ya uyo wakuzgora mwaunenesko.*+ 27  Nozga makora mulimo wako kuwaro, ndipo nozga vyose vya mu munda. Kufuma apo, uzenge nyumba yako. 28  Ungaŵanga kaboni chara kususka mzengezgani wako kwambura chifukwa.+ Milomo yako ungapusikiranga ŵanji yayi.+ 29  Uleke kuyowoya kuti: “Ivyo wanichitira ndivyo nane nimuchitirenge. Nimuwezgerenge ivyo wachita.”*+ 30  Nkhajumpha pafupi na munda wa mukata,+ Pafupi na munda wa mpheska wa munthu wambura mahara.* 31  Kweni nkhawona waka thondo skuu. Nkhunga zikataŵa munda wose, Ndipo linga lake lamalibwe likawa.+ 32  Nkhachiwona na kuchiŵika mu mtima. Nkhalaŵiska na kusambirapo kuti:* 33  Na tulo tuchoko waka, kusiwa kuchoko waka, Kupinda mawoko na kugona, 34  Ukavu wizenge pa iwe nga ni munkhungu, Kusoŵerwa kwizenge nga ni munthu uyo wali na vilwero.+

Mazgu Ghamusi

Panji kuti, “ulongozgi wavinjeru.”
Panji kuti, “Viŵembu vya chindere.”
Panji kuti, “mu nyengo ya suzgo.”
Panji kuti, “makhumbiro.”
Panji kuti, “wakuwona umoyo wako.”
Panji kuti, “ni vyakunong’omera ku umoyo wako.”
Ndiko kuti, mulwani.
Panji kuti, “Ungathukiranga.”
Panji kuti, “awo ŵakukhumba vinthu visinthe.”
Ndiko kuti, Yehova na themba.
Pangayowoyekaso kuti, “Kuzgora vyaunenesko kuli nga nkhufyofyontha.”
Panji kuti, “Nimalanenge nayo.”
Mazgu gheneko, “wakupeleŵera mu mtima.”
Mazgu gheneko, “Nkhapokera chisambizgo chakuti:”