Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Zintharika 21:1-31

IVYO VILI MU BUKU ILI

  • Yehova wakulongozga mtima wa themba (1)

  • Urunji nguwemi chomene kuluska sembe (3)

  • Munthu wachitatata vinthu vikumwendera (5)

  • Uyo wakuleka kupulika wakuyuyuka, nayo wapulikikwenge yayi (13)

  • Palije vinjeru vyakususkana na Yehova (30)

21  Mtima wa themba uli nga nthumilonga twa maji mu woko la Yehova.+ Wakuwulongozgera kulikose uko wakhumba.+   Nthowa zose za munthu zikuwoneka zakunyoloka kwa iyo,+ Kweni Yehova wakusanda mtima.*+   Kuchita urunji na kweruzga mwakunyoloka Vikumukondweska chomene Yehova kuluska sembe.+   Maso ghakujikuzga na mtima wamtonyoro —Ni nyali iyo yikulongozga muheni, ndipo nkhwananga.+   Maghanoghano gha munthu wachitatata ghakovwira kuti vinthu vyende makora,+ Kweni wose awo ŵakuchimbilira pakuchita vinthu ŵakavukenge.+   Kusanga usambazi na lulimi lwautesi Kuli nga ni nyathutwe* uyo wakuzgeŵelekera, ntchipingo cha nyifwa.*+   Nkhaza za ŵaheni ziŵapyepyeturenge,+ Pakuti ŵakukana kuchita vinthu mu urunji.   Nthowa ya munthu uyo wali na mulandu njakubendera, Kweni mulimo wa munthu wakutowa ngwakunyoloka.+   Ntchiwemi kukhala pakona pa mtenje Kuluska kukhala mu nyumba yimoza na mwanakazi wambembe.*+ 10  Munthu* muheni wakudokera uheni.+ Wakuchitira lusungu yayi mzengezgani wake.+ 11  Para wakugoska wapika chilango, munthu wambura mahara wakuŵa wavinjeru, Para munthu wavinjeru wapokera mahara, wakusazgirako kumanya vinthu.*+ 12  Chiuta Murunji wakulaŵiska nyumba ya muheni, Ŵaheni wakuŵawiskira pasi na kuŵaparanya.+ 13  Yose uyo wakujara khutu lake para wakuyuyuka wakuchema, Nayo wachemenge, kweni wazgorekenge yayi.+ 14  Chawanangwa cha kuudesi chikuwezga ukali,+ Ndipo chimbundi chakubisika* chikulekeska mbembe yikuru. 15  Ntchimwemwe kwa murunji kuchita vinthu mu urunji,+ Kweni ntchinthu chakofya chomene ku awo ŵakuchita uheni. 16  Munthu uyo wapatukako ku nthowa ya mahara, Wapumulenge pamoza na awo ŵali kufwa.+ 17  Uyo wakutemwa kusangwa* wakavukenge.+ Uyo wakutemwa vinyo na mafuta wasambazgenge yayi. 18  Muheni ntchiwombolero cha murunji, Ndipo muryarya watolekenge mu malo mwa wakunyoloka.+ 19  Ntchiwemi kukhala mu mapopa Kuluska kukhala na mwanakazi wambembe* na muŵeleŵesi.+ 20  Vyuma vyakuzirwa na mafuta vikusangika mu nyumba ya wavinjeru,+ Kweni muzeleza wakusakaza* ivyo wali navyo.+ 21  Uyo wakulondezga urunji na lusungu* Wasangenge umoyo, urunji, na uchindami.+ 22  Wavinjeru wangawukira* msumba wa munthu wankhongono, Na kubwangandura nkhongono izo ŵakuthemba.+ 23  Uyo wakukora mulomo na lulimi lwake Wakujivikilira ku suzgo.+ 24  Munthu uyo wakuchita vinthu mwakujiŵikamo nkhanira Mukumuchema wakujiŵikamo, na wamtonyoro.+ 25  Ivyo munthu mukata wakudokera vimukomenge, Pakuti mawoko ghake ghakukana kugwira ntchito.+ 26  Zuŵa lose wakudokera waka, Kweni murunji wakupa, wakukanilira yayi.+ 27  Sembe ya muheni mbukazuzi.+ Ndipo chomene kwakuluska para wakuyipeleka na khumbo liheni.* 28  Kaboni mutesi waparanyikenge,+ Kweni munthu uyo wakupulikizga wapelekenge ukaboni wakupulikikwa.* 29  Munthu muheni wakujikhwimiska pa chisko,+ Kweni murunji ndiyo mendero ghake ngakugomezgeka.*+ 30  Kulije vinjeru, umanyi, nanga ni fundo ivyo vingimikana na Yehova.+ 31  Hachi likunozgekera zuŵa la nkhondo,+ Kweni Yehova ndiyo wakuponoska.+

Mazgu Ghamusi

Panji kuti, “makhumbiro.”
Mazgu ghanyake, “nyankhuŵinda.”
Pangayowoyekaso kuti, “ku awo ŵakupenja nyifwa.”
Panji kuti, “wakusuzga.”
Panji kuti, “Umoyo wa muheni ukudokera.”
Panji kuti, “wakumanya chakuchita.”
Mazgu gheneko, “chimbundi mu chifuŵa.”
Panji kuti, “wakutemwa vyakukondweska.”
Panji kuti, “wakusuzga.”
Mazgu gheneko, “wakumira.”
Panji kuti, “chitemwa chakugomezgeka.”
Panji kuti, “wangatonda.”
Panji kuti, “pamoza na nkharo yakulengeska.”
Mazgu gheneko, “wayowoyenge muyirayira.”
Panji kuti, “wakupanikizgira mendero ghake.”