Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Baibolo la pa Intaneti | MALEMBA GHAKUPATULIKA MU MANG'ANAMULIRO GHA CHARU CHIPHYA

Zekariya 3:1-10

IVYO VILI MU BUKU ILI

  • Mboniwoni yachinayi: Kusintha vyakuvwara vya wasembe mukuru (1-10)

    • Satana wakususka Joshuwa, Wasembe Mukuru (1)

    • “Nizenge na muteŵeti wane Mphukira!” (8)

3  Penepapo wakanilongora Joshuwa+ wasembe mukuru, wakwimilira pamaso pa mungelo wa Yehova, ndipo Satana+ wakimilira ku woko lake lamalyero kuti wamususke.  Mungelo wa Yehova wakati kwa Satana: “Yehova wakuchenye, iwe Satana,+ enya, Yehova uyo wasankha Yerusalemu+ wakuchenye! Asi ichi ntchigodo chakugolera icho ŵaphura pa moto?”  Sono Joshuwa wakavwara vyakuvwara vyakubinkha ndipo wakimilira pamaso pa mungelo.  Mungelo wakati kwa awo ŵakimilira pamaso pake: “Muvulani vyakuvwara vyake vyakubinkha.” Penepapo wakati kwa iyo: “Wona, nawuskako kwananga* kwako kwa iwe, ndipo uvwalikikenge vyakuvwara viwemi.”*+  Ntheura ine nkhati: “Nduŵira yakutowa yivwalikike ku mutu wake.”+ Ndipo ŵakamuvwalika nduŵira yakutowa ku mutu wake na kumuvwalika vyakuvwara. Mungelo wa Yehova wakimilira pafupi.  Penepapo mungelo wa Yehova wakati kwa Joshuwa:  “Ichi ndicho Yehova wa mawumba wayowoya, ‘Usange wendenge mu nthowa zane na kufiska milimo yako pamaso pane, mbwenu uteŵeterenge nga ni mweruzgi mu nyumba yane+ na kulaŵilira* maluŵaza ghane. Ndipo nikuzomerezgenge kwiza pamaso pane pamoza na aŵa ŵimilira apa.’  “‘Naŵeya, pulika iwe Wasembe* Mukuru Joshuwa, pamoza na ŵanyako awo ŵakukhala panthazi pako, pakuti ŵanalume aŵa ŵali nga ntchimanyikwiro. Wona! Nizenge na muteŵeti wane+ Mphukira!+  Wona libwe ilo naŵika panthazi pa Joshuwa! Pa libwe limoza pali maso 7. Ndipo nkhujobapo malemba. Nizamuwuskapo mulandu wa charu chira mu zuŵa limoza pera.’ ndimo wayowoyera Yehova wa mawumba.+ 10  “Mu zuŵa ilo, waliyose wa imwe wazamuchema mzengezgani wake kuti wize musi mwa khuni lake la mpheska na musi mwa khuni lake la mkuyu,” ndimo wayowoyera Yehova wa mawumba.+

Mazgu Ghamusi

Panji kuti, “mulandu wako.”
Panji kuti, “minjilira yakuzirwa.”
Panji kuti, “kupwelelera.”
Mazgu ghanyake, “Musofi.”