Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Yobu 6:1-30

IVYO VILI MU BUKU ILI

  • Yobu wakuzgora (1-30)

    • Wakuti wakuchita makora kudandawura (2-6)

    • Awo ŵakumusanguluska mbaryarya (15-18)

    • “Mazgu ghaunenesko ghakuŵinya yayi!” (25)

6  Yobu wakazgora kuti:   “Mphanyi vyakuŵinya vyane+ vyose vyapimika, Na kuŵikika pa sikelo pamoza na masoka ghane.   Pakuti ni vizito kuluska mchenga wa mu nyanja. Lekani mazgu ghane ghaŵa ghambura kwenelera.*+   Pakuti mivi ya Wankhongonozose yanilasa, Mzimu wane ukumwa poyizoni wake,+ Vyakofya vya Chiuta vyanozgeka kwimikana nane.   Kasi mbunda yamuthengere+ yikulira para yili na utheka, Panji kasi ng’ombe yanalume yikubonga* para yili na vyakurya?   Kasi chakurya chazuwulu chingaryeka kwambura mchere, Panji kasi mafira gha chakumera ghakunowa?   Vinthu vyanthena nakana* kuvikhwaska. Vili nga ni poyizoni mu chakurya chane.   Okwe, mphanyi napokera icho nalomba Ndipo mphanyi Chiuta wanipa icho nkhukhumba.   Mphanyi Chiuta wanibwanya, Mphanyi wanyoloska woko lake na kunikoma waka.+ 10  Pakuti ivi mphanyi vyangunipa chisangulusko, Mphanyi naduka na chimwemwe nangauli nkhupulika vyakuŵinya vyambura kumara, Pakuti nindakane mazgu gha Mutuŵa.+ 11  Kasi nili na nkhongono zakulindilira?+ Kasi umaliro wane ngwakuti wuli kuti nilutilire kuŵa wamoyo?* 12  Kasi nkhongono zane zikuyana na za jalawe? Panji thupi lane ndakupangika na mkuŵa? 13  Kasi pali nthowa yiliyose iyo ningajiwovwilira, Apo vyose ivyo vikunovwira vyachimbizgika kwa ine? 14  Waliyose uyo wakulongora chara lusungu* kwa munyake,+ Waleka kopa Wankhongonozose.+ 15  Ŵabali ŵane mbapusikizgi+ nga ni mlonga wa mu nyengo yakuzizima, Nga ni maji gha mu milonga ya mu nyengo yakuzizima, iyo yikomira. 16  Yikufipa chifukwa cha kukhoma, Ndipo ndimo mukubisama maji agho ghakusongonoka. 17  Kweni mu nyengo ya chihanya mukuŵavya maji, ghakumara, Para kwawotcha ghakukamuka. 18  Nthowa zake zikupatukana, Zikukhilira mu chipalamba na kuzgeŵelekera. 19  Ŵanthu ŵa ku Tema,+ awo ŵakwenda mu magulu, ŵakuyipenja, Ŵakwendakwenda ŵa ku Sheba*+ ŵakuyilindilira. 20  Ŵakhozgeka soni chifukwa ŵakagomezga chawaka, Ŵakwiza kura na kukhuŵalirako waka. 21  Pakuti umu ndimo namwe mwaŵira kwa ine,+ Mwawona kofya kwa soka lane, ndipo mukopa.+ 22  Kasi nayowoyapo kuti, ‘Nipani chinthu,’ Panji kumupemphani kuti munipelekere chawanangwa kufuma pa chuma chinu? 23  Kasi namulombanipo kuti munithaske ku woko la mulwani, Panji kuti niponoskeke* ku ŵankhaza? 24  Nisambizgani, ndipo nikhalenge chete,+ Novwirani kuti nipulikiske kubuda kwane. 25  Mazgu ghaunenesko ghakuŵinya yayi,+ Kweni kasi kuchenya kwinu kuli na chandulo wuli?+ 26  Kasi mukupangana kuchenya mazgu ghane, Ghakuyowoyeka na munthu wakuzingiziwa,+ agho ghakuputa na mphepo? 27  Mungachitaso mphenduzga* pa mwana mulanda,+ Na kuguliska* mubwezi winu.+ 28  Sono zgokani, laŵiskani kwa ine, Pakuti ningateta yayi pamaso pinu. 29  Nkhumuŵeyani, ghanaghaniraniposo, muleke kuneruzga mwambura kwenelera, Enya, ghanaghaniraniposo, pakuti urunji wane uchali nganganga. 30  Kasi lulimi lwane lukuyowoya kwambura urunji? Kasi mulomo wane ukumanya yayi icho ntchiheni?

Mazgu Ghamusi

Panji kuti, “ghawakawaka; ghaheni.”
Mazgu ghanyake, “yikubama.”
Panji kuti, “mtima wane ukukana.”
Panji kuti, “nilutilizge umoyo wane.”
Panji kuti, “chitemwa chakugomezgeka.”
Panji kuti, “Magulu ghakwendakwenda gha Ŵasabi.”
Mazgu gheneko, “niwombokwe.”
Panji kuti, “kusinthiska.”