Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Yobu 32:1-22

IVYO VILI MU BUKU ILI

  • Elihu, muchoko pa wose wakuyowoyapo (1-22)

    • Wakwiyira Yobu na ŵanyake (2, 3)

    • Wakalindilira chete pambere wandayowoyepo (6, 7)

    • Ulara pawekha ukuzgora munthu kuŵa wavinjeru yayi (9)

    • Elihu wanweka kuyowoyapo (18-20)

32  Ntheura ŵanalume ŵatatu aŵa ŵakaleka kumuzgora Yobu, chifukwa iyo wakakosera kuti ni murunji.*+  Kweni Elihu, mwana wa Barakeli Mubuzi+ wa mbumba ya Ramu, wakakwiya chomene. Ukali wake ukagolera pa Yobu chifukwa wakajizgora yekha murunji m’malo mwa Chiuta.+  Wakakwiyiraso chomene ŵanyake ŵa Yobu ŵatatu ŵara chifukwa ŵakatondeka kusanga zgoro, kweni ŵakanenanga Chiuta kuti ni muheni.+  Elihu wakalindiliranga kuti wazgore Yobu, chifukwa iwo ŵakaŵa ŵalara kuluska iyo.+  Elihu wakati wawona kuti ŵanalume ŵatatu ŵara ŵalije chakuzgora, ukali wake ukagolera.  Ntheura Elihu mwana wa Barakeli Mubuzi wakamba kuyowoya kuti: “Nili mwana muchoko, Imwe muli ŵalara,+ Ntheura nangumuchindikani, nangukhala chete,+ Nanguyezga na pachoko chara kumuphalirani ivyo nkhumanya.   Nanguti, ‘Lekani mazuŵa ghayowoye, Ndipo lekani vyaka vinandi vipharazge vinjeru.’   Kweni mzimu uwo uli mu ŵanthu, Mvuchi wa Wankhongonozose, ndiwo ukuŵawovwira kupulikiska tunthu.+   Ulara pawekha ukupanga* munthu kuŵa wavinjeru yayi, Ndipo mbachekuru pera chara awo ŵakumanya icho ntchakwenelera.+ 10  Ntheura nkhuti, ‘Tegherezgani kwa ine, Ndipo nane nimuphaliraninge ivyo nkhumanya.’ 11  Wonani! Nalindiliranga mazgu ghinu, Nategherezganga fundo zinu,+ Apo mwapenjanga vyakuti muyowoye.+ 12  Namutegherezganinge chomene, Kweni panguŵavya waliyose wa imwe uyo wangupanikizgira Yobu kuti ngwakwananga,* Panji kumuzgora pa ivyo wayowoyanga. 13  Ntheura lekani kuyowoya kuti, ‘Tasanga vinjeru. Chiuta ndiyo wakumususka, munthu chara.’ 14  Mazgu ghake ghanguŵa ghakwimikana na ine chara, Ntheura kuti nimuzgorenge kuyana na mazgu ghinu chara. 15  Iwo ŵachita wofi, mazgoro ghaŵamalira. Ŵalije chakuti ŵangayowoyaso. 16  Nalindilira, kweni ŵaleka kuyowoya. Ŵimilira waka apo, ŵakuzgoraso chara. 17  Ntheura nane nizgorenge, Nane niyowoyenge ivyo nkhumanya, 18  Pakuti nili na mazgu ghanandi, Mzimu uwo uli mwa ine ukunichichizga. 19  Mukati mwane muli nga ni vinyo ilo lilije pakufumira, Nga ni thumba liphya la vinyo ilo lili pafupi kuphumuka.+ 20  Nilekani niyowoye kuti nitune! Nijurenge milomo yane na kuzgora. 21  Nitemwerenge waliyose chara,+ Nesi kumyamyatika* munthu waliyose,* 22  Pakuti nkhumanya chara kumyamyatika munthu, Usange ningachita nthena, Mlengi wanganiparanya luŵiro.

Mazgu Ghamusi

Panji kuti, “wakaŵa murunji mu maso ghake.”
Panji kuti, “Mazuŵa ghanandi ghakuzgora munthu.”
Panji kuti, “wangumuchenya Yobu.”
Mazgu ghanyake, “kumbumbulika; kuphaka phula.”
Mazgu gheneko, “Nesi kumupa munthu zina lantchindi.”