Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Yesaya 64:1-12

IVYO VILI MU BUKU ILI

  • Lurombo lwa kung’anamuka mtima lwalutilira (1-12)

    • Yehova “Muwuvi withu” (8)

64  Muŵenge kuti mwapalura machanya pakati na kukhira, Mwakuti mapiri ghasunkhunyike chifukwa cha imwe,   Nga ni para moto ukotcha swatu, Ndipo moto ukugaduska maji, Apo ndipo mphanyi zina linu lamanyikwa ku ŵalwani ŵinu, Mphanyi mitundu yatenthema pamaso pinu.   Mukati mwachita vinthu vyakofya ivyo tikakhazganga chara,+ Mukakhira, ndipo mapiri ghakasunkhunyika pamaso pinu.+   Kufuma kale palije uyo wali kupulikapo panji kuthya khutu, Jiso lililose lindawonepo Chiuta munyake padera pa imwe, Uyo wakovwira awo ŵakumulindilira.+   Mwakumana nawo awo ŵakukondwa kuchita icho ntchakwenelera,+ Awo ŵakumukumbukani na kulondezga nthowa zinu. Wonani, mukakwiya, apo tikalutilira kunanga,+ Tikananga kwa nyengo yitali. Kasi sono tiponoskekenge?   Tose tazgoka nga ni munthu wakufipirwa, Milimo yithu yose yaubendezi yili nga ni denga.*+ Tose tifotenge nga ni hamba, Ndipo mphuvya zithu zitipyepyeturenge nga ni mphepo.   Palije uyo wakuchema pa zina linu, Palije uyo wakujiwuska kuti wademelere kwa imwe. Pakuti mwabisa chisko chinu kwa ise,+ Ndipo mukutighandiska* chifukwa cha* ubudi withu.   Kweni sono, A Yehova, ndimwe Dada withu.+ Tili dongo ise, ndipo imwe ndimwe Muwuvi withu.*+ Tose tili mulimo wa woko linu.   Mungatikwiyiranga chomene chara, A Yehova,+ Ndipo mungakumbukanga chara maubudi ghithu muyirayira. Tilaŵiskani, taŵeya, pakuti tose tili ŵanthu ŵinu. 10  Misumba yinu yituŵa yazgoka mapopa. Ziyoni wazgoka mapopa, Yerusalemu wazgoka charu chakupasuka.+ 11  Nyumba* yithu yituŵa na yauchindami,* Uko ŵasekuru ŵithu ŵakamulumbaninge, Yawotcheka na moto,+ Ndipo vinthu vyose ivyo tikakondwanga navyo ni vyakupasuka. 12  Pakuwona vyose ivi, kasi mulutilirenge kujikora, A Yehova? Kasi mukhalenge waka chete na kutileka tisuzgikenge nthena?+

Mazgu Ghamusi

“Denga,” nkhasalu ako mwanakazi wakuvwara para wali kumwezi.
Mazgu gheneko, “mukutisongonora.”
Mazgu gheneko, “na woko la.”
Panji kuti, “mukatiwumba.”
Panji kuti, “Tempile lithu.”
Panji kuti, “yakutowa.”