Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Baibolo la pa Intaneti | MALEMBA GHAKUPATULIKA MU MANG'ANAMULIRO GHA CHARU CHIPHYA

Yesaya 55:1-13

IVYO VILI MU BUKU ILI

  • Ŵakuchemeka kuti ŵarye na kumwa kwambura kulipira (1-5)

  •  Penjani Yehova na mazgu ghake ghakugomezgeka (6-13)

    • Nthowa za Chiuta ni zapachanya kuluska za ŵanthu (8, 9)

    • Mazgu gha Chiuta ghafiskikenge nadi (10, 11)

55  Zaninge, imwe mose ŵanyota,+ zani ku maji!+ Imwe mulije ndalama, zani mugure na kurya! Enya, zaninge, mugure vinyo na mkaka+ kwambura ndalama panji mtengo.+   Kasi mukupelekerachi ndalama pa icho ntchakurya yayi, Mukusakazirachi vinthu vinu* pa icho ntchambura kukhutiska? Tegherezgani chomene kwa ine, murye viwemi,+ Ndipo mukondwenge chomene na icho ntchakututuŵiska nadi.+   Thyani khutu, mwize kwa ine.+ Tegherezgani, ndipo muŵenge ŵamoyo, Nichitenge namwe phangano lamuyirayira+ Kuyana na lusungu* lwane kwa Davide, ulo ndwakugomezgeka.+   Wonani! Namuŵika kuŵa kaboni+ ku mitundu, Mudangiliri+ na mulongozgi+ ku ŵamitundu.   Wona, uzamuchema mtundu uwo ukuwumanya chara, Ndipo mtundu uwo ukukumanya chara uzamuchimbilira kwa iwe, Chifukwa cha Yehova Chiuta wako,+ Mutuŵa wa Israyeli, Pakuti wakupenge uchindami.+   Penjani Yehova, apo wachali kusangika.+ Chemani kwa iyo apo wachali pafupi.+   Wakwananga waleke nthowa yake+ Muheni maghanoghano ghake. Wawelere kwa Yehova, ndipo wamuchitirenge lusungu,+ Kwa Chiuta withu, chifukwa wamugowokerenge chomene.*+   “Pakuti maghanoghano ghane ni maghanoghano ghinu yayi,+ Nthowa zinu ni nthowa zane chara,” wakuti Yehova.   “Nga umo mtambo uliri pachanya kuluska charu chapasi, Ndimo nthowa zane ziliri pachanya kuluska nthowa zinu Maghanoghano ghane kuluska maghanoghano ghinu.+ 10  Pakuti nga umo vula na chiwuvi vikukhilira kufuma kuchanya, Vikuwelerako chara m’paka vinyeweske charu chapasi, kukuzga vipambi na mphukira, Kupeleka mbuto kwa wakuseŵa na chakurya kwa wakurya, 11  Ndimo ghaŵirenge mazgu ghane agho ghafuma mu mulomo wane.+ Ghawelerenge waka chara kwa ine,+ Kweni ghafiskenge nadi icho nkhukondwa nacho,*+ Ndipo icho naghatumira chichitikenge. 12  Pakuti mufumenge mwakukondwa,+ Muwelerenge mu mtende.+ Mapiri na tumapiri visangwenge pamaso pinu na chimwemwe,+ Ndipo makuni ghamuthondo ghakuŵenge mapi.+ 13  Umo mukaŵa minga muzamumera khuni la junipa,+ Umo mukaŵa nkhunga muzamumera khuni la hadasi. Ndipo ichi chizamwiza na lumbiri kwa* Yehova,+ Chimanyikwiro chamuyirayira icho chizamumara chara.”

Mazgu Ghamusi

Panji kuti, “ndalama izo mukusuzgikira kuzisanga.”
Panji kuti, “chitemwa chakugomezgeka.”
Panji kuti, “wagowokenge na mtima wose.”
Panji kuti, “khumbo lane.”
Panji kuti, “chizamupangira zina.”