Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Yesaya 5:1-30

IVYO VILI MU BUKU ILI

  • Sumu ya munda wa mpheska wa Yehova (1-7)

  • Masoka pa munda wa mpheska wa Yehova (8-24)

  • Ukali wa Chiuta pa ŵanthu ŵake (25-30)

5  Nimwimbirepo sumu wakutemweka wane Sumu ya wakutemweka wane na munda wake wa mpheska.+ Wakutemweka wane wakaŵa na munda wa mpheska mumphepete mwa kaphiri kavundira.   Wakagawura na kuwuskamo malibwe. Wakapanda mpheska ziwemi chomene, Wakazengamo chigongwe Na kujimamo chakukamiramo mpheska.+ Wakakhazganga kuti upambikenge mpheska ziwemi, Kweni ukapambika mpheska zakuthengere.+   “Imwe mukukhala mu Yerusalemu na imwe ŵanthu ŵa Yuda, Yeruzgani pakati pa ine na munda wane wa mpheska.+   Kasi mphanyi nawuchitiraso vichi munda wane wa mpheska Ivyo nindachite?+ Nkhakhazganga kuti upambikenge mpheska ziwemi, Kweni vyaŵa wuli kuti wapambika mpheska zakuthengere?   Sono lekani nimuphalirani Ivyo nichitirenge munda wane wa mpheska: Niwuskengeko ivyo naŵighilira munda wane, Na kuwuwotcha.+ Nibwangandurenge linga lake lamalibwe, Ndipo ukandilizgikenge pasi.   Niwuzgorenge mayiyi.+ Niwuphatilirenge yayi panji kuwulimilira. Mumelenge minga na vivwati,+ Ndipo nilangurenge mabingu kuti ghaleke kulokweskerapo vula.+   Pakuti munda wa mpheska wa Yehova wa mawumba ni nyumba ya Israyeli,+ Ŵanthu ŵa ku Yuda ni munda uwo wakawutemwanga. Wakagomezganga kuti muŵenge weruzgi wakunyoloka,+ Kweni weruzgi mukaŵavya. Wakagomezganga kuti muŵenge urunji, Kweni wonani, mukaŵa waka kulira.”+   Soka ku awo ŵakugumatiska nyumba ku nyumba yinyake,+ Na awo ŵakugumanya munda ku munda unyake+ M’paka malo ghose ghamare Ndipo imwe mukhale mwekha mu charu!   Yehova wa mawumba walapa mu makutu ghane Kuti nanga nyumba zinandi ziŵe zikuru na zakutowa, Ziŵenge chinthu chakutenthemeska ŵanthu, Zambura munthu kukhalamo.+ 10  Pakuti maekara 10 gha munda wa mpheska ghafumiskenge bati* yumoza, Ndipo mbuto zakukwana homeri* yumoza zifumiskenge efa* yumoza.+ 11  Soka kwa awo ŵakuwuka mulenjilenji kukamwa moŵa,+ Awo ŵakutchezera penepapo usiku wose m’paka ŵaloŵere na vinyo! 12  Ŵali na bango na vyakulizgira vyachingwe, Kang’oma, fyoliro, na vinyo pa viphikiro vyawo. Kweni ŵakuŵikako mahara yayi ku ntchito za Yehova, Ndipo ŵakuwona yayi mulimo wa mawoko ghake. 13  Ntheura ŵanthu ŵane ŵalutenge ku wuzga Chifukwa cha kuleka kumanya.+ Ŵanthu ŵawo ŵakuzirwa ŵaŵenge na njara,+ Ndipo ŵanthu ŵawo wose womirwenge na nyota. 14  Dindi* lasanuzgika Ndipo lajura mulomo wake pwankhu!+ Ŵakuchindikika ŵake, wumba wa ŵanthu ŵavyongo, na awo ŵakuzaya Ŵakhilirengemo nadi. 15  Munthu wakhizgikenge, Munthu wayuyulikenge, Ndipo maso gha wakujikuzga ghakhizgikenge. 16  Yehova wa mawumba wakwezgekenge mu kweruzga kwake. Chiuta waunenesko, Mutuŵa,+ wajituŵiskenge mu urunji.+ 17  Twana twa mberere twizenge na kurya umo twakhumbira. Ŵalendo ŵaryenge mu malo ghakupasuka agho vinyama vyakututuŵa vikaryangamo. 18  Soka ku awo ŵakuguza maubudi ghawo na vingwe vyaupusikizgi Kwananga kwawo na vingwe vyakuguzira gileta. 19  Awo ŵakuti: “Lekani wachite luŵiro mulimo wake. Wize luŵiro kuti tiwuwone. Khumbo* la Mutuŵa wa Israyeli lifiskike Kuti tilimanye.”+ 20  Soka ku awo ŵakuyowoya kuti uwemi ndiwo uheni, uheni ndiwo uwemi,+ Awo ŵakuŵika mdima mu malo gha ungweru, na ungweru mu malo gha mdima, Awo ŵakuŵika vyakuŵaŵa mu malo gha vyakunong’omera, na vyakunong’omera mu malo gha vyakuŵaŵa. 21  Soka ku awo ŵakujiwona kuti mbavinjeru Na ŵakuchenjera mu maso ghawo!+ 22  Soka ku awo mbankhongono pakumwa vinyo, Na awo ni nkhwantha pakusazga vyakumwa vyakuloŵezga,+ 23  Awo ŵakurunjiska muheni chifukwa cha chimbundi+ Na awo ŵakukana kuchitira urunji munthu murunji.+ 24  Ntheura nga umo chipundwe chikumyangulikira na lulimi lwa moto Utheka wakomira na dimi la moto, Misisi yawo yivundenge, Ndipo maluŵa ghawo ghachupukenge nga ni fuvu, Chifukwa ŵakana dango* la Yehova wa mawumba Ndipo ŵayuyura mazgu gha Mutuŵa wa Israyeli.+ 25  Lekani ukali wa Yehova ukugolera pa ŵanthu ŵake, Wanyoloskerenge woko lake pa iwo na kuŵamara.+ Mapiri ghasunkhunyikenge, Vitanda vyawo viŵenge nga ni viswaswa mu misewu.+ Pakuwona vyose ivi, ukali wake undawelere, Kweni woko lake lichali lakunyoloskeka kuti watimbe. 26  Wimika chimanyikwiro ku mtundu wakutali,+ Waŵalizgira kaluvi kuti ŵize kufuma ku vigoti vya charu.+ Wonani, ŵakwiza luŵiroluŵiro.+ 27  Palije uyo wavuka panji kukhuŵara pakati pawo. Palije uyo wakusiwa panji kugona. Lamba wa mu viwuno vyawo wandapwelemuke, Nanga ni nthambo za skapato zawo kudosoka. 28  Mivi yawo yose njakuthwa, Ndipo mauta ghawo ghose ngakupinda. Vikandiro vya mahachi ghawo vili nga ni libwe Na makhwiro ghawo nga ni mphepo.+ 29  Ŵakubangura nga ni nkhalamu. Ŵakubangura nga nthunkhalamu.+ Ŵakuwuluma na kukora nyama Ŵakuluta nayo kwambura munthu wakuyithaska. 30  Pa zuŵa ilo, ŵazamubangura pachanya pake Nga nkhupoma kwa nyanja.+ Waliyose uyo wakulaŵiska charu wazamuwona mdima ukuru. Ungweru nawo wazgoka mdima chifukwa cha mabingu.+

Mazgu Ghamusi

Panji kuti, “Sheole,” ndiko kuti, malaro. Wonani Mang’anamuro gha Mazgu.
Panji kuti, “Udumuliro wa; Fundo ya.”
Panji kuti, “chisambizgo cha.”