Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Yesaya 34:1-17

IVYO VILI MU BUKU ILI

  • Yehova wakuwezgera nduzga pa mitundu (1-8)

  • Edomu wazamuparanyika (9-17)

34  Zani pafupi mupulike, imwe ŵamitundu, Tegherezgani, imwe mwaŵanthu. Charu chapasi na vyose ivyo vilimo vipulike, Charu na vipambi vyake vyose.   Pakuti ukali wa Yehova uli pa ŵamitundu wose,+ Kutukutwa kwake kuli pa ŵankhondo ŵawo wose.+ Waŵaparanyirengethu, Na kuŵapeleka kuti ŵakomeke.+   Ŵakukomeka ŵawo ŵaponyekenge kuwaro, Kununkha kwa vitanda vyawo kukwerenge.+ Mapiri ghasongonokenge chifukwa cha* ndopa zawo.+   Mawumba ghose gha kuchanya ghavundenge, Machanya ghazingikenge nga ni mupukutu. Mawumba ghawo ghose ghafotenge, Ghaŵenge nga ni hamba lakomira ilo likulakata ku mpheska Na chikuyu chakufota icho chikuponthoka ku khuni la mkuyu.   “Pakuti lupanga lwane kuchanya lunyewenge.+ Lukhilirenge pa Edomu na kweruzga,+ Pa ŵanthu awo naŵapeleka kuti ŵaparanyikirethu.   Yehova wali na lupanga. Luŵenge na ndopa khachikhachi. Luŵenge na mafuta bwitubwitu,+ Na ndopa za twana twa mberere na mbuzi, Na mafuta gha ziso* za mberere. Pakuti Yehova wali na sembe mu Bozira, Kukoma kukuru mu charu cha Edomu.+   Ng’ombe zamuthondo nazo zikhilirengeko, Ng’ombe zichokozichoko pamoza na zankhongono. Charu chawo chinyewenge na ndopa, Dongo lawo liŵenge nabwinabwi na mafuta.”   Pakuti Yehova wali na zuŵa la nduzga,+ Chaka cha kuwezgera pa ivyo vyachitikira Ziyoni.+   Tumilonga twake* twa maji tuzgokenge phura, Dongo lake liŵenge sulefure. Ndipo charu chake chiŵenge nga ni phura ilo likugolera moto. 10  Usiku na muhanya uzimwikenge yayi. Josi lake litolokenge muyirayira. Waŵenge wakupasuka ku muwiro na muwiro. Palije uyo wazamujumphamo muyirayira swii.+ 11  Nyangenyange na chinungu vizamukhala mwa iyo, Ŵaphuluru ŵa makutu ghatali na ŵachaholi ŵazamuŵa mwenemumo. Wazamunyoloska pa iyo chingwe chakupimira chawakawaka, Na chingwe chakupimira cha kupasura. 12  Palije wakuchindikika wake uyo wazamuchemeka themba, Ŵakaronga ŵake wose ŵazamuŵa ŵawakawaka. 13  Minga zizamumera mu vigongwe vyake vyakukhora, Nkhunga na thondo laminga mu malinga ghake ghakukhora. Wazamuŵa malo ghakukhalamo ŵakambwe,+ Chipanga cha nthiŵatiŵa. 14  Vikoko vya mu chipalamba vizamukumana na vinyama vyakubangura, Ndipo mbuzi yamuthondo* yizamuchemerezga ku yinyake. Enya, bwabwalara wazamwiza na kusanga malo ghakupumulirapo. 15  Kwenekura njoka yizamuzengako chivwimbo chake na kutayira masumbi, Yizamukonkhomora twana na kutuwunjika mu mfwiri wake. Enya, vibaŵi vyamuwungana, chilichose na chanakazi chake. 16  Penjani mu buku la Yehova, muŵazge mwakukwezga: Palije uyo wazamusoŵamo, Palije icho chizamusoŵerwa chanakazi, Chifukwa mulomo wa Yehova walangura, Ndipo na mzimu wake waviwunjika pamoza. 17  Iyo ndiyo waŵachitira mphenduzga,* Woko lake laŵagaŵira malo na chingwe chakupimira. Ŵazamukhalamo nyengo zose. Ŵazamukhazikika mwenemumo mu miwiro yose.

Mazgu Ghamusi

Panji kuti, “ghasulurenge na.”
Mazgu ghanyake, “sana; figho.”
Ŵakwenera kuti ŵakunena Bozira, msumba ukuru wa Edomu.
Pangayowoyekaso kuti, “chiŵanda chakukozgana na mbuzi.”