Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Yeremiya 41:1-18

IVYO VILI MU BUKU ILI

  • Ishimayeli wakoma Gedaliya (1-10)

  • Ishimayeli wachimbizgika na Yohanani (11-18)

41  Mu mwezi wa 7, Ishimayeli+ mwana wa Netaniya mwana wa Elishama, uyo wakaŵa wa mphapu yachifumu kweniso yumoza wa ŵanalume ŵakuzirwa ŵa themba, wakiza na ŵanalume ŵanyake 10 ku Mizipa+ kwa Gedaliya mwana wa Ahikamu. Apo ŵakaryanga chakurya pamoza mu Mizipa,  Ishimayeli mwana wa Netaniya na ŵanalume 10 awo wakaŵa nawo wakawuka na kuheta na lupanga Gedaliya mwana wa Ahikamu mwana wa Shafani. Ntheura wakakoma munthu uyo themba la Babuloni likamwimika pa charu.  Ishimayeli wakakomaso Ŵayuda wose awo ŵakaŵa na Gedaliya ku Mizipa, kweniso ŵasilikari ŵa Ŵakalidi awo ŵakaŵa kwenekura.  Zuŵa lachiŵiri Gedaliya wakati wakomeka, pambere waliyose wandamanye,  kukiza ŵanthu 80 kufuma ku Shekemu,+ Shilo,+ na Samariya.+ Mwembe wawo ukaŵa wakumeteka, vyakuvwara vyawo vyakupaluka, ŵakajicheka,+ ndipo mu mawoko ghawo ŵakayegha sembe za vyamuminda na lubani+ kwiza navyo ku nyumba ya Yehova.  Ntheura Ishimayeli mwana wa Netaniya wakafuma mu Mizipa kukakumana nawo, wakulira uku wakwenda. Wakati wakumana nawo, wakati kwa iwo: “Fikani kwa Gedaliya mwana wa Ahikamu.”  Kweni ŵakati ŵanjira mu msumba, Ishimayeli mwana wa Netaniya na ŵanthu ŵake ŵakaŵakoma na kuŵaponya mu chikhululu.  Kweni pakaŵa ŵanalume 10 pakati pawo awo ŵakati kwa Ishimayeli: “Ungatikomanga yayi, pakuti tili na nthamba zakubisika za tirigu, balere, mafuta, na uchi mu thondo.” Ntheura wakaleka kuŵakoma pamoza na ŵabali ŵawo.  Ishimayeli wakaponya vitanda vya ŵanthu awo wakakoma mu chikhululu chikuru, icho Themba Asa likajima chifukwa cha kopa Basha themba la Israyeli.+ Chikhululu ichi ndicho Ishimayeli mwana wa Netaniya wakazuzgamo ŵanthu ŵakukomeka. 10  Penepapo Ishimayeli wakakora ŵanthu wose awo ŵakakhalapo mu Mizipa,+ na ŵana ŵasungwana ŵa themba na ŵanthu wose awo ŵakasidika mu Mizipa, awo Nebuzaradani mulara wa ŵalinda wakaŵaleka mu mawoko gha Gedaliya+ mwana wa Ahikamu. Ntheura Ishimayeli mwana wa Netaniya wakatora ŵazga aŵa na kwambukira nawo ku Ŵaamoni.+ 11  Yohanani+ mwana wa Kareya na ŵalongozgi wose ŵa nkhondo awo ŵakaŵa nayo ŵakapulika viheni vyose ivyo Ishimayeli mwana wa Netaniya wakachita. 12  Ntheura ŵakatora ŵanalume wose, ŵakaluta kukarwa na Ishimayeli mwana wa Netaniya, ndipo ŵakamusanga mumphepete mwa maji ghanandi* mu Gibiyoni. 13  Ŵanthu wose awo ŵakaŵa na Ishimayeli ŵakati ŵawona Yohanani mwana wa Kareya na ŵalongozgi wose ŵa nkhondo, ŵakasekelera. 14  Penepapo ŵanthu wose awo Ishimayeli wakaŵakora ku Mizipa+ ŵakazgoka na kuwelera na Yohanani mwana wa Kareya. 15  Kweni Ishimayeli mwana wa Netaniya na ŵanthu ŵake 8 ŵakachimbira kwa Yohanani, ndipo ŵakaluta ku Ŵaamoni. 16  Yohanani mwana wa Kareya na ŵalongozgi wose ŵa nkhondo awo ŵakaŵa nayo ŵakatora ŵanthu ŵakufuma ku Mizipa ŵara, awo ŵakaŵathaska kwa Ishimayeli mwana wa Netaniya, pamanyuma pakuti wakoma Gedaliya+ mwana wa Ahikamu. Ŵakawerako nawo ku Gibiyoni ŵanalume, ŵasilikari, ŵanakazi, ŵana, na ŵantchito ŵa themba. 17  Ntheura ŵakaluta na kukhala pa malo ghakupumulirapo gha Kimuhamu kufupi na Betelehemu,+ ŵakakhumbanga kuluta ku Eguputo+ 18  chifukwa cha kopa Ŵakalidi. Ŵakaŵawopanga chifukwa chakuti Ishimayeli mwana wa Netaniya wakakoma Gedaliya mwana wa Ahikamu, uyo themba la Babuloni likamwimika pa charu.+

Mazgu Ghamusi

Pangayowoyekaso kuti, “chiziŵa chikuru.”