Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Yeremiya 34:1-22

IVYO VILI MU BUKU ILI

  • Uthenga wa cheruzgo kwa Zedekiya (1-7)

  • Ŵaswa phangano la kufwatura ŵazga (8-22)

34  Mazgu agho ghakiza kwa Yeremiya kufuma kwa Yehova, apo Nebukadinezara* themba la Babuloni na viwuru vyake vyose, maufumu ghose gha charu chapasi agho ghakaŵa pasi pa iyo kweniso ŵanthu wose, ŵakarwanga nkhondo na Yerusalemu na misumba yake yose,+ ghakuti:  “Yehova Chiuta wa Israyeli wakuti: ‘Luta ukayowoye na Zedekiya+ themba la Yuda, ukamuphalire kuti: “Yehova wakuti: ‘Wona, nkhupeleka msumba uwu mu woko la themba la Babuloni, ndipo liwuwotchenge na moto.+  Iwe uponenge chara mu woko lake, pakuti ukolekenge nadi na kupelekeka kwa iyo.+ Wamuwonana na themba la Babuloni maso na maso, ndipo lamuyowoya nawe mulomo na mulomo, ulutenge ku Babuloni.’+  Kweni pulika mazgu gha Yehova, iwe Zedekiya themba la Yuda, ‘Yehova wakuti vya iwe: “Ufwenge chara na lupanga.  Ufwenge mu mtende,+ ndipo ŵakuwotcherenge vyakununkhira nga umo ŵakachitira ku ŵawuso, mathemba agho ghakaŵako iwe undaŵeko, ndipo ŵakutengerenge kuti: ‘Mbaya mwe, fumu!’ pakuti ‘ndine nayowoya mazgu agha,’ wakuti Yehova.”’”’”  Ntheura Yeremiya ntchimi wakayowoya mazgu ghose agha kwa Zedekiya themba la Yuda mu Yerusalemu.  Pa nyengo yira, ŵankhondo ŵa themba la Babuloni ŵakarwanga na Yerusalemu na misumba yose ya Yuda iyo yikakhalapo,+ kweniso Lakishi+ na Azeka.+ Pakuti ndiyo yekha misumba ya malinga ghakukhora iyo yikakhalapo pa misumba ya Yuda.  Mazgu agho ghakiza kwa Yeremiya kufuma kwa Yehova, apo Themba Zedekiya likachita phangano na ŵanthu wose mu Yerusalemu kupharazga wanangwa kwa iwo,+  kuti waliyose wafwature ŵazga ŵake, ŵanalume na ŵanakazi, awo Mbahebere, mwakuti paŵavye munthu wasunge Muyuda munyake nga ni muzga wake. 10  Ntheura ŵakaronga wose na ŵanthu wose ŵakapulikira. Ŵakanjira mu phangano kuti waliyose wafwature ŵazga ŵake ŵanalume na ŵanakazi, ŵangaŵasungangaso nga mbazga yayi. Ŵakapulikira na kuŵaleka kuti ŵalutenge. 11  Kweni pamanyuma ŵakatoraso ŵazga ŵanalume na ŵanakazi awo ŵakaŵafwatura, ndipo ŵakaŵanjizgaso mu wuzga. 12  Ntheura mazgu gha Yehova ghakiza kwa Yeremiya kufuma kwa Yehova kuti: 13  “Yehova Chiuta wa Israyeli wakuti: ‘Nkhachita phangano na ŵasekuru ŵinu+ mu zuŵa ilo nkhaŵafumiskira mu charu cha Eguputo, mu nyumba ya wuzga,+ lakuti: 14  “Paumaliro wa vyaka 7, waliyose wa imwe wafwaturenge mubali wake Muhebere uyo wakaguliskika kwa imwe ndipo wamuteŵeterani vyaka 6. Mumufwaturenge.”+ Kweni ŵasekuru ŵinu ŵakapulika chara nanga nkhuthya khutu lawo kwa ine. 15  Sonosono apa,* imwe mukazgoka na kuchita icho ntchakwenelera mu maso ghane, mukapharazga wanangwa ku ŵanyinu, ndipo mukachita phangano pamaso pane mu nyumba iyo yikuchemeka na zina lane. 16  Kweni mwazgokaso na kunanga zina lane,+ mwatoraso ŵazga ŵinu ŵanalume na ŵanakazi, awo mukaŵafwatura kuyana na khumbo lawo, ndipo mukuŵanjizgaso mu wuzga.’ 17  “Ntheura Yehova wakuti: ‘Mundanipulikire pakupharazga wanangwa, waliyose kwa mubali wake na kwa munyake.+ Sono nipharazgenge wanangwa kwa imwe,’ wakuti Yehova, ‘ku lupanga, nthenda yakofya, njara,+ ndipo nimuzgoraninge chinthu chakutenthemeska ku maufumu ghose gha charu chapasi.+ 18  Ichi ndicho chichitikirenge awo ŵajumpha phangano lane pakuleka kufiska mazgu gha phangano ilo ŵakachita pamaso pane apo ŵakadumura katholi pakati na kujumpha pakati pa vipitika vyake.+ 19  Nkhunena ŵakaronga ŵa Yuda, ŵakaronga ŵa Yerusalemu, ŵantchito ŵa themba, ŵasembe, na ŵanthu wose ŵa mu charu awo ŵakajumpha pakati pa vipitika vya tholi, nkhuti: 20  Niŵapelekenge ku ŵalwani ŵawo na ku awo ŵakupenja umoyo wawo. Vitanda vyawo viŵenge vyakurya vya viyuni vyamudera na vikoko vya pa charu.+ 21  Nipelekenge Zedekiya themba la Yuda na ŵakaronga ŵake mu woko la ŵalwani ŵawo na mu woko la awo ŵakupenja umoyo wawo, na mu woko la ŵankhondo ŵa themba la Babuloni,+ awo ŵakufumako kwa imwe.’+ 22  “Yehova wakuti: ‘Wonani, nipelekenge dango, niŵawezgerenge ku msumba uwu, ndipo ŵarwenge nawo na kuwupoka, ŵawuwotchenge na moto.+ Ndipo nizgorenge misumba ya Yuda kuŵa yakupasuka, kwambura wakukhalamo.’”+

Mazgu Ghamusi

Wakulembekaso kuti, Nebukadirezara.
Mazgu gheneko, “Muhanya uno.”