Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Yeremiya 3:1-25

IVYO VILI MU BUKU ILI

  • Uchigaluka wa Israyeli wakura chomene (1-5)

  • Israyeli na Yuda ŵali na mulandu wa uleŵi (6-11)

  • Ŵaphalirika kuti ŵawereko ku uheni (12-25)

3  Ŵanthu ŵakufumba kuti: “Usange mwanalume wawezga muwoli wake, ndipo muwoli wake wamuleka na kukatengwa kwa mwanalume munyake, kasi mwanalume wakwamba yura wangaweleraso kwa mwanakazi uyu?” Asi ndikuti charu chira chakazuzgika chomene?+ “Wachita uhule na vibwezi vinandi,+ Kasi sono ukuweleraso kwa ine?” wakuti Yehova.   “Yinuskira maso ghako ku tumapiri twambura kanthu, uwone. Ni malo nga agho ŵandakukolelerepo? Ukaŵakhazganga mu nthowa, Nga ni munthu wakwendendeka* mu mapopa. Ukukazuzga charu Na uhule wako kweniso uheni wako.+   Ntheura vula yakanizgika kulokwa, Ndipo kulije vula yaumaliro.+ Ukuwoneka wambura kupwelerako* nga ni mwanakazi uyo wakuchita uhule, Ukukana kuŵa na soni.+   Sono ukuchema kwa ine kuti: ‘Adada, ndimwe mubwezi wane wapamtima kwamba pa uwukirano wane.+   Kasi munthu wasungenge chakusingo kwamuyirayira Panji kuŵa na chimbimbiza nyengo zose?’ Ndivyo iwe ukuyowoya, Kweni ukuchita uheni uliwose umo wamweneko wakhumbira.”+  Mu mazuŵa gha Themba Yosiya,+ Yehova wakati kwa ine: “‘Kasi wawona ivyo Israyeli wambura kugomezgeka wachita? Wakuluta pachanya pa phiri lililose na musi mwa khuni lililose lakuvwinthuka kuchita uhule.+  Nanga ni apo wakachitanga vyose ivi, nkhamuphalira nipera kuti wawelere kwa ine,+ kweni wakawelera yayi. Yuda wakamuwonanga waka mukuru wake muryarya.+  Nkhati nawona ivi, nkhamuwezga Israyeli wambura kugomezgeka, nkhamupa kalata yachipati+ chifukwa cha uleŵi wake.+ Kweni Yuda munung’una wake muryarya wakachita wofi yayi. Nayo wakaluta kukachita uhule.+  Uhule wake wakuwutora mwakupepuka, ndipo wakalutilira kukazuzga charu na kuchita uleŵi na malibwe kweniso makuni.+ 10  Pa vyose ivi, munung’una wake muryarya Yuda wakawelera na mtima wake wose yayi kwa ine, wakatetezgeranga waka,’ wakuti Yehova.” 11  Penepapo Yehova wakati kwa ine: “Israyeli wambura kugomezgeka walongora kuti ni murunjiko kuluska Yuda muryarya.+ 12  Luta ukapharazge mazgu agha kumpoto:+ “‘“Welera, iwe Israyeli wakugaluka,” wakuti Yehova.’+ ‘“Nikulaŵiskenge na chisko chaukali yayi,*+ pakuti ndine wakugomezgeka,” wakuti Yehova.’ ‘“Nisungenge chakusingo kwamuyirayira yayi. 13  Kweni uzomere waka mulandu wako, pakuti wagalukira Yehova Chiuta wako. Ukalutilira kupelekera uwemi* wako ku ŵalendo* musi mwa khuni lililose lakuvwinthuka, ukapulikira yayi mazgu ghane,” wakuti Yehova.’” 14  “Welerani, imwe ŵana ŵakugaluka,” wakuti Yehova. “Pakuti naŵa fumu* yinu yeneko. Nimutoraninge, yumoza kufuma mu msumba, ŵaŵiri kufuma pa mbumba, ndipo nimutoleraninge ku Ziyoni.+ 15  Nizamumupani ŵaliska awo mtima wane+ ukukondwa nawo, ndipo ŵazamumuliskani na umanyi kweniso mahara. 16  Mu mazuŵa agho, muzamwandana na kupambika chipambi mu charu,” wakuti Yehova.+ “Ŵazamuyowoyaso yayi kuti, ‘Likasa la phangano la Yehova!’ Lizamwizaso yayi mu mtima, kulikumbuka panji kulidoka, ndipo lizamupangikaso yayi. 17  Pa nyengo iyo, ŵazamuchema Yerusalemu chitengo cha Yehova.+ Ndipo mitundu yose yizamuwunganyika ku zina la Yehova ku Yerusalemu.+ Yizamuchitaso mtafu yayi, kulondezga mtima wawo uheni.” 18  “Mu mazuŵa agho, ŵazamwenda pamoza, nyumba ya Yuda pamoza na nyumba ya Israyeli,+ ndipo wose pamoza ŵazamufuma ku charu cha kumpoto kuya ku charu icho nkhapeleka ku ŵasekuru ŵinu kuŵa chiharo.+ 19  Mu mtima nkhati: ‘Nkhamuŵikani mukati mwa ŵana na kumupani charu chiwemi, chiharo chakutowa chomene mu ŵamitundu.*+ Nkhaghanaghanangaso kuti munichemenge kuti: “Adada,” ndipo mulekenge yayi kunilondezga. 20  Nadi, nga ni mwanakazi uyo wakuleka mfumu wake* mwauryarya, ndimo imwe nyumba ya Israyeli mwachitira mwauryarya na ine,’+ wakuti Yehova.” 21  Pa tumapiri twambura kanthu pakupulikikwa mazgu, Kulira na kuŵeyelera kwa Ŵaisrayeli, Pakuti ŵabendezga nthowa zawo. Ŵaluwa Yehova Chiuta wawo.+ 22  “Welerani, imwe ŵana ŵakugaluka. Nichizgenge uchigaluka winu.”+ “Wonani! Tiza kwa imwe, Pakuti imwe, A Yehova, ndimwe Chiuta withu.+ 23  Nadi, tumapiri na kupoma pa mapiri mbutesi pera.+ Yehova Chiuta withu ndiyo ntchiponosko cha Israyeli.+ 24  Kweni chinthu chakukhozga soni* chamara mulimo wa ŵasekuru ŵithu kwamba pa uwukirano withu,+ Mberere zawo na ng’ombe zawo, Ŵana ŵawo ŵanalume na ŵanakazi. 25  Tiyeni tigone pasi na kulengeskeka kwithu, Soni zithu zitibenekelere, Pakuti tanangira Yehova Chiuta withu,+ Ise na ŵadada ŵithu kwamba pa uwukirano withu m’paka zuŵa ili,+ Tindapulikire mazgu gha Yehova Chiuta withu.”

Mazgu Ghamusi

Mazgu gheneko, “Nga ni Muarebiya.”
Mazgu gheneko, “Chisko chako chili.”
Mazgu gheneko, “Nikuwiskirenge chisko chane yayi.”
Mazgu gheneko, “nthowa zako.”
Panji kuti, “ŵachiuta ŵachilendo.”
Pangayowoyekaso kuti, “mfumu winu.”
Mazgu gheneko, “mawumba gha ŵamitundu.”
Panji kuti, “munyake.”
Panji kuti, “chiuta wakukhozga soni.”