Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Yeremiya 15:1-21

IVYO VILI MU BUKU ILI

  • Yehova wasinthenge yayi cheruzgo chake (1-9)

  • Yeremiya wakudandawura (10)

  • Yehova wazgora (11-14)

  • Lurombo lwa Yeremiya (15-18)

    • Wakukondwa chifukwa cha kurya mazgu gha Chiuta (16)

  • Yeremiya wasanga nkhongono mwa Yehova (19-21)

15  Penepapo Yehova wakati kwa ine: “Nanga Mozesi na Samuyeli ŵangimilira pamaso pane,+ ningaŵachitira lusungu yayi ŵanthu aŵa. Uŵachimbizgepo pamaso pane. Uŵaleke ŵalutenge.  Usange ŵakuti kwa iwe: ‘Kasi tilutenge nkhu?’ iwe uŵaphalire kuti: ‘Yehova wakuti: “Yose uyo ngwakuti wafwenge na nthenda yakofya, walute ku nthenda yakofya. Yose uyo ngwakuti wafwenge na lupanga, walute ku lupanga.+ Yose uyo ngwakuti wafwenge na njara, walute ku njara. Ndipo yose uyo ngwakuti watolekerenge ku wuzga, walute ku wuzga.”’+  “‘Nitumenge pa iwo masoka ghanayi,’*+ wakuti Yehova, ‘lupanga kuti lukome, ntcheŵe kuti ziguguze, viyuni vyamudera, na vikoko vya pa charu kuti virye na kuparanya.+  Ndipo niŵazgorenge chinthu chakutenthemeska ku maufumu ghose gha pa charu chapasi+ chifukwa cha Manase mwana wa Hezekiya, themba la Yuda, chifukwa cha ivyo wakachita mu Yerusalemu.+   Ni njani wakulongorenge chiwuravi, iwe Yerusalemu, Ni njani wakulengerenge chitima, Ndipo ni njani wimilirenge kuti wafumbe vya umoyo wako?’   Yehova wakuti: ‘Wanigwentha.+ Ukulutilira kunilazgira nkhonyoro.*+ Ntheura ninyoloskenge woko lane pa iwe na kukuparanya.+ Navuka kukuchitira chitima.   Niŵawuluskenge na chifoloko mu vipata vya charu. Niŵapokenge ŵana ŵawo.+ Niparanyenge ŵanthu ŵane, Pakuti ŵakukana kuwerako ku nthowa zawo.+   Vyokoro vyawo viŵenge vinandi chomene pamaso pane kuluska mchenga wa mu nyanja. Nizenge na wakuparanya pa iwo muhanya pakati, kulimbana na ŵanyinawo na ŵawukirano. Nikhizgirenge chitimbaheti na chitenthe pa iwo mwamabuchi.   Mwanakazi uyo wakababa ŵana 7 wazinduka. Wali waka thatithati.* Dazi lake lanjira uku kuchali muhanya, Kulengeska na kukhozga soni.’* ‘Ŵachoko waka awo ŵakhalapo pa iwo Niŵapelekenge ku lupanga panthazi pa ŵalwani ŵawo,’ wakuti Yehova.”+ 10  Awe ine amama, chifukwa mukanibaba,+ Namunthu wakusangana na mbembe na mphindano mu charu chose. Nindabwerekeskepo munthu panji kubwereka, Kweni wose ŵakunitemba. 11  Yehova wakati: “Nimuteŵeteraninge nadi pa viwemi. Nimovwiraninge mu nyengo ya soka, Mu nyengo ya suzgo, kwimikana na mulwani. 12  Kasi munthu wangaswa chisulo, Chisulo chakufuma kumpoto, na mkuŵa? 13  Vyuma vinu na usambazi winu nivipelekenge kuŵa vinthu vyakupokeka,+ Kuti nisangirepo ndalama yayi, kweni chifukwa cha zakwananga zinu zose mu vigaŵa vinu vyose. 14  Nivipelekenge ku ŵalwani ŵinu Kuti ŵalute navyo ku charu icho mukuchimanya yayi.+ Pakuti moto wapembeka na ukali wane, Ndipo ukugolera pa imwe.”+ 15  A Yehova, imwe mukumanya, Nikumbukani na kulazgira kwa ine. Niwezgerani nduzga pa awo ŵakunitambuzga.+ Chifukwa chakuti mukukalipa luŵiro chara, mungazomerezganga yayi kuti niparanyike.* Manyani kuti msinjiro uwu wanisanga chifukwa cha imwe.+ 16  Mazgu ghinu ghakasangika, ndipo nkhagharya,+ Mazgu ghinu ghakazgoka kwa ine chimwemwe na kusekelera mu mtima wane, Pakuti nkhuchemeka na zina linu, A Yehova Chiuta wa mawumba. 17  Nkhukhala chara pamoza na ŵanthu ŵamilangwe na kusekelera.+ Chifukwa woko linu lili pa ine, nkhukhala panekha, Pakuti mwanizuzga na ukali.*+ 18  Chifukwa wuli vyakuŵinya vyane vikumara yayi panji chilonda chane kupora? Chikukana kuchizgika. Kasi muŵenge nga ni mlonga wautesi kwa ine Uwo munthu wangawugomezga yayi? 19  Ntheura Yehova wakuti: “Usange uwelerenge, nikuwezgerenge pakale, Ndipo wimilirenge pamaso pane. Usange ukupatura icho ntchakuzirwa ku vyawakawaka, Uŵenge nga ni mulomo wane.* Ŵazgokerenge kwa iwe, Kweni iwe uzgokerengeko yayi kwa iwo.” 20  “Nkhukuzgora iwe chiliŵa chakukhora chamkuŵa ku ŵanthu aŵa.+ Ŵalimbanenge nawe nadi, Kweni ŵakuluskenge yayi,*+ Pakuti ine nili nawe, kukuponoska na kukuthaska,” wakuti Yehova. 21  “Nikuthaskenge mu woko la muheni Na kukuwombora ku woko la munthu wankhaza.”

Mazgu Ghamusi

Pangayowoyekaso kuti, “vyeruzgo vinayi.” Mazgu gheneko, “mbumba zinayi.”
Pangayowoyekaso kuti, “Ukulutilira kwenda chafutanyuma.”
Mazgu ghanyake, “thutusithutusi.”
Pangayowoyekaso kuti, “Lakhozgeka soni na kulengeskeka.”
Mazgu gheneko, “munganifumiskangapo yayi.”
Panji kuti, “uthenga wa cheruzgo.”
Panji kuti, “Uŵenge muyowoyeri wane.”
Panji kuti, “ŵakuthereskenge yayi.”