Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Baibolo la pa Intaneti | MALEMBA GHAKUPATULIKA MU MANG'ANAMULIRO GHA CHARU CHIPHYA

Mateyu 1:1-25

IVYO VILI MU BUKU ILI

  • Mdauko wa Yesu Khristu (1-17)

  • Kubabika kwa Yesu (18-25)

1  Buku la mdauko* wa Yesu Khristu,* mwana wa Davide,+ mwana wa Abrahamu.+   Abrahamu wakababa Yisake.+ Yisake wakababa Yakhobe.+ Yakhobe wakababa Yuda+ na ŵana ŵanyake ŵanalume.   Yuda wakababa Perezi na Zera+ mwa Tamara. Perezi wakababa Hezironi.+ Hezironi wakababa Ramu.+   Ramu wakababa Aminadabu. Aminadabu wakababa Nashoni.+ Nashoni wakababa Salimoni.   Salimoni wakababa Bowazi mwa Rahabi.+ Bowazi wakababa Obedi mwa Rute.+ Obedi wakababa Yese.+   Yese wakababa Themba Davide.+ Davide wakababa Solomoni+ mwa muwoli wa Uriya.   Solomoni wakababa Rehobowamu.+ Rehobowamu wakababa Abiya. Abiya wakababa Asa.+   Asa wakababa Yehoshafati.+ Yehoshafati wakababa Yehoramu.+ Yehoramu wakababa Uziya.   Uziya wakababa Yotamu.+ Yotamu wakababa Ahazi.+ Ahazi wakababa Hezekiya.+ 10  Hezekiya wakababa Manase.+ Manase wakababa Amoni.+ Amoni wakababa Yosiya.+ 11  Yosiya+ wakababa Yekoniya+ na ŵana ŵanyake ŵanalume pa nyengo iyo ŵakatolekera ku Babuloni.+ 12  Pamanyuma pa kutolekera ku Babuloni, Yekoniya wakababa Shalatiyeli. Shalatiyeli wakababa Zerubabeli.+ 13  Zerubabeli wakababa Abiyudi. Abiyudi wakababa Eliyakimu. Eliyakimu wakababa Azoro. 14  Azoro wakababa Zadoki. Zadoki wakababa Akimu. Akimu wakababa Eliyudi. 15  Eliyudi wakababa Eliyazara. Eliyazara wakababa Mathani. Mathani wakababa Yakhobe. 16  Yakhobe wakababa Yosefe mfumu wa Mariya, uyo wakababa Yesu,+ uyo wakuchemeka Khristu.+ 17  Miwiro yose kufuma pa Abrahamu m’paka pa Davide yikaŵa 14. Kufuma pa Davide m’paka pa nyengo iyo ŵakatolekera ku Babuloni pakaŵa miwiro 14. Kufuma pa nyengo iyo ŵakatolekera ku Babuloni kuzakafika pa nyengo ya Khristu, pakaŵa miwiro 14. 18  Kubabika kwa Yesu Khristu kukaŵa ntheura: Mariya, nyina wa Yesu, wakalayizgika nthengwa na Yosefe, kweni pambere ŵandatorane, wakasangika kuti wali na nthumbo mu nkhongono ya mzimu utuŵa.*+ 19  Ndipouli, chifukwa chakuti Yosefe, mfumu wake, wakaŵa murunji ndipo wakakhumba chara kumukhozga soni, wakakhumbanga kumuleka waka mwachisisi.+ 20  Kweni wakati waghanaghanirapo vinthu ivi, wonani! mungelo wa Yehova* wakawonekera kwa iyo mu loto, wakati: “Yosefe, mwana wa Davide, kopa chara kutolera muwoli wako Mariya ku nyumba, pakuti nthumbo iyo wali nayo nja mzimu utuŵa.+ 21  Wababenge mwana mwanalume, ndipo zina lake uzakamuthye Yesu,*+ chifukwa wazamuponoska ŵanthu ŵake ku zakwananga zawo.”+ 22  Vyose ivi vikachitika kuti ghafiskike mazgu agho Yehova* wakayowoya kwizira mu ntchimi yake, kuti: 23  “Wona! Mwali waŵenge na nthumbo ndipo wababenge mwana mwanalume, ndipo zina lake ŵamuthyenge Emanuwelu,”+ ilo likung’anamura kuti, “Chiuta Wali Nase.”+ 24  Penepapo Yosefe wakawuka mu tulo twake, wakachita nga umo mungelo wa Yehova* wakamuphalilira. Wakamutolera ku nyumba muwoli wake. 25  Kweni wakagona nayo chara m’paka apo wakababira mwana mwanalume,+ ndipo wakamuthya Yesu.+

Mazgu Ghamusi

Panji kuti, “mukoka.”
Panji kuti, “Mesiya; Wakuphakazgika.”
Panji kuti, “nkhongono yakugwira ntchito.”
Mu Baibolo ili, kwamba pa Mateyu m’paka Chivumbuzi, zina la Chiuta lakuti Yehova likusangika mu malo 237. Apa mphamalo ghakwamba. Wonani Vyakusazgirapo A5.
Likuyana na zina Lachihebere lakuti Yeshuwa, panji kuti, Joshuwa, ilo likung’anamura kuti, “Yehova Ntchiponosko.”