Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Baibolo la pa Intaneti | MALEMBA GHAKUPATULIKA MU MANG'ANAMULIRO GHA CHARU CHIPHYA

Masalimo 90:1-17

IVYO VILI MU BUKU ILI

  • Chiuta ngwamuyirayira, munthu umoyo wake ngufupi

    • Vyaka 1,000 vikuŵa nga ni mayiro (4)

    • Munthu wakukhala vyaka 70-80 (10)

    • “Tisambizgani kupenda mazuŵa ghithu” (12)

Lurombo lwa Mozesi, munthu wa Chiuta waunenesko.+ 90  A Yehova, mwaŵa malo ghithu ghakukhalamo*+ mu miwiro yose.   Pambere mapiri ghandababike, Muchali mundanozge charu chapasi na vundira yake,+ Ndimwe Chiuta kufuma muyirayira m’paka muyirayira.+   Mukuwezgera munthu ku fuvu, Mukuti: “Welerani ku fuvu, imwe ŵana ŵa ŵanthu.”+   Pakuti kwa imwe, vyaka 1,000 vikuŵa nga ni mayiro,+ Nga ni ulinda wa usiku.   Mukuŵapyepyetulira kutali.+ Ŵakuŵa nga ni tulo waka. Mulenji ŵakuŵa nga ni utheka uwo ukuphuka.+   Mulenji ukutikitira na kuweleramo, Kweni mise ukufota na komira.+   Pakuti tikumyangulika na ukali winu,+ Tikofyeka na kutukutwa kwinu.   Mukuŵika maubudi ghithu pamaso pinu.*+ Ivyo tikuchita ku ubende vikuvumbulika na ungweru wa chisko chinu.+   Mazuŵa ghithu ghakumara* chifukwa cha kutukutwa kwinu. Vyaka vithu vikumara nga ni para munthu wakukhizga mtima. 10  Vyaka vya umoyo withu ni 70, Panji 80,+ usange munthu wali na nkhongono zapadera, Kweni ni vyakuzura na masuzgo na vitima. Vikujumpha mwaluŵiro, ndipo tikumwalalikira.+ 11  Ni njani wangamanya nkhongono ya ukali winu? Kutukutwa kwinu nkhukuru nga ni wofi uwo ukumwenelerani.+ 12  Tisambizgani kupenda mazuŵa ghithu+ Kuti tisange mtima wavinjeru. 13  Welerani, A Yehova.+ Kasi ivi viŵengeko m’paka pawuli?+ Chitirani chitima ŵateŵeti ŵinu.+ 14  Mulenji mutikhorweske na lusungu* lwinu,+ Mwakuti tichemerezge mwachimwemwe na kusekelera+ mazuŵa ghithu ghose. 15  Mutikondweske kuyana na mazuŵa agho mwatisuzgira,+ Kuyana na unandi wa vyaka ivyo tatambulira.+ 16  Ŵateŵeti ŵinu ŵawone mulimo winu, Ndipo ŵana ŵawo ŵawone uchindami winu.+ 17  Lusungu lwa Yehova Chiuta withu luŵe nase, Mukhozge* mulimo wa mawoko ghithu. Enya, mukhozge* mulimo wa mawoko ghithu.+

Mazgu Ghamusi

Pangayowoyekaso kuti, “chiphokwero chithu.”
Panji kuti, “Mukumanya maubudi ghithu.”
Panji kuti, “Umoyo withu ukumara.”
Panji kuti, “chitemwa chakugomezgeka.”
Panji kuti, “Mutiyendeskere makora.”
Panji kuti, “mutiyendeskere makora.”