Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Masalimo 69:1-36

IVYO VILI MU BUKU ILI

  • Kulomba kuthaskika

    • “Mwamphu wa nyumba yinu wanirya” (9)

    • “Nizgorani luŵiro” (17)

    • “Ŵakanipa vinyo lakusasa” (21)

Kwa wakulongozga sumu, yichunikire pa “Maluŵa.” Salimo la Davide. 69  Niponoskani, A Chiuta, pakuti maji ghakukhumba kunanga umoyo wane.*+   Nabira mu mathipa, umo mulije malo ghakomira.+ Nanjira mu maji ghakunyang’amira, Ndipo tumilonga twakututuka twanikukura.+   Vyalema na kuchemerezga.+ Chigolomiro chane chachita mangwalara. Maso ghane ghalopwa apo nkhulindilira Chiuta wane.+   Awo ŵakunitinkha kwambura chifukwa+ Mbanandi chomene kuluska masisi gha ku mutu wane. Awo ŵakukhumba kunikoma, Ŵalwani ŵane ŵaryarya,* ŵaŵa ŵanandi. Nkhachichizgika kupeleka icho nkhaŵa kuti nindibe.   A Chiuta, mukumanya uchindere wane, Ndipo mulandu wane undabisike kwa imwe.   Awo ŵakugomezga imwe ŵangakhozgekanga soni chara chifukwa cha ine, Mwe Fumu Yikuru, Yehova wa mawumba. Awo ŵakumupenjani ŵangalengeskekanga yayi chifukwa cha ine, Mwe Chiuta wa Israyeli.   Nkhuchitirika msinjiro chifukwa cha imwe,+ Soni zikubenekelera chisko chane.+   Nazgoka mulendo ku ŵabali ŵane, Wakuwaro ku ŵana ŵa amama.+   Mwamphu wa nyumba yinu wanirya,+ Ndipo msinjiro wa awo ŵakumuchitirani msinjiro wawa pa ine.+ 10  Nkhati najiyuyura pamoza na kuziŵizga kurya,* Nkhachitirika msinjiro. 11  Nkhati navwara chigudulu, Nkhazgoka chakuhoyeka kwa iwo. 12  Nkhuyowoyeka na awo ŵakukhala pa chipata cha msumba, Ndipo ŵaloŵevu ŵakuniyimba mu sumu zawo. 13  Kweni lurombo lwane lufike kwa imwe, A Yehova, pa nyengo yakuzomerezgeka.+ Mu lusungu* lwinu lwakuzara, A Chiuta, Nizgorani na chiponosko chinu chakugomezgeka.+ 14  Nithaskani ku mathipa. Mungazomerezganga chara kuti nibire. Nithaskani ku awo ŵakunitinkha Na ku maji ghakunyang’amira.+ 15  Mungazomerezganga chara kuti maji ghakututuka ghanikukure,+ Panji kuti ndimba ya maji yinimire, Nanga nkhuzomerezga chisimi* kujara mulomo wake pa ine.+ 16  Nizgorani, A Yehova, pakuti chitemwa* chinu ntchiwemi.+ Kuyana na unandi wa lusungu lwinu, zgokerani kwa ine,+ 17  Mungabisanga chara chisko chinu kwa muteŵeti winu.+ Nizgorani luŵiro, pakuti nili mu suzgo.+ 18  Zani pafupi na kunithaska. Niwomborani chifukwa cha ŵalwani ŵane. 19  Mukumanya umo ŵanthu ŵanichitira msinjiro, kunilengeska na kuniyuyura.+ Mukuwona ŵalwani wose. 20  Msinjiro waphyora mtima wane, ndipo chilonda ntchambura kupozgeka. Nkhakhazganga kuti ŵanthu ŵanichitirenge chitima, kweni pakaŵavya nanga njumoza.+ Nkhakhazganga ŵasanguluski, kweni nkhamusanga nanga njumoza chara.+ 21  Nkhakhumbanga chakurya, ŵakanipa poyizoni,*+ Nyota yikati yanikora, ŵakanipa vinyo lakusasa.+ 22  Thebulu lawo lizgoke diŵa kwa iwo, Usambazi wawo uzgoke chipingo.+ 23  Maso ghawo ghachite chidima kuti ŵaleke kuwona, Ndipo sunkhunyani viwuno vyawo nyengo zose. 24  Pungulirani ukali winu pa iwo, Ukali winu wakugolera uŵasange.+ 25  Misasa yawo yipasuke. Mahema ghawo ghaŵavye munthu wakukhalamo.+ 26  Pakuti ŵakulondezga uyo imwe mwamutimba, Ndipo ŵakulutilira kuyowoya za vyakuŵinya vya awo imwe mwaŵapweteka. 27  Sazganiko milandu yinandi ku mulandu wawo, Ŵangapokangako yayi urunji winu. 28  Ŵasisitike mu buku la ŵamoyo,*+ Ŵangalembekanga pamoza na ŵarunji yayi.+ 29  Kweni ine nasuzgika, nili mu ulwilwi.+ A Chiuta, nkhongono yinu yakuponoska yinivikilire. 30  Nimbirenge malumbo zina la Chiuta, Ndipo nimukuzgenge na viwongo. 31  Ichi chimukondweskenge Yehova kuluska ng’ombe yanalume, Kuluska kang’ombe ka masengwe na vikandiro.+ 32  Ŵakuzika ŵachiwonenge na kusekelera. Imwe mukupenja Chiuta, mitima yinu yiweleremo. 33  Pakuti Yehova wakupulika ŵakavu,+ Ndipo waŵasurenge yayi ŵanthu ŵake ŵakukoleka.+ 34  Kuchanya na charu chapasi vimulumbe,+ Nyanja na vyose ivyo vikwenda mwenemumo. 35  Pakuti Chiuta waponoskenge Ziyoni+ Wazengengeso misumba ya Yuda, Ndipo ŵakhalengemo, charu chiŵenge chawo. 36  Mphapu ya ŵateŵeti ŵake yiharenge,+ Ndipo awo ŵakutemwa zina+ lake ŵakhalengemo.

Mazgu Ghamusi

Panji kuti, “maji ghafika ku umoyo wane.”
Panji kuti, “Ŵalwani kwambura chifukwa.”
Pangayowoyekaso kuti, “Nkhati nalira na kuziŵizga kurya.”
Panji kuti, “chitemwa chakugomezgeka.”
Panji kuti, “khululu.”
Panji kuti, “chitemwa chakugomezgeka.”
Panji kuti, “chakumera chakukoma.”
Panji kuti, “buku la umoyo.”