Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Baibolo la pa Intaneti | MALEMBA GHAKUPATULIKA MU MANG'ANAMULIRO GHA CHARU CHIPHYA

Masalimo 55:1-23

IVYO VILI MU BUKU ILI

  • Kulomba para mubwezi wakwendera mphiska

    • Mubwezi wakutombozga (12-14)

    • “Katundu wako umuthwikiske Yehova” (22)

Kwa wakulongozga sumu, yimbike na vyakwimbira vya vingwe. Masikilu.* Salimo la Davide. 55  Tegherezgani lurombo lwane, A Chiuta,+ Mungazerezganga chara para nkhupempha kuti munilongore lusungu.*+   Nipulikani na kunizgora.+ Nkhukweŵeka na suzgo yane,+ Nkhuyangazuka waka,   Chifukwa cha ivyo mulwani wakuyowoya Na umo muheni wakunitombozgera. Pakuti ŵakulundika suzgo pa ine, Mu ukali, ŵakunisungira chimbimbiza.+   Mtima wane ukuŵinya chomene mukati mwane,+ Chitenthe cha nyifwa chaniwira.+   Wofi na kumbwambwantha vyanizira, Chinjenje chanikora.   Nkhuti: “Niŵenge na mapapindo nga ni njiŵa! Mphanyi naphululukira kutali na kukakhala mu malo ghakuvikilirika.   Enya, mphanyi nadukira kutali chomene.+ Mphanyi nakakhala mu mapopa.+ (Selah)   Mphanyi nachimbilira ku malo ghakubisamako, Kutali na chimphepo chakofya, kutali na chimphupulu.”   Ŵahangayiskani, A Yehova, timbanizgani ivyo ŵakukhumba kuchita,*+ Pakuti nawona nkhaza na vivulupi mu msumba. 10  Muhanya na usiku ŵakwenda kuzingilira viliŵa vyake. Mukati mwake muli ubendezi na suzgo.+ 11  Mukati mwake muli pharanyiko. Kuyuzgana na upusikizgi vikufumamo chara mu luŵaza lwake.+ 12  Pakuti uyo wakunitombozga ni mulwani chara.+ Viŵenge nthena mphanyi nazizipizga. Uyo wakuniwukira ni mulwani yayi, Viŵenge nthena mphanyi nabisama. 13  Kweni ndiwe, munthu nga ndine,*+ Wamunyane iwe nkhukumanya makora,+ 14  Tikaŵa paubwezi uwemi chomene. Tikenderanga lumoza kuya ku nyumba ya Chiuta pamoza na mzinda. 15  Mphanyi pharanyiko laŵawira!+ Ŵalekani ŵakhilire ku Dindi* ŵachali ŵamoyo. Pakuti uheni ukukhala pakati pawo, na mukati mwawo. 16  Kweni ine, nichemenge kwa Chiuta, Ndipo Yehova waniponoskenge.+ 17  Mise, mulenji, na muhanya pakati, nkhutambura na kutampha,+ Ndipo iyo wakupulika mazgu ghane.+ 18  Wanithaskenge* ku awo ŵakulimbana nane, wanipenge mtende, Pakuti mawumba ghakwimikana nane.+ 19  Chiuta wapulikenge na kuŵazgora,+ Uyo wakukhala pa chitengo kwamba kale chomene.+ (Selah) Awo ŵakopa chara Chiuta+ Ŵakanenge kusintha. 20  Iyo* wakawukira awo wakaŵa nawo pamtende.+ Wakaswa phangano lake.+ 21  Mazgu ghake nga myaa, nga ni chambiko,+ Kweni mu mtima wake muli mbembe. Mazgu ghake ghali nyililiri, nga ni mafuta, Kweni ni malupanga ghakusoloreka.+ 22  Katundu wako umuthwikiske Yehova,+ Ndipo wakovwirenge.+ Wazomerezgenge chara kuti murunji wawe.*+ 23  Kweni imwe, A Chiuta, muŵakhizgirenge mu khululu la nyang’anyang’a.+ Awo ŵali na mulandu wa ndopa na ŵaryarya ŵakwaniskenge yayi hafu ya mazuŵa gha umoyo wawo.+ Kweni ine, nithembenge imwe.

Mazgu Ghamusi

Panji kuti, “Mungajibisanga yayi para nkhulomba kuti munovwire.”
Mazgu gheneko, “timbanizgani malulimi ghawo.”
Panji kuti, “wa munthu wakuyana na ine.”
Panji kuti, “Sheole,” ndiko kuti, malaro. Wonani Mang’anamuro gha Mazgu.
Mazgu gheneko, “Waniwomborenge.”
Ndiko kuti, mubwezi uyo wazunulika mu mavesi 13-14.
Panji kuti, “wasunkhunyike.”