Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Masalimo 104:1-35

IVYO VILI MU BUKU ILI

  • Kulumba Chiuta chifukwa cha chilengiwa chakuzizwiska

    • Charu chapasi chikhalilirenge muyirayira (5)

    • Vinyo na chingwa kuti munthu wasangwe navyo (15)

    • “Nawo mbunandi wa milimo yinu!” (24)

    • ‘Usange mzimu wafumiskikamo, vikufwa’ (29)

104  Lekani nilumbe* Yehova.+ A Yehova Chiuta wane, ndimwe mukuru.+ Mwavwara ntchindi na uchindami.+   Mwabundilizgika na ungweru+ nga ntchakuvwara, Mukutandawura machanya nga ni salu ya hema.+   Wakutambika michiko ya vipinda vyake vyamuchanya mu maji ghakuchanya,+ Wakuzgora mabingu kuŵa gileta lake.+ Wakwenda pa mapapindo gha mphepo.+   Wakuzgora ŵangelo ŵake kuŵa mizimu, Ŵateŵeti ŵake kuŵa moto wakumyangura.+   Wakhazika charu chapasi pa malufura* ghake.+ Chisezgekengepo* chara pa malo ghake muyirayira swii.+   Mukachibenekelera na maji ghanandi nga ntchakuvwara.+ Vimaji vikimilira pachanya pa mapiri.   Mukavichenya ndipo vikafumapo.+ Pakupulika kududumira kwinu vikachimbira mwawofi,   Mapiri ghakakwelera muchanya,+ madambo ghakakhilira pasi, Ku malo agho mukavinozgera.   Maji mukaghaŵikira mphaka kuti ghaleke kujumpha,+ Kuti ghaleke kubenekeleraso charu chapasi. 10  Wakubwibwituska maji mu madambo. Ghakwenda pakati pa mapiri. 11  Vikoko vyose vyamuthondo vikumwa. Mbunda zamuthondo zikukhorweska nyota yawo. 12  Viyuni vyamudera vikugona pachanya pake. Vikwimba mu mahamba. 13  Wakuthilira mapiri kufuma mu vipinda vyake vyamuchanya.+ Charu chikukhuta na vipambi vya milimo yinu.+ 14  Wakumezgera ng’ombe utheka, Na kuŵapa ŵanthu vyakumera,+ Mwakuti chakurya chifume mu dongo, 15  Na vinyo ilo likukondweska mtima wa munthu,+ Mafuta agho ghakung’animiska chisko, Na chingwa icho chikupeleka nkhongono ku mtima wa munthu.+ 16  Makuni gha Yehova ghakukhorwa, Makuni gha sidara gha ku Lebanoni agho wakapanda, 17  Viyuni vikuzenga vivwimbo mwenemumo. Nyumba ya konongo+ yili mu makuni gha junipa. 18  Vinkhoma*+ vikukhala pa mapiri ghatali. Majalawe ni malo ghakubisamako mphyayi.+ 19  Wali kupanga mwezi kuti ulongorenge nyengo zakutemeka. Dazi likumanya makora nyengo yakunjilira.+ 20  Mukwiza na chisi, ndipo usiku ukwamba,+ Apo vinyama vyose vyamuthondo vikwendendeka. 21  Tunkhalamu tukubangura kuti tukore nyama,+ Ndipo tukupenja chakurya kufuma kwa Chiuta.+ 22  Para dazi likufuma, Tukuwelera mu michembo yawo na kukagona. 23  Munthu wakuluta ku ntchito yake, Wakutokatoka m’paka mise. 24  A Yehova, nawo mbunandi wa milimo yinu!+ Muli kuyipanga yose mu vinjeru.+ Charu chapasi ntchakuzura na ivyo muli kupanga. 25  Kuli nyanja, njikuru na yisani, Mukwenda vyamoyo vinandi chomene, vichoko na vikuru.+ 26  Ngalaŵa zikwenda mwenemumo, Na Leviyatani,*+ uyo mukapanga kuti waseŵerenge mwenemumo. 27  Vyose vikulindilira imwe Kuti muvipe chakurya chawo mu nyengo yake.+ 28  Vikuwunjika ivyo mwavipa.+ Para mukujura woko linu, vikukhuta na vinthu viwemi.+ 29  Para mwabisa chisko chinu, vikuyangazuka. Usange mwafumiskamo mzimu wawo, vikufwa na kuwelera ku fuvu.+ 30  Para mwatuma mzimu winu, vikulengeka,+ Mukuwezgerapo chisko cha charu, chikuŵaso chiphya. 31  Uchindami wa Yehova ukhalilirenge muyirayira. Yehova wasekelerenge na milimo yake.+ 32  Wakulaŵiska pa charu chapasi, ndipo chikumbwambwantha. Wakukhwaska mapiri, ndipo ghakusunkha josi.+ 33  Nimuyimbirenge Yehova+ umoyo wane wose. Niyimbirenge malumbo Chiuta wane nyengo yose iyo niliri wamoyo.+ 34  Maghanoghano ghane ghamukondweske.* Nisekelerenge mwa Yehova. 35  Ŵakwananga ŵamalenge pa charu chapasi, Ŵaheni ŵaŵengekoso chara.+ Lekani nilumbe* Yehova. Lumbani Ya!*

Mazgu Ghamusi

Panji kuti, “Umoyo wane ulumbe.”
Mazgu ghanyake, “fawundeshoni.”
Panji kuti, “Chisunkhunyikenge.”
Mazgu ghanyake, “Mbuzi za mu mapiri; Mbuzimawe.”
Pangayowoyekaso kuti, “Ivyo nkhulanguruka vya iyo viŵe vyakukondweska.”
Panji kuti, “Umoyo wane ulumbe.”
Panji kuti, “Aleluya.” “Ya” nkhudumura kwa zina lakuti Yehova.