Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Baibolo la pa Intaneti | MALEMBA GHAKUPATULIKA MU MANG'ANAMULIRO GHA CHARU CHIPHYA

Masalimo 102:1-28

IVYO VILI MU BUKU ILI

  • Lurombo lwa munthu wakusuzgika uyo wakwenjerwa

    • “Nili nga nkhayuni ako kali kekha” (7)

    • ‘Mazuŵa ghane ni mfwiri uwo ukumara’ (11)

    • “Yehova wazengengeso Ziyoni” (16)

    • Yehova wakukhalilira muyirayira (26, 27)

Lurombo lwa wakuyuzgika uyo wali mu suzgo* ndipo wakuthura vyenjezgo vyake kwa Yehova.+ 102  A Yehova, pulikani lurombo lwane.+ Kulira kwane kupempha wovwiri kufike kwa imwe.+   Mungabisanga chara chisko chinu para nasuzgika.+ Thyani khutu kwa ine. Nizgorani mwaluŵiro para nkhumuchemani.+   Pakuti mazuŵa ghane ghakumwalalikira nga ni josi, Viwangwa vyane vyanyeka nga ni makara ghamoto pa chipembo.+   Mtima wane wawa nga mbutheka ndipo wafota,+ Pakuti nkhuluwa kurya chakurya chane.   Chifukwa cha kutampha kwane kukuru,+ Viwangwa vyane vikudemelera ku thupi lane.+   Nkhuyana na chiyuni cha nyangenyange mu mapopa. Nili nga ni phuluru muchoko mu mahami.   Para nagona pasi nkhuŵa maso nipera, Nili nga nkhayuni ako kali kekha pa mtenje.+   Ŵalwani ŵane ŵakuninena zuŵa lose.+ Awo ŵakunihoya ŵakutemba mu zina lane.   Nkhurya vyoto nga ntchingwa.+ Ivyo nkhumwa vyasazgikana na masozi,+ 10  Chifukwa cha ukali winu na kutukutwa kwinu, Mukaninyamulira muchanya na kunitaya. 11  Mazuŵa ghane ghakumara nga ni mfwiri,+ Nkhufota nga mbutheka.+ 12  Kweni imwe, A Yehova, mukukhalilira muyirayira,+ Zina* linu liŵengeko mu miwiro yose.+ 13  Muwukenge nadi na kulongora lusungu pa Ziyoni,+ Pakuti ni nyengo yakulongolera chiwuravi pa iyo.+ Nyengo yakutemeka yafika.+ 14  Pakuti ŵateŵeti ŵinu ŵakukondwa na malibwe ghake,+ Ŵakutemwa na fuvu lake wuwo.+ 15  Mitundu yiwopenge zina la Yehova, Mathemba ghose gha charu chapasi uchindami winu.+ 16  Yehova wazengengeso Ziyoni,+ Wawonekenge mu uchindami wake.+ 17  Wategherezgenge lurombo lwa ŵakusokwa,+ Wapepurenge yayi lurombo lwawo.+ 18  Ichi chalembekera muwiro wakunthazi,+ Kuti ŵanthu awo pasono ŵandababike* ŵazakalumbenge Ya. 19  Pakuti wakulaŵiska pasi kufuma mu machanya ghake ghakupatulika,+ Yehova wakulaŵiska pa charu chapasi kufuma kuchanya, 20  Kuti wapulike kutampha kwa kayidi,+ Na kufwatura awo ŵapika chilango cha nyifwa,+ 21  Mwakuti zina la Yehova lipharazgike mu Ziyoni+ Malumbo ghake mu Yerusalemu, 22  Para ŵanthu na maufumu Ŵawungana pamoza kuteŵetera Yehova.+ 23  Wakanipoka nkhongono zane mwaluŵiro, Na kudumulizga mazuŵa ghane. 24  Ine nkhati: “A Chiuta wane, Munganiparanyanga chara apo umoyo wane uli pakatikati, Imwe, mwaŵeneimwe vyaka vinu vikulutilira mu miwiro yose.+ 25  Mukajintha charu chapasi kale chomene, Ndipo machanya ni mulimo wa mawoko ghinu.+ 26  Ivi vimalenge, kweni imwe mukhalilirenge. Nga ntchakuvwara vitchujukenge. Nga ni malaya muhalizgirengepo vinyake ndipo vimalenge. 27  Kweni imwe muchali umo muliri, ndipo vyaka vinu vimalengepo yayi.+ 28  Ŵana ŵa ŵateŵeti ŵinu ŵakhalenge mwakufwasa, Mphapu yawo yikhozgekenge pamaso pinu.”+

Mazgu Ghamusi

Panji kuti, “uyo walopwa.”
Panji kuti, “Lumbiri lwinu.”
Mazgu gheneko, “ŵandalengeke.”