Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Joyeli 3:1-21

IVYO VILI MU BUKU ILI

  • Yehova wakweruzga mitundu yose (1-17)

    • Dambo la Yehoshafati (2, 12)

    • Dambo lakweruzgira milandu (14)

    • Yehova ni linga lakukhora la Israyeli (16)

  • Yehova wakutumbika ŵanthu ŵake (18-21)

3  “Pakuti wonani, mu mazuŵa agho ndiposo pa nyengo iyo, Para nawezga ŵanthu ŵa mu Yuda na Yerusalemu awo ŵakakoleka wuzga,+   Nizamuwunjikaso pamoza mitundu yose Na kukhilira nayo ku Dambo* la Yehoshafati.* Namweruzgana nayo kwenekura+ Chifukwa cha ŵanthu ŵane na chiharo chane Israyeli, Pakuti yikaŵambininiskira mukati mu ŵamitundu, Ndipo yikagaŵana charu chane.+   Ŵakaponya mphenduzga* pa ŵanthu ŵane,+ Ŵakapelekanga mwana msepuka kusinthana na hule, Na kuguliska mwana msungwana na vinyo kuti ŵamwe.   Kweniso, nili nawe na kafukwa wuli, Iwe Ture na Sidoni na vigaŵa vyose vya Filisitiya? Kasi mukuniwezgera nduzga pa chifukwa chinyake? Para mukuniwezgera nduzga, Nduzga zinu nizenge nazo pa mitu yinu mwaluŵiro.+   Pakuti mwatora siliva lane na golide lane,+ Ndipo chuma chane chakuzirwa mwachiyeghera mu matempile ghinu.   Ŵanthu ŵa mu Yuda na Yerusalemu mwaŵaguliska ku Ŵagiriki,+ Mwakuti muŵafumyemo na kuŵalutiska kutali na chigaŵa chawo.   Sono nkhuŵawuska kufuma ku malo agho mukaŵaguliskako,+ Ndipo nduzga zinu nizenge nazo pa mitu yinu.   Ŵana ŵinu ŵanalume na ŵanakazi niŵaguliskenge mu woko la ŵanthu ŵa ku Yuda,+ Ndipo iwo ŵamuŵaguliska ku ŵanthu ŵa ku Sheba, ku mtundu wakutali, Pakuti ichi wayowoya ni Yehova.   Pharazgani ichi pakati pa mitundu,+ ‘Nozgekerani nkhondo! Wuskani vinkhara! Ŵasilikari wose ŵasendelere pafupi, lekani ŵalute!+ 10  Muskane* majembe ghinu kuŵa malupanga na mphopo zinu kuŵa mikondo. Wakulopwa wayowoye kuti: “Ndine wankhongono.” 11  Ŵamitundu mose imwe mukukhala pafupi, fikani na kovwira, wunganani pamoza!’”+ A Yehova, khizgirani vinkhara vinu* ku malo ghara. 12  “Mitundu yiwuskike na kukwelera ku Dambo* la Yehoshafati, Pakuti ndiko namukhala kuti neruzge mitundu yose yapafupi.+ 13  Njizganipo chigelo* pakuti vuna yacha. Khirani na kudyaka, pakuti chakukamiramo mpheska chazura.+ Vyakusungiramo vikufuluka, pakuti uheni wawo ngukuru. 14  Mizinda, mizinda yili mu dambo lakweruzgira milandu, Pakuti zuŵa la Yehova laneng’enera mu dambo lakweruzgira milandu.+ 15  Dazi na mwezi vizamuchita mdima, Ndipo nyenyezi zizamuleka kuŵala. 16  Yehova wazamubangura kufuma mu Ziyoni, Wazamutumphuska mazgu ghake kufuma mu Yerusalemu Ndipo kuchanya na charu chapasi vizamusunkhunyika, Kweni Yehova wazamuŵa chakubisamamo cha ŵanthu ŵake,+ Wazamuŵa linga lakukhora la Israyeli. 17  Ndipo muzamumanya kuti ine ndine Yehova Chiuta winu, uyo wakukhala mu Ziyoni, phiri lane lituŵa.+ Yerusalemu wazamuŵa malo ghatuŵa,+ Ŵalendo ŵazamujumphamoso chara.+ 18  Mu zuŵa ilo, mapiri ghazamunthonya vinyo lakunowa,+ Mu tumapiri muzamwenda mkaka, Mu tumilonga tose twa mu Yuda muzamwenda maji. Mu nyumba ya Yehova muzamufuma mbwiwi ya maji,+ Ndipo yizamuthilira Dambo la Makuni gha Akasiya. 19  Kweni Eguputo wazamuzgoka mayiyi,+ Edomu wazamuŵa mapopa ghambura kanthu,+ Chifukwa cha nkhaza izo ŵakachitira ŵanthu ŵa mu Yuda,+ Ŵakathiska ndopa zambura mulandu mu charu cha Yuda.+ 20  Kweni mu Yuda muzamukhala ŵanthu nyengo zose, Mu Yerusalemu muzamukhala ŵanthu ku miwiro na miwiro.+ 21  Ndopa zawo izo nkhaziwonanga kuti zili na mulandu nizamuziwona kuti zilije mulandu,+ Ndipo Yehova wazamukhala mu Ziyoni.”+

Mazgu Ghamusi

Panji kuti, “Chidika cha.”
Kung’anamura kuti, “Yehova Ni Mweruzgi.”
Mazgu ghanyake, “kufura; kutona.”
Panji kuti, “ŵankhondo ŵinu.”
Panji kuti, “Chidika cha.”
Mazgu ghanyake, “chisengelo; chigwangwa; chikwanja; chikwakwa.”