Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Baibolo la pa Intaneti | MALEMBA GHAKUPATULIKA MU MANG'ANAMULIRO GHA CHARU CHIPHYA

Hoseya 10:1-15

IVYO VILI MU BUKU ILI

  • Israyeli ni khuni la mpheska ilo lizamuparanyika (1-15)

10  “Israyeli ni khuni la mpheska lakunangika* ilo likupambika vipambi vyake.+ Para vipambi vyake vikusazgikira ndipo wakwandaniska chomene majotchero ghake;+Para charu chake chikubaba makora ndipo wakuzenga vipilara vyake vyakupatulika vyakutowa chomene.+   Mtima wawo ngwaupusikizgi,Sono ŵasangikenge na mulandu. Pali yumoza uyo wazamugumura majotchero ghawo na kuparanya vipilara vyawo.   Sono ŵazamuti: ‘Tilije themba,+ pakuti tindamope Yehova. Ndipo themba lingatichitira vichi?’   Ŵakuyowoya mazgu ghawakawaka, ŵakuchita vilapo vyautesi,+ na kuchita mapangano.Ntheura cheruzgo icho chikuphuka chili nga ni thondo lakukoma ilo lili mu mizere ya mu munda.+   Ŵanthu ŵa mu Samariya ŵazamuchita chitima na chikozgo cha tholi cha ku Beti-aveni.+ Ŵanthu ŵake ŵazamuchililira,Nga umo ŵazamuchitira ŵasembe ŵa ŵachiuta ŵachilendo awo ŵakakondwanga nacho na uchindami wake,Pakuti chizamuwukako kwa iwo na kuluta ku wuzga.   Chizamutolekera ku Asiriya kuŵa chawanangwa kwa themba likuru.+ Efurayimu wazamukhozgeka soni,Ndipo Israyeli wazamuchita soni chifukwa cha ulongozgi uwo wakalondezga.+   Samariya na themba lake ŵazamuchetamiskika nadi,+Nga nkhamphukira ka khuni kakudumulika ako kakuyenjama* pa maji.   Malo ghapachanya gha Beti-aveni,+ agho nkhwananga kwa Israyeli,+ ghazamuparanyika.+ Minga na nthura vizamumera pa majotchero ghawo.+ Ŵanthu ŵazamuyowoya ku mapiri kuti, ‘Tibenekelerani!’ Na ku tumapiri kuti, ‘Wirani pa ise!’+   Iwe Israyeli, wananga kwambira mu mazuŵa gha Gibeya.+ Kwenekura ŵalutilira. Nkhondo yikaŵamalirathu yayi ŵana ŵakwananga mu Gibeya. 10  Nizamuŵalanga para nakhumba. Ndipo ŵanthu ŵazamuwungana kwimikana nawo,Para zakwananga zawo ziŵiri zakakika pa iwo.* 11  Efurayimu wakaŵa nga ni ng’ombe yambura kubabapo yakusambizgika makora iyo yikatemwanga kupwantha tirigu,Ntheura nkhakaka yayi singo yake yiwemi. Sono nitumenge munyake kuti wakwere pa Efurayimu.+ Yuda wazamulima; Yakhobe wazamumupopotera. 12  Jiseŵerani mbuto mu urunji na kuvuna lusungu.* Jilimirani munda uwemi+Apo nyengo yakupenjera Yehova yichalipo,+M’paka wize na kumusambizgani mu urunji.+ 13  Kweni imwe mwalima viheni,Mwavuna ubendezi,+Ndipo mwarya vipambi vyaupusikizgi.Pakuti mwagomezga nthowa yinu,Na mu unandi wa ŵasilikari ŵinu. 14  Pazamuwuka chiwawa chikuru kwimikana na ŵanthu ŵinu,Ndipo misumba yinu yose ya malinga ghakukhora yizamubwangandulika,+Nga umo Shalimani wakabwangandulira nyumba ya Aribeli,Mu zuŵa la nkhondo apo ŵamama ŵakatekenyulika pamoza na ŵana ŵawo. 15  Ichi ndicho chizamuchitikira iwe Beteli,+ chifukwa cha uheni wako ukuru. Themba la Israyeli lizamuparanyika* nadi kumatandakucha.”+

Mazgu Ghamusi

Pangayowoyekaso kuti, “lakukura makora.”
Mazgu ghanyake, “kakuŵimbana.”
Ndiko kuti, para ŵayegha chilango chawo nga ni goliwoli.
Panji kuti, “chitemwa chakugomezgeka.”
Mazgu gheneko, “lizamuchetamiskika.”