Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Baibolo la pa Intaneti | MALEMBA GHAKUPATULIKA MU MANG'ANAMULIRO GHA CHARU CHIPHYA

Hoseya 1:1-11

IVYO VILI MU BUKU ILI

  • Muwoli wa Hoseya na ŵana ŵake (1-9)

    • Yezireli (4), Lo-ruhama (6), na Lo-ami (9)

  • Ŵazamuwunjikika pamoza na kuŵa ŵakukolerana (10, 11)

1  Mazgu gha Yehova agho ghakiza kwa Hoseya* mwana wa Beeri, mu mazuŵa gha Uziya,+ Yotamu,+ Ahazi,+ na Hezekiya,+ mathemba gha Yuda,+ ndiposo mu mazuŵa gha Yerobowamu+ mwana wa Yowashi,+ themba la Israyeli.  Apo Yehova wakamba kuyowoya mazgu ghake kwizira mwa Hoseya, Yehova wakati kwa Hoseya: “Luta ukatore mwanakazi muhule ndipo uŵe na ŵana ŵauhule, chifukwa charu chalekerathu kulondezga Yehova chifukwa cha uhule wawo.”+  Ntheura wakaluta na kukatora Gomeri, mwana mwanakazi wa Dibulayimu, ndipo wakatora nthumbo na kumubabira mwana mwanalume.  Yehova wakati kwa iyo: “Umuthye zina lakuti Yezireli,* chifukwa kwakhala nyengo yichoko waka kuti nipeleke chilango ku nyumba ya Yehu+ chifukwa cha kuthiska ndopa kwa Yezireli. Nimazgenge ufumu wa nyumba ya Israyeli.+  Mu zuŵa ilo, nizamuphyora uta wa Israyeli mu Dambo* la Yezireli.”  Gomeri wakatoraso nthumbo na kubaba mwana mwanakazi. Ndipo Chiuta wakati kwa Hoseya: “Umuthye zina lakuti Lo-ruhama,* pakuti nilongorengeso lusungu chara+ ku nyumba ya Israyeli, chifukwa niŵachimbizgenge nadi.+  Kweni nilongorenge lusungu ku nyumba ya Yuda,+ ndipo ine Yehova Chiuta wawo niŵaponoskenge.+ Niŵathaskenge na uta chara, nesi na lupanga, panji na nkhondo, nesi na mahachi, panji ŵapamahachi.”+  Wakati walumura Lo-ruhama, wakatoraso nthumbo na kubaba mwana mwanalume.  Chiuta wakati: “Umuthye zina lakuti Lo-ami,* chifukwa ndimwe ŵanthu ŵane chara ndipo nane niŵenge winu chara. 10  “Ŵaisrayeli ŵazamuŵa ŵanandi nga ni mchenga wa mu nyanja uwo ungapimika chara nesi kupendeka.+ Ndipo mu malo agho ŵakaphalirika kuti, ‘Ndimwe ŵanthu ŵane chara,’+ ŵazamuphalirika kuti, ‘Ŵana ŵa Chiuta wamoyo.’+ 11  Penepapo ŵanthu ŵa mu Yuda na Israyeli ŵazamuwunjikika pamoza na kuŵa ŵakukolerana+ ndipo ŵazamujisankhira mulongozgi yumoza na kufumamo mu charu, pakuti zuŵa la Yezireli+ lizamuŵa likuru.

Mazgu Ghamusi

Kung’anamura kuti, “Kuponoskeka na Ya; Ya Waponoska.”
Kung’anamura kuti, “Chiuta Waseŵenge Mbuto.”
Panji kuti, “Chidika cha.”
Kung’anamura kuti, “Kuleka Kulongoreka Lusungu.”
Kung’anamura kuti, “Mbanthu Ŵane Chara.”