Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Baibolo la pa Intaneti | MALEMBA GHAKUPATULIKA MU MANG'ANAMULIRO GHA CHARU CHIPHYA

Ezekiyeli 9:1-11

IVYO VILI MU BUKU ILI

  • Ŵanalume 6 awo ŵali na vilwero vyakukomera ndiposo munthu wa kachikwama ka mulembi (1-11)

    • Cheruzgo chambirenge pa malo ghakupatulika (6)

9  Penepapo wakachemerezga mu makutu ghane na lizgu likuru, wakati: “Chema awo ŵizenge na chilango pa msumba uwu, waliyose waŵe na chilwero chakuparanyira mu woko lake!”  Nkhawona ŵanalume 6 ŵakufumira ku chipata chakunena+ icho chikulazga kumpoto, waliyose wakaŵa na chilwero chakukomera mu woko lake. Ndipo pakati pawo pakaŵa munthu yumoza uyo wakavwara salu yiwemi, na kachikwama* ka mulembi mu chiwuno mwake, ndipo ŵakanjira na kwimilira pamphepete pa jotchero lamkuŵa.+  Uchindami wa Chiuta wa Israyeli+ ukanyamuka pachanya pa ŵakerubi apo ukakhala na kuluta ku mulyango wa nyumba,+ ndipo wakamba kuchema munthu uyo wakavwara salu yiwemi, uyo mu chiwuno mwake mukaŵa kachikwama* ka mulembi.  Yehova wakati kwa iyo: “Solota mu msumba, mukati mwa Yerusalemu, na kuŵika chimanyikwiro pa visko vya ŵanthu awo ŵakudagha na kutampha+ chifukwa cha vinthu vyose vyaukazuzi ivyo vikuchitika mu msumba.”+  Ndipo nkhapulika wakuphalira ŵanyake ŵara kuti: “Solotani mu msumba, mulondezge pamanyuma pake ndipo mukome ŵanthu. Jiso linu lingachitanga chitima chara, ndipo mungachitanga chiwuravi yayi.+  Mukome wose,+ muchekuru, munyamata, mwali, mwana muchoko, na ŵanakazi. Kweni mungasendeleranga yayi kufupi na munthu waliyose uyo wali na chimanyikwiro.+ Mwambe pa malo ghane ghakupatulika.”+ Ntheura ŵakamba kukoma ŵalara awo ŵakaŵa panthazi pa nyumba.+  Wakati kwa iwo: “Lutani! Mukayikazuzge nyumba, ndipo mukazuzge luŵaza na ŵanthu ŵakukomeka.”+ Ntheura iwo ŵakaluta kukakoma ŵanthu mu msumba.  Apo ŵakaŵakomanga, nkhalekeka nekha, ndipo nkhawa kavunama na kulira chomene, kuti: “Okwe, Fumu Yikuru Yehova! Kasi muparanyenge wose ŵakukhalako ŵa Israyeli apo mukupungulira ukali winu pa Yerusalemu?”+  Ntheura wakati kwa ine: “Kwananga kwa nyumba ya Israyeli na Yuda nkhukuru, nkhukuru chomene.+ Charu chazura na kuthiska ndopa+ ndipo msumba wazura na vimbundi.+ Pakuti ŵakuti: ‘Yehova wachileka charu, Yehova wakuwona chara.’+ 10  Kweni ine, jiso lane lichitenge chitima chara, ndipo niŵachitirenge chiwuravi yayi.+ Njombe ya mendero ghawo nikhizgirenge pa mitu yawo.” 11  Penepapo nkhawona mwanalume uyo wakavwara salu yiwemi na kachikwama ka mulembi mu chiwuno mwake, wakuwezga mazgu, kuti: “Nachita nga umo mukanitumira.”

Mazgu Ghamusi

Panji kuti, “kabokosi kakuyeghamo inki na vyakulembera.” Mazgu ghanyake, “kachola.”
Panji kuti, “kabokosi kakuyeghamo inki na vyakulembera.” Mazgu ghanyake, “kachola.”