Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Baibolo la pa Intaneti | MALEMBA GHAKUPATULIKA MU MANG'ANAMULIRO GHA CHARU CHIPHYA

Ezekiyeli 35:1-15

IVYO VILI MU BUKU ILI

  • Uchimi wakwimikana na mapiri gha Seyiri (1-15)

35  Mazgu gha Yehova ghakizaso kwa ine, ghakati:  “Mwana wa munthu, lazga chisko chako ku chigaŵa cha mapiri cha Seyiri,+ ndipo uchime kwimikana nacho.+  Uyowoye kuti: ‘Ichi ndicho Fumu Yikuru Yehova yayowoya: “Wona, nimalanenge nawe, iwe chigaŵa cha mapiri cha Seyiri, ndipo ninyoloskerenge woko lane pa iwe na kukuzgora charu chamayiyi.+  Misumba yako niyizgorenge malo ghakupasuka, ndipo uŵenge charu chamayiyi.+ Ndipo umanyenge kuti ine ndine Yehova.  Chifukwa ukalongora thinkho lambura kumara,+ ndipo ukapeleka Ŵaisrayeli ku lupanga mu nyengo ya soka lawo, mu nyengo ya kulangika kwawo kwaumaliro.”’+  “‘Ntheura, umo ine niliri wamoyo,’ ndimo yayowoyera Fumu Yikuru Yehova, ‘ninozgenge vyakuti ndopa zako zithiskike, ndipo milimo yako ya kuthiska ndopa yikulondezgenge.+ Pakuti ukatinkha ndopa, ntheura ndopa zikulondezgenge.+  Ntheura, chigaŵa cha mapiri cha Seyiri nichizgorenge kuŵa charu chamayiyi,+ ndipo nidumurengemo waliyose uyo wakujumphamo na waliyose uyo wakuwelera.  Nizuzgenge mapiri ghake na ŵakukomeka, ndipo awo ŵakomeka na lupanga ŵawenge mu tumapiri twako, mu madambo ghako, na mu milonga yako yose.  Nikuzgorenge mayiyi muyirayira, mu misumba yako muzamukhalaso ŵanthu chara.+ Ndipo umanyenge kuti ine ndine Yehova.’ 10  “Chifukwa ukati: ‘Mitundu yiŵiri iyi na vyaru viŵiri ivi viŵenge vyane, ndipo tivitorenge vyose.’+ Ukayowoya nthena uku Yehova wali penepapo. 11  ‘Ntheura umo ine niliri wamoyo,’ ndimo yayowoyera Fumu Yikuru Yehova, ‘nane nimalanenge nawe kuyana na ukali wako na sanji yako ivyo ukalongora pakuŵatinkha.+ Ndipo nijimanyiskenge mukati mwawo para nakweruzga. 12  Umanyenge kuti ine Yehova nkhajipulikira nekha vinthu vyamsinjiro ivyo ukayowoyera mapiri gha Israyeli, apo ukati: “Ghazgoka mayiyi ndipo ghapika kwa ise kuti tighamilimitizge.”* 13  Ukaniyowoyera mwakujitukumura ndipo ukayowoya mazgu ghanandi kunena ine.+ Nkhapulika chilichose.’ 14  “Ichi ndicho Fumu Yikuru Yehova yayowoya: ‘Charu chose chapasi chizamusekelera para nakuzgora charu chamayiyi. 15  Nga umo iwe ukasekelelera apo chiharo cha nyumba ya Israyeli chikazgoka mayiyi, ntheura ndimo nichitirenge nawe.+ Iwe chigaŵa cha mapiri cha Seyiri, enya iwe Edomu+ yose, uzamuŵa malo ghakupasuka. Ndipo ŵamanyenge kuti ine ndine Yehova.’”

Mazgu Ghamusi

Mazgu gheneko, “kuŵa chakurya.”