Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Baibolo la pa Intaneti | MALEMBA GHAKUPATULIKA MU MANG'ANAMULIRO GHA CHARU CHIPHYA

Ezekiyeli 31:1-18

IVYO VILI MU BUKU ILI

  • Eguputo, uyo ni khuni litali chomene la sidara, wawa (1-18)

31  Mu chaka cha 11, mu mwezi wachitatu, pa zuŵa lakwamba la mwezi uwo, mazgu gha Yehova ghakizaso kwa ine, ghakati:  “Mwana wa munthu, yowoya kwa Farawo themba la Eguputo na ku viwuru vyake,+ uti: ‘Kasi ukuru wako ukuyana na njani?   Kukaŵa Musiriya, khuni la sidara mu Lebanoni, La minthavi yiwemi, lakuyana na thundu,* litali chomene, Ndipo songo yake yikafikanga ku mabingu.   Maji ghakalikuzga kuŵa likuru, ndimba ya maji yikalikuzga kuŵa litali. Tumilonga tukalizingilizga pose apo likapandika, Tumigelo twake tukathilira makuni ghose ghamuthondo.   Lekani likaŵa litali chomene kuluska makuni ghanyake ghose ghamuthondo. Minthavi* yake yikuruyikuru yikaŵa yinandi ndipo minthavi yake yinyake yikatalika chomene Chifukwa cha unandi wa maji mu tumilonga twake.   Viyuni vyose vyamudera vikazenga vivwimbo vyawo mu minthavi yake, Vinyama vyose vyamuthondo vikababirananga pasi pa minthavi yake. Ndipo mitundu yose ya ŵanthu yikakhalanga mu mfwiri wake.   Likatowa chomene chifukwa cha ukuru wake na utali wa minthavi yake, Pakuti misisi yake yikanjira pasi pa maji ghanandi.   Pakaŵavya khuni linyake la sidara la m’munda wa Chiuta+ ilo likayana nalo. Pakaŵavya khuni la junipa ilo likaŵa na minthavi yikuruyikuru nga ndilo, Pakaŵavyaso khuni la arimoni ilo likaŵa na minthavi nga njake. Pakaŵavya khuni la m’munda wa Chiuta ilo likayana nalo pa nkhani ya kutowa.   Nkhalitoweska, likaŵa na mahamba ghanandi, Ndipo makuni ghanyake ghose gha mu Edeni, mu munda wa Chiuta waunenesko ghakachita nalo sanji.’ 10  “Ntheura ichi ndicho Fumu Yikuru Yehova yayowoya: ‘Pakuti likaŵa litali chomene, na kutumphuska songo yake m’paka mu mabingu, ndipo mtima wake ukajikuzga chifukwa cha utali wake, 11  nilipelekenge ku muwusi wankhongono wa ŵamitundu.+ Wimikanenge nalo nadi, ine nilikanenge chifukwa cha uheni wake. 12  Ŵalendo, ŵawusi ŵankhaza chomene ŵa ŵamitundu, ŵalidumulirenge pasi, ndipo ŵalilekenge pa mapiri, mahamba ghake ghayoyokerenge mu madambo ghose, minthavi yake yiphyokerenge mu milonga yose ya mu charu.+ Ŵanthu wose ŵakukhala pa charu chapasi ŵazamufumako ku mfwiri wake na kulileka. 13  Viyuni vyose vyamudera vikhalenge pa chigodo chake, ndipo vinyama vyose vyamuthondo vikhalenge pa minthavi yake.+ 14  Vili nthena kuti pafupi na maji paleke kuŵa khuni litali chomene panji kuti songo yake yikafike mu mabingu, ndiposo kuti paŵavye khuni lakuthilirika makora lakuti likafike ku mabingu. Pakuti makuni ghose ghazamufwa, ghazamukhilira pasi pamoza na ŵana ŵa ŵanthu, awo ŵakukhilira ku khululu.’* 15  “Ichi ndicho Fumu Yikuru Yehova yayowoya, ‘Pa zuŵa ilo likukhilira ku Dindi,* nizamuliliska ŵanthu. Ntheura nizamubenekelera ndimba ya maji na kujara milonga yake kuti maji ghanandi ghaleke kwenda. Chifukwa cha khuni ili, nizamuchitiska mdima mu Lebanoni ndipo makuni ghose ghamuthondo ghazamufota. 16  Nizamumbwambwanthiska* mitundu para yapulika kapomezi ka kuwa kwake, para nalitolera ku Dindi* pamoza na wose awo ŵakukhilira ku khululu.* Ndipo makuni ghose gha m’munda wa Edeni,+ makuni ghakusankhika na ghawemi chomene gha mu Lebanoni, ghose ghakuthilirika makora ghazamusanguluskika kusi kwa charu. 17  Ghakhilira ku Dindi* pamoza na ilo, ku ŵakukomeka na lupanga,+ kwa awo ŵakalikhozgeranga, awo ŵakakhalanga mu mfwiri wake pakati pa ŵamitundu.’+ 18  “‘Kasi ni khuni wuli la mu Edeni ilo likayana nawe mu uchindami na ukuru?+ Kweni nawe uzamukhizgikira pasi pamoza na makuni gha mu Edeni, kusi kwa charu chapasi. Uzamugona pakati pa ŵambura kukotoleka, pamoza na awo ŵakomeka na lupanga. Ichi chizamuchitikira Farawo na viwuru vyake vyose,’ ndimo yayowoyera Fumu Yikuru Yehova.”

Mazgu Ghamusi

Mazgu ghanyake, “thung’unda; thunduzi; nguyi.”
Mazgu ghanyake, “Samba.”
Panji kuti, “dindi.”
Panji kuti, “Sheole,” ndiko kuti, malaro. Wonani Mang’anamuro gha Mazgu.
Panji kuti, “nizamukatakatiska.”
Panji kuti, “Sheole,” ndiko kuti, malaro. Wonani Mang’anamuro gha Mazgu.
Panji kuti, “dindi.”
Panji kuti, “Sheole,” ndiko kuti, malaro. Wonani Mang’anamuro gha Mazgu.