Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Ezekiyeli 28:1-26

IVYO VILI MU BUKU ILI

  • Uchimi wakwimikana na themba la Ture (1-10)

    • “Ndine chiuta” (2, 9)

  • Sumu yachitengero, kulilira themba la Ture (11-19)

    • “Ukaŵa mu Edeni” (13)

    • “Kerubi wakuphakazgika uyo wakubenekelera” (14)

    • ‘Ubendezi ukasangika mwa iwe’ (15)

  • Uchimi wakwimikana na Sidoni (20-24)

  • Israyeli wazamuweleraso ku charu chake (25, 26)

28  Mazgu gha Yehova ghakizaso kwa ine, ghakati:  “Mwana wa munthu, phalira mulongozgi wa Ture kuti, ‘Ichi ndicho Fumu Yikuru Yehova yayowoya: “Pakuti mtima wako wajikuzga,+ ukuyowoya kuti, ‘Ndine chiuta. Nkhukhala pa chitengo cha chiuta, mukati mu nyanja.’+ Kweni ndiwe munthu, uli chiuta chara, Nangauli mu mtima wako ukujiwona nga ndiwe chiuta.   Wona! Ndiwe wavinjeru kuluska Daniyeli.+ Kulije icho ntchakubisika kwa iwe.   Wajisambazga wekha na vinjeru vyako na umanyi wako, Ndipo ukulutilira kuwunganya golide na siliva mu nthamba zako.+   Ukasambazga chomene chifukwa cha kumanya malonda,+ Ndipo mtima wako ukajikuzga chifukwa cha usambazi wako.”’  “‘Ntheura ichi ndicho Fumu Yikuru Yehova yayowoya: “Pakuti mu mtima wako ukujiwona nga ndiwe chiuta,   Nikwizirenge na ŵalendo kuti ŵimikane nawe, ŵankhaza chomene pakati pa mitundu,+ Ndipo ŵazamusolora malupanga ghawo kwimikana na kutowa kwa vinjeru vyako Na kufipiska uchindami wako wakutowa.+   Ŵazamukukhizgira pasi mu khululu,* Ndipo uzamukomeka mwankhaza mukati mu nyanja.+   Kasi uzamuyowoyaso kuti, ‘Ndine chiuta’ ku ŵanthu awo ŵazamukukoma? Mu woko la awo ŵazamukufipiska, uzamuŵa munthu waka, chiuta chara.”’ 10  ‘Uzamufwira mu woko la ŵalendo nga ni munthu wambura kukotoleka, Pakuti ine nayowoya,’ ndimo yayowoyera Fumu Yikuru Yehova.” 11  Mazgu gha Yehova ghakizaso kwa ine, ghakati: 12  “Mwana wa munthu, wimbe sumu yachitengero, kulilira themba la Ture, ndipo uliphalire kuti, ‘Ichi ndicho Fumu Yikuru Yehova yayowoya: “Ukaŵa chakuwonerapo chakufikapo, Ukaŵa wakuzura na vinjeru+ na wakutowa chomene.+ 13  Ukaŵa mu Edeni, munda wa Chiuta. Ukatozgeka na malibwe ghakuzirwa gha mtundu uliwose, Libwe la rube, topazi, na yasipi, kurusolito, onike, yade, safiro, nofeki,+ na emeradi. Ndipo vyakuŵikamo malibwe agha vikaŵa vyagolide. Vikanozgeka pa zuŵa ilo ukalengekera. 14  Nkhakwimika iwe nga ni kerubi wakuphakazgika uyo wakubenekelera. Ukaŵa pachanya pa phiri lituŵa la Chiuta,+ ndipo ukendendekanga pakati pa malibwe ghakugolera moto. 15  Ukaŵa wambura kafukwa mu nthowa zako kufuma pa zuŵa ilo ukalengekera M’paka apo ubendezi ukasangikira mwa iwe.+ 16  Chifukwa cha unandi wa malonda ghako,+ Ukazura na nkhaza, ndipo ukamba kwananga.+ Ntheura nizamukuparanya+ na kukutaya kufuma pa phiri la Chiuta nga ntchinthu chakukazuzgika, Iwe kerubi wakubenekelera, uzamuwukapo pakati pa malibwe ghakugolera moto. 17  Mtima wako ukajikuzga chifukwa cha kutowa kwako.+ Ukavundiska vinjeru vyako chifukwa cha uchindami wako wakutowa.+ Nizamukuponya pa charu chapasi.+ Nizamukuŵika panthazi pa mathemba kuti ghazakakuwonenge. 18  Wafipiska malo ghako ghakupatulika chifukwa cha ukuru wa mulandu wako ndiposo chifukwa cha kuchita malonda mwaukhuluku. Nizamubuska moto kuti ugolere pakati pako, ndipo uzamukunyeska.+ Nizamukuzgora vyoto pamaso pa wose awo ŵakukuwona pa charu chapasi. 19  Wose awo ŵakakumanyanga mukati mu ŵamitundu ŵazamuti waka lwaha pakukudodoliska.+ Umaliro wako uzamuŵa wamabuchi na wakofya, Ndipo uzamuŵakoso chara muyirayira.”’”+ 20  Mazgu gha Yehova ghakizaso kwa ine, ghakati: 21  “Mwana wa munthu, lazga chisko chako ku charu cha Sidoni,+ ndipo uchime kwimikana nacho. 22  Uyowoye kuti: ‘Ichi ndicho Fumu Yikuru Yehova yayowoya: “Wona! Nkhwimikana nawe Sidoni, ndipo nizamuchindikika pakati pako. Ŵanthu ŵazamumanya kuti ine ndine Yehova para nazakapeleka cheruzgo pa iyo na kutuŵiskika mwa iyo. 23  Nizamumutumira nthenda yakofya ndipo ndopa zizamwenda mu misewu yake. Ŵakukomeka ŵazamuwa mukati mwake para lupanga lwimikana nayo kufumira ku vigaŵa vyose. Ndipo ŵazamumanya kuti ine ndine Yehova.+ 24  “‘“Penepapo nyumba ya Israyeli yizamuzingilizgikaso na vyakulasa vyakupweteka chara, nesi minga zakuŵinya,+ ivyo ni ŵanthu awo ŵakuŵagoska. Ndipo ŵanthu ŵazamumanya kuti ine ndine Fumu Yikuru Yehova.”’ 25  “‘Ichi ndicho Fumu Yikuru Yehova yayowoya: “Para nawunjikaso nyumba ya Israyeli kufumira ku ŵamitundu uko ŵakambininiskikira,+ nizamutuŵiskika mukati mwawo pamaso pa ŵamitundu.+ Pamasinda ŵazamukhala mu charu chawo+ icho nkhapeleka kwa muteŵeti wane Yakhobe.+ 26  Ŵazamukhalamo mwakufwasa,+ ndipo ŵazamuzenga nyumba na kupanda minda ya mpheska.+ Ŵazamukhalamo mwakufwasa para napeleka cheruzgo pa wose awo ŵaŵazingilizga, ŵeneawo ŵakaŵagoskanga.+ Ndipo ŵazamumanya kuti ine ndine Yehova Chiuta wawo.”’”

Mazgu Ghamusi

Panji kuti, “dindi.”