Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Ezekiyeli 17:1-24

IVYO VILI MU BUKU ILI

  • Chinthanguni cha nombo ziŵiri na khuni la mpheska (1-21)

  • Mphukira yiteta yizamuŵa khuni likuru la sidara (22-24)

17  Mazgu gha Yehova ghakizaso kwa ine, ghakati:  “Mwana wa munthu, yowoya chinthanguni na kulongosora ntharika yakukhwaskana na nyumba ya Israyeli.+  Uyowoye kuti, ‘Ichi ndicho Fumu Yikuru Yehova yayowoya: “Nombo yikuru,+ ya mapapindo ghakuru na ghatali, yakuŵa na mahungwa gha mitundu yakupambanapambana, yikiza ku Lebanoni+ na kubonthora kapachanya pa khuni la sidara.+  Yikabonthora mphukira yapachanya chomene pa sidara na kuluta nayo ku charu cha ŵamalonda* na kuyipanda mu msumba wa ŵamalonda.+  Yikatorako mbuto yinyake mu charu+ na kuyipanda mu munda wavundira. Yikapanda nga ni khuni la safasafa mumphepete mwa maji ghanandi.  Ntheura mbuto iyi yikaphuka na kuŵa khuni lifupi la mpheska lakuvwinthuka.+ Mahamba ghake ghakalazga mukati, ndipo misisi yake yikakulanga kusi kwake. Ntheura likazgoka khuni la mpheska ndipo likasunda mphukira na kufumiska minthavi.+  “‘“Kukizaso nombo yinyake yikuru+ yakuŵa na mapapindo ghakuru na ghakhomi.+ Khuni la mpheska ili likathazira misisi yake kwa iyo, kutali na mibedi iyo likapandikapo, ndipo minthavi yake yikathazira kwa nombo yira kuti yithilirenge.+  Likaŵa kuti lapandika mu munda uwemi pafupi na maji ghanandi kuti liphuke minthavi, kupambika vipambi, na kuŵa khuni likuru la mpheska.”’+  “Uyowoye kuti, ‘Ichi ndicho Fumu Yikuru Yehova yayowoya: “Kasi lichitenge makora? Kasi munyake wazgurenge yayi misisi yake,+ kuvundiska vipambi vyake, na kufoteska mphukira zake?+ Lomirenge chomene mwakuti lizamukhumba woko lankhongono panji ŵanthu ŵanandi yayi kuti lizgulike pamoza na misisi yake. 10  Nangauli lazgulika na kupandika pa malo ghanyake, kasi lichitenge makora? Asi lomirenge pepetu para mphepo ya kumafumiro gha dazi yaputira pa ilo? Lomilirenge pa mubedi apo likamera.”’” 11  Mazgu gha Yehova ghakizaso kwa ine, ghakati: 12  “Chonde, phalira nyumba yachigaluka kuti: ‘Kasi mukumanya yayi icho vinthu ivi vikung’anamura?’ Yowoya kuti, ‘Wonani! Themba la Babuloni likiza ku Yerusalemu na kutora themba na ŵakaronga ŵa mu msumba uwu kuluta nawo ku Babuloni.+ 13  Kweniso, likatora yumoza wa mphapu*+ yauthemba na kuchita nayo phangano na kumulapiska chilapo.+ Pamanyuma likatora ŵanalume ŵakumanyikwa ŵa mu charu na kuluta nawo,+ 14  mwakuti ufumu ukhizgike, uleke kukwezgeka, kuti ulutilire kuŵako pekha para ukusunga phangano lake.+ 15  Kweni paumaliro themba likagaluka+ pakutumizga mathenga ghake ku Eguputo kuti ŵalitumire mahachi+ na ŵankhondo ŵanandi.+ Kasi viliyenderenge makora? Kasi uyo wakuchita ivi wangapona chilango? Kasi wangaswa phangano na kupona?’+ 16  “‘“Umo ine niliri wamoyo,” ndimo yayowoyera Fumu Yikuru Yehova, “Uyo wakayuyura chilapo na kuswa phangano la themba* ilo likamwimika iyo* kuŵa themba, wamufwira mu Babuloni, mu malo agho themba ilo likukhala.+ 17  Para ŵalwani ŵazenga vibumira na viliŵa vyakulwerapo nkhondo kuti ŵaparanye maumoyo ghanandi, chiwuru chikuru cha nkhondo na ŵasilikari ŵanandi ŵa Farawo ŵamovwirenge chara+ pa nkhondo. 18  Wayuyura chilapo na kuswa phangano. Wachita vyose ivi nangauli wakalayizga,* ntheura waponenge chara.”’ 19  “‘Ntheura ichi ndicho Fumu Yikuru Yehova yayowoya: “Umo ine niliri wamoyo, nimulangenge chifukwa wayuyura chilapo chane+ na kuswa phangano lane. 20  Nizamutandazulira ukonde wane pa iyo ndipo wazamukoleka mu ukonde wane.+ Nizamuluta nayo ku Babuloni ndipo kwenekura ndiko tamweruzgirana chifukwa cha kuleka kugomezgeka uko wakanichitira.+ 21  Magulu ghake ghose gha nkhondo agho ghazamuchimbira ghazamuwa na lupanga, ndipo awo ŵazamukhalako ŵazamumbininikira ku vigaŵa vyose.+ Ndipo muzamumanya kuti ine Yehova, nayowoya.”’+ 22  “‘Ichi ndicho Fumu Yikuru Yehova yayowoya: “Nizamutora mphukira yapachanya chomene pa khuni la sidara+ na kuyipanda, nizamubonthora mphukira yiteta+ yapachanya pa khuni la sidara, ndipo nizamuyipanda nekha pachanya pa phiri litali chomene.+ 23  Nizamuyipanda pachanya pa phiri litali la Israyeli, minthavi yake yizamukura, ndipo yizamupambika chipambi na kuŵa khuni likuru la sidara. Kayuni ka mtundu uliwose kazamukhala kusi kwake, na kubisama mu mfwiri wa minthavi yake. 24  Ndipo makuni ghose ghamuthondo ghazamumanya kuti ine, Yehova, nakhizgira pasi khuni litali na kukwezga khuni lifupi,+ nomizga khuni lakubiliŵira na kuphukiska khuni lakomira.+ Ine Yehova, nayowoya na kuchita.”’”

Mazgu Ghamusi

Mazgu gheneko, “charu cha Kenani.”
Mazgu gheneko, “mbuto.”
Ndiko kuti, Nebukadinezara.
Ndiko kuti, Zedekiya.
Mazgu gheneko, “wakapeleka woko lake.”