Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Baibolo la pa Intaneti | MALEMBA GHAKUPATULIKA MU MANG'ANAMULIRO GHA CHARU CHIPHYA

Ezekiyeli 13:1-23

IVYO VILI MU BUKU ILI

  • Kwimikana na ntchimi zitesi (1-16)

    • Viliŵa vyautoto utuŵa viwenge (10-12)

  • Kwimikana na ntchimi zanakazi zitesi (17-23)

13  Mazgu gha Yehova ghakizaso kwa ine, ghakati:  “Mwana wa munthu, uchime kwimikana na ntchimi za Israyeli,+ ndipo uyowoye kwa awo ŵakwata mauchimi ghawo,*+ kuti: ‘Pulikani mazgu gha Yehova.  Ichi ndicho Fumu Yikuru Yehova yayowoya: “Soka kwa ntchimi zindere, izo zikulondezga mzimu wawo, uku zindawone kanthu!+  Iwe Israyeli, ntchimi zako zili nga mbakambwe ŵa mu mahami.  Mulutengeko chara ku malo ghakupankhuka gha mu linga lamalibwe kuti mukazengereso linga nyumba ya Israyeli,+ mwakuti Israyeli walutilire kwima mu nkhondo pa zuŵa la Yehova.”+  “Ŵawona mboniwoni zautesi na kuchima vyautesi, awo ŵakuti: ‘Agha ni mazgu gha Yehova,’ apo Yehova iyomwene wandaŵatumepo, ndipo ŵakulindilira kuti mazgu ghawo ghafiskikenge+.  Asi mwawona mboniwoni yautesi na kuchima vyautesi apo mukuti: ‘Agha ni mazgu gha Yehova,’ uku ine nindayowoyepo kalikose?”’  “‘Ntheura ichi ndicho Fumu Yikuru Yehova yayowoya: “‘Pakuti mwayowoya utesi ndipo mboniwoni zinu ni zautesi, nkhwimikana namwe,’ ndimo yayowoyera Fumu Yikuru Yehova.”+  Woko lane limikana na ntchimi izo zikuwona mboniwoni zautesi na kuchima vyautesi.+ Ziŵengepo chara pakati pa ŵanthu ŵane awo nkhuŵaphalira visisi, nesi kulembeka mu buku la nyumba ya Israyeli. Ziwelerenge chara ku charu cha Israyeli, ndipo mumanyenge kuti ine ndine Fumu Yikuru Yehova.+ 10  Vyose ivi ntchifukwa chakuti zapuluska ŵanthu ŵane pakuyowoya kuti, “Kuli mtende!” apo kulije mtende.+ Para ŵanthu ŵazenga chiliŵa chambura kukhora, ntchimi izi zikwiza na kuphaka utoto utuŵa.’+ 11  “Phalira awo ŵakuchiphaka utoto utuŵa kuti chiwenge. Kuzamulokwa vula yikuru, kuzamuwa vula yamalibwe, ndipo chimphepo chikuru chizamubwangandulira pasi chiliŵa ichi.+ 12  Para chiliŵa chawa, muzamufumbika kuti, ‘Kasi utoto uwo mukaphaka uli nkhu?’+ 13  “Ntheura ichi ndicho Fumu Yikuru Yehova yayowoya, ‘Nizamuputiska chimphepo chankhongono chifukwa cha kutukutwa kwane, kulokweska chivula chikuru chifukwa cha ukali wane, na kulokweska vula yamalibwe chifukwa cha kukwiya kwane. 14  Nizamubwangandura na kuwiskira pasi chiliŵa icho mukaphaka utoto utuŵa, ndipo fawundeshoni yake yizamufukulika. Para msumba ukuwa, imwe muzamuparanyikira nawo lumoza, ndipo muzamumanya kuti ine ndine Yehova.’ 15  “‘Para kutukutwa kwane kose napungulira pa chiliŵa na pa awo ŵakachiphaka utoto utuŵa, nizamuti kwa imwe: “Chiliŵa chilikoso chara, ndipo awo ŵakachiphakanga utoto nawo kulije.+ 16  Ntchimi zamara mu Israyeli, izo zikuchima vya Yerusalemu ndiposo izo zikuwona mboniwoni zamtende apo kulije mtende,”’+ ndimo yayowoyera Fumu Yikuru Yehova. 17  “Kweni iwe, mwana wa munthu, ulazge chisko chako ku ŵana ŵasungwana ŵa ŵanthu ŵako awo ŵakwata mauchimi ghawo, wimikane nawo, ndipo uŵachimire viheni. 18  Uŵaphalire kuti, ‘Ichi ndicho Fumu Yikuru Yehova yayowoya: “Soka ku ŵanakazi awo ŵakusona vinthu* vyakuvwara mu mawoko ghose na kupanga vyakudika ku mutu vyasayizi zakupambanapambana mwakuti ŵatore umoyo wa ŵanthu. Kasi mukukhumba kutora umoyo wa ŵanthu ŵane na kughanaghana kuti musungilirenge umoyo winu? 19  Kasi munifipiskenge mukati mwa ŵanthu ŵane chifukwa cha balere wakuzura woko na chimenyu cha chingwa,+ kukoma ŵanthu awo ŵakwenera kufwa yayi na kuleka ŵamoyo awo mbakwenelera nyifwa, mukuchita nthena mwa kupusika ŵanthu ŵane awo ŵakupulika mautesi ghinu?”’+ 20  “Ntheura ichi ndicho Fumu Yikuru Yehova yayowoya: ‘Imwe ŵanakazi, wonani, nimikana na vinthu vinu ivyo mwasona, ivyo mukuthya navyo ŵanthu nga nthuyuni, ndipo nivipalurenge mu mawoko ghinu, na kufwatura awo mukuŵakora nga nthuyuni. 21  Nipalurenge vyakudika vinu vya ku mutu na kuwombora ŵanthu ŵane mu woko linu, ndipo ŵazamuŵaso chinthu chakuti mukore chara para mwathya, ndipo muzamumanya kuti ine ndine Yehova.+ 22  Pakuti mwachitiska chitima wakunyoloka na utesi winu,+ apo ine nindamuyuzgepo, ndipo mwakhozga mawoko gha muheni+ mwakuti wakuwerako yayi ku nthowa yake yiheni na kuŵa wamoyo.+ 23  Ntheura, imwe ŵanakazi muwonengeso mboniwoni zautesi chara nesi kuwukwa,+ nithaskenge ŵanthu ŵane mu woko linu, ndipo mumanyenge kuti ine ndine Yehova.’”

Mazgu Ghamusi

Panji kuti, “awo ŵakuchima vya mu mtima wawo.”
Vinthu ivi vikaŵa vyamayere, vyakuvwara mu mawoko panji mu kasukusuku.