Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Ezekiyeli 1:1-28

IVYO VILI MU BUKU ILI

  • Ezekiyeli wali ku Babuloni, wawona mboniwoni za Chiuta (1-3)

  • Mboniwoni ya gileta la Yehova (4-28)

    • Kavuluvulu, bingu, na moto (4)

    • Vyamoyo vinayi (5-14)

    • Makhwiro ghanayi (15-21)

    • Mlengalenga wakunyezimira nga ni maji ghakukhoma (22-24)

    • Chitengo chaufumu cha Yehova (25-28)

1  Mu chaka cha 30, pa zuŵa lachinkhondi la mwezi wachinayi, apo nkhaŵa mukati mwa ŵanthu awo ŵakaŵa ku wuzga+ pafupi na mlonga wa Kebara,+ kuchanya kukajulika ndipo nkhamba kuwona mboniwoni za Chiuta.  Pa zuŵa lachinkhondi la mwezi uwo, mu chaka chachinkhondi kufuma apo Themba Yehoyakini+ likatolekera ku wuzga,  mazgu gha Yehova ghakiza kwa Ezekiyeli,* mwana wa Buzi wasembe,* pafupi na mlonga wa Kebara mu charu cha Ŵakalidi.+ Kwenekura, woko la Yehova likiza pa iyo.+  Apo nkhalaŵiskanga, nkhawona kavuluvulu+ wakufumira kumpoto, ndipo kukaŵa bingu likuru na moto wakung’anima*+ ndipo vikazingilizgika na kuŵala kukuru. Mukati mwa moto mukaŵa chinthu chakuwoneka nga ntchisulo chakunyezimira.*+  Mukati mwa moto uwu mukaŵa vinthu vyakuwoneka nga ni vyamoyo vinayi,+ ndipo chamoyo chilichose chikawonekanga nga ni munthu.  Chamoyo chilichose chikaŵa na visko vinayi na mapapindo ghanayi.+  Malundi ghawo ghakaŵa ghakunyoloka, ndipo vikandiro vya malundi ghawo vikaŵa nga ni vya tholi, ndipo vikanyezimiranga nga ni mkuŵa wakupuputika makora.+  Vikaŵa na mawoko gha munthu kusi kwa mapapindo ghawo ghanayi, ndipo vyose vinayi vikaŵa na visko na mapapindo.  Mapapindo ghawo ghakakhwaskananga limoza na linyake. Vyamoyo ivi vikazgokanga yayi pakwenda. Chilichose chikalutanga waka nyolonyolo kulazga kunthazi.+ 10  Visko vyawo vikawonekanga ntheura: Chamoyo chilichose pa vyamoyo vinayi ivi chikaŵa na chisko cha munthu, chisko cha nkhalamu+ kumalyero, chisko cha ng’ombe+ kumazere, ndipo chamoyo chilichose pa vyamoyo vinayi ivi chikaŵa na chisko+ cha nombo.+ 11  Umu ndimo visko vyawo vikaŵira. Mapapindo ghawo ghakatandazukira muchanya. Chilichose chikaŵa na mapapindo ghaŵiri agho ghakakhwaskananga ndipo mapapindo ghanyake ghaŵiri ghakabenekeleranga mathupi ghawo.+ 12  Chamoyo chilichose chikalutanga waka nyolonyolo kulazga kunthazi, vikalutanga kulikose uko mzimu wakhumba kuti vilute.+ Vikazgokanga yayi pakwenda. 13  Vyamoyo ivi vikawonekanga nga ni makara ghakugolera moto, ndipo pakati pa vyamoyo ivi pakendendekanga chinthu chakuwoneka nga ni miliko yakugolera moto wakuŵala chomene. Mukati mwa moto+ mukamwetukanga leza. 14  Para vyamoyo ivi vikuluta kunthazi na kuwerako, kendero kawo kakawonekanga nga ni leza wakumwetuka. 15  Apo nkhalaŵiskanga vyamoyo ivi, nkhawona khwiro* limoza ilo likaŵa pasi pafupi na chamoyo chilichose cha visko vinayi.+ 16  Makhwiro na kapangikiro kake ghakawonekanga nga ni libwe lakunyezimira la kurusolito, ndipo ghose ghanayi ghakaŵa ghakuyana. Kawonekero na kapangikiro kake kakaŵa nga ni para khwiro lili mukati mwa khwiro linyake. 17  Para ghakwenda, ghakalutanga ku chigaŵa chilichose cha vigaŵa vinayi kwambura kuzgoka. 18  Vingelengele vya makhwiro vikaŵa vitali chomene mwakuti vikawofyanga, ndipo vingelengele vya makhwiro ghose ghanayi vikaŵa na maso zingilizge.+ 19  Para vyamoyo vikwenda, makhwiro nagho ghakendanga navyo lumoza, ndipo para vyamoyo vyanyamuka kufuma pasi, makhwiro naghoso ghakanyamukiranga muchanya.+ 20  Vikalutanga uko mzimu wakhumba kuti vilute, kulikose uko mzimu ukalutanga. Makhwiro ghakanyamukiranga navyo lumoza, chifukwa mzimu uwo ukaŵa pa vyamoyo ukaŵaso mu makhwiro. 21  Para vikwenda, makhwiro nagho ghakendanga, ndipo para vimilira, nagho ghakimiliranga, ndipo para vyanyamuka kufuma pasi, makhwiro nagho ghakanyamukiranga navyo lumoza, chifukwa mzimu uwo ukaŵa pa vyamoyo ukaŵaso mu makhwiro. 22  Pachanya pa mitu ya vyamoyo ivi pakaŵa chinthu chinyake chakuwoneka nga ni mlengalenga icho chikanyezimiranga nga ni maji ghakukhoma ghakuchitiska wofi, chikatandazulika pachanya pa mitu yawo.+ 23  Kusi kwa mlengalenga, mapapindo ghawo ghakaŵa nyolonyolo,* limoza kulazga ku linyake. Chamoyo chilichose chikaŵa na mapapindo ghaŵiri ghakubenekelera chigaŵa chimoza, na ghanyakeso ghaŵiri ghakubenekelera chigaŵa chinyake cha mathupi ghawo. 24  Apo nkhapulikanga chongo cha mapapindo ghawo, chikaŵa nga nkhupoma kwa maji ghanandi, nga nkhududumira kwa Wankhongonozose.+ Para vikwenda, pakapulikikwanga chiwawa nga ntcha ŵasilikari. Para vimilira, vikakhizgiranga pasi mapapindo ghawo. 25  Pachanya pa mlengalenga uwo ukaŵa pachanya pa mitu yawo, pakapulikikwa mazgu. (Para vimilira, vikakhizgiranga pasi mapapindo ghawo.) 26  Pachanya pa mlengalenga uwo ukaŵa pachanya pa mitu yawo pakaŵa chinthu chakuwoneka nga ni libwe la safiro,+ ndipo chikawonekanga nga ntchitengo chaufumu.+ Pa chitengo pakakhala munyake wakuwoneka nga ni munthu.+ 27  Nkhawona chinthu chinyake chakung’anima+ nga ntchisulo chakunyezimira icho chikaŵa nga ni moto ukufuma mu icho chikawonekanga nga ntchiwuno* chake kuya muchanya. Ndipo kufuma mu chiwuno chake kukhilira musi, nkhawona chinthu chakukozgana na moto.+ Pakaŵa ungweru ukuru uwo ukamuzingilizga 28  nga ntchiŵingavula*+ icho chili mu bingu pa zuŵa ilo vula yikulokwa. Umu ndimo ukawonekeranga ungweru ukuru uwo ukamuzingilizga. Ukawonekanga nga mbuchindami wa Yehova.+ Nkhati nawona, nkhasindamira pasi chisko chane ndipo nkhapulika munyake wakuyowoya mazgu.

Mazgu Ghamusi

Kung’anamura kuti, “Chiuta Wakukhozga.”
Mazgu ghanyake, “musofi.”
Panji kuti, “na leza.”
Mazgu ghanyake, “chakung’azima.”
Mazgu ghanyake, “wilo; tayala.”
Pangayowoyekaso kuti, “ghakatandawuka nyolonyolo.”
Mazgu ghanyake, “luwunda.”
Mazgu ghanyake, “chipingavula.”