Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Baibolo la pa Intaneti | MALEMBA GHAKUPATULIKA MU MANG'ANAMULIRO GHA CHARU CHIPHYA

2 Midauko 15:1-19

IVYO VILI MU BUKU ILI

  • Asa wakusintha vinthu (1-19)

15  Mzimu wa Chiuta ukiza pa Azariya mwana wa Odedi.  Ntheura wakaluta kukakumana na Asa, wakati: “Pulikani, imwe Asa na Yuda yose na Benjamini. Yehova wali namwe apo imwe muchali nayo.+ Usange mukumupenja, mumusangenge,+ kweni usange mukumusida, nayo wamusidaninge.+  Pakuti Israyeli wakakhala nyengo yitali* kwambura Chiuta waunenesko, kwambura wasembe wakusambizga, kweniso kwambura dango.+  Kweni ŵakati ŵawelera kwa Yehova Chiuta wa Israyeli mu suzgo yawo na kumupenja, wakasangika.+  Mu nyengo zira, pakaŵavya munthu wakwenda mwakufwasa,* chifukwa chakuti kukaŵa vitimbaheti vikuru pakati pa wose awo ŵakakhalanga mu vyaru.  Mtundu ukaparanyikanga na mtundu unyake, msumba na msumba unyake, chifukwa Chiuta wakaŵatimbanizga na suzgo ya mtundu uliwose.+  Kweni imwe, muŵe ŵankhongono, mungathikanga lusoko yayi,*+ chifukwa mupokerenge njombe pa mulimo winu.”  Asa wakati wapulika waka mazgu agha na uchimi wa Odedi ntchimi, wakakhwima mtima, wakafumiskamo ŵangoza ŵakuseluska mu charu chose cha Yuda+ na Benjamini kweniso mu misumba iyo wakapoka mu chigaŵa cha mapiri cha Efurayimu, ndipo wakawezgerapo jotchero la Yehova ilo likaŵa panthazi pa khonde la Yehova.+  Kufuma apo, wakawunganya Yuda yose na Benjamini, na ŵalendo awo ŵakaŵa nawo kufuma kwa Efurayimu, Manase, na Simiyoni,+ pakuti ŵanandi chomene ŵakagwenthera kwa iyo kufuma ku Israyeli ŵakati ŵawona kuti Yehova Chiuta wake wakaŵa nayo. 10  Ntheura ŵakawungana ku Yerusalemu mu mwezi wachitatu wa chaka cha 15 cha kuwusa kwa Asa. 11  Pa zuŵa lira ŵakapeleka sembe kwa Yehova kufuma pa vinthu ivyo ŵakayora ku nkhondo, ng’ombe 700 na mberere 7,000. 12  Kweniso ŵakanjira mu phangano kupenja Yehova Chiuta wa ŵasekuru ŵawo na mtima wawo wose kweniso umoyo wawo wose.+ 13  Yose uyo wakapenjako chara Yehova Chiuta wa Israyeli wakeneranga kukomeka, kwali ni muchoko panji mukuru, mwanalume panji mwanakazi.+ 14  Ntheura ŵakachita chilapo kwa Yehova na lizgu likuru, pamoza na kuchemerezga mwachimwemwe, na kulira kwa mbata na veve.* 15  Yuda yose wakasekelera na chilapo, pakuti ŵakachita chilapo na mtima wawo wose, ŵakamupenja mwamwamphu, ndipo wakasangika.+ Yehova wakalutilira kuŵapa chipumulo kosekose.+ 16  Asa themba wakawuskapo Maka+ buya wake pa udindo wake wa ufumukazi, chifukwa wakapanga chikozgo chakuseluska kuti ŵanthu ŵasopenge chikhuni chakupatulika.*+ Asa wakadumulira pasi chikozgo chakuseluska chira, wakachivikita na kuchiwotchera mu Dambo la Kidironi.+ 17  Kweni malo ghapachanya ghakafumiskikamo chara+ mu Israyeli.+ Ndipouli, mtima wa Asa ukaŵa wakufikapo* umoyo wake wose.*+ 18  Wakatora vinthu ivyo iyo na awiske ŵakavituŵiska na kuvinjizga mu nyumba ya Chiuta waunenesko, siliva, golide, na viteŵetero vyakupambanapambana.+ 19  Kukaŵavya nkhondo m’paka mu chaka cha 35 cha kuwusa kwa Asa.+

Mazgu Ghamusi

Mazgu gheneko, “mazuŵa ghanandi.”
Mazgu gheneko, “pakaŵavya mtende kwa uyo wakafumanga panji uyo wakanjiranga.”
Mazgu gheneko, “mawoko ghinu ghangalepwetukanga yayi.”
“Veve,” ni sengwe la nyama ilo ŵakulizga.
Panji kuti, “wakujipeleka fikepo.”
Mazgu gheneko, “mazuŵa ghake ghose.”