Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

1 Midauko 21:1-30

IVYO VILI MU BUKU ILI

  • Davide wananga kupenda ŵanthu (1-6)

  • Chilango chakufuma kwa Yehova (7-17)

  • Davide wakuzenga jotchero (18-30)

21  Satana* wakimikana na Israyeli ndipo wakavundura Davide kuti wapende Israyeli.+  Ntheura Davide wakati kwa Yowabu+ na ku ŵalongozgi ŵa ŵanthu: “Lutani, mukapende Israyeli kwamba ku Beyere-sheba m’paka ku Dani.+ Muzakaniphalire kuti nimanye unandi wawo.”  Kweni Yowabu wakati: “Yehova wandaniske ŵanthu ŵake m’paka kahandiredi! Fumu yane themba, asi wose aŵa mbateŵeti kale ŵa fumu yane? Chifukwa wuli fumu yane yikukhumba kuchita ichi? Chifukwa wuli yikukhumba kunangiska Israyeli?”  Kweni mazgu gha themba ghakaluska gha Yowabu. Ntheura Yowabu wakaluta na kwenda mu Israyeli yose, pamasinda wakizaso ku Yerusalemu.+  Yowabu wakamupa Davide unandi wa ŵanthu awo ŵakapendeka. Israyeli yose wakakwana ŵanalume ŵakuyegha malupanga 1,100,000, ndipo Yuda, ŵanalume ŵakuyegha malupanga+ 470,000.  Kweni Levi na Benjamini ŵakapendeka chara,+ chifukwa mazgu gha themba ghakamukondweska yayi Yowabu.+  Sono ichi chikamukwiyiska chomene Chiuta waunenesko, ntheura wakatimba Israyeli.  Penepapo Davide wakati kwa Chiuta waunenesko: “Nananga+ chomene pakuchita ichi. Sono nkhumuŵeyani, gowokerani ubudi+ wa muteŵeti winu, pakuti nachita uchindere ukuru chomene.”+  Yehova wakayowoya kwa Gadi,+ muwoni wa Davide, kuti: 10  “Luta, ukati kwa Davide: ‘Yehova wakuti: “Nkhukupa vinthu vitatu. Usankhepo chimoza chakuti nikuchitire.”’” 11  Ntheura Gadi wakaluta kwa Davide, wakati: “Yehova wakuti, ‘Usankhepo chimoza, 12  kwali nikukhizgire njara+ vyaka vitatu, panji myezi yitatu ya kuparanyika apo ŵalwani ŵako ŵakukuskera+ na lupanga. Panji paŵe mazuŵa ghatatu gha lupanga lwa Yehova, ulo ni nthenda yakofya mu charu,+ pamoza na mungelo wa Yehova uyo wakuparanya+ mu vigaŵa vyose vya Israyeli.’ Sono ughanaghanirepo chakuti nkhazgore uyo wanituma.” 13  Davide wakati kwa Gadi: “Apa nafyenyeka chomene. Mbwenu niwire waka mu woko la Yehova, pakuti lusungu lwake ndukuru chomene.+ Kweni ningawiranga mu woko la munthu chara.”+ 14  Penepapo Yehova wakatuma nthenda yakofya+ pa Israyeli, ŵanthu 70,000 mu Israyeli ŵakawa.+ 15  Chiuta waunenesko wakatumaso mungelo ku Yerusalemu kuti wamuparanye. Kweni apo wakaŵa pafupi kuparanya, Yehova wakawona ndipo wakachita chitima na soka+ lira. Ntheura wakati kwa mungelo uyo wakatumika kuparanya: “Mbwenu.+ Gowozga woko lako.” Mungelo wa Yehova wakimilira pafupi na malo ghakupwanthirapo gha Orinani+ Muyebusi.+ 16  Davide wakati winuska maso ghake, wakawona mungelo wa Yehova wimilira pakatikati pa charu chapasi na kuchanya, uku wanyoloskera lupanga+ lwa mu woko lake pa Yerusalemu. Nyengo yeneyiyo, Davide na ŵalara ŵakawa pasi kavunama,+ uku ŵavwara vigudulu.+ 17  Penepapo Davide wakati kwa Chiuta waunenesko: “Asi ine ndine nkhayowoya kuti ŵanthu ŵapendeke? Ine ndine nili kunanga, ndipo ndine nili kubuda.+ Kweni kasi mberere izi zachitachi? A Yehova Chiuta wane, naŵeya, woko linu limikane na ine na nyumba ya adada. Kweni lekani kukhizgira nthenda iyi pa ŵanthu ŵinu.”+ 18  Mungelo wa Yehova wakaphalira Gadi+ kuti wakaphalire Davide kuti wakwere na kukazengera jotchero Yehova pa malo ghakupwanthirapo gha Orinani Muyebusi.+ 19  Ntheura Davide wakakwera kuyana na mazgu gha Gadi, agho wakayowoya mu zina la Yehova. 20  Pa nyengo yira, Orinani wakazgoka na kuwona mungelo. Ŵana ŵake ŵanayi awo ŵakaŵa nayo ŵakabisama. Orinani wakaburanga tirigu. 21  Davide wakati wiza kwa iyo, Orinani wakalaŵiska na kumuwona. Nyengo yeneyiyo wakafumapo pa malo ghakupwanthirapo ndipo wakasindamira Davide m’paka chisko pasi. 22  Davide wakati kwa Orinani: “Uniguliske* malo ghakupwanthirapo, nizengerepo jotchero Yehova. Uniguliske pa mtengo wake wose, mwakuti nthenda yakofya iyo yawira ŵanthu yileke.”+ 23  Orinani wakati kwa Davide: “Torani kuŵa ghinu, ndipo fumu yane themba yichite nagho icho ntchiwemi kwa iyo.* Wonani, nkhumupaniso ng’ombe kuŵa sembe zakotcha na chakupwanthira+ kuŵa nkhuni kweniso tirigu kuŵa sembe ya vyamuminda. Vyose nkhumupani.” 24  Kweni Themba Davide likati kwa Orinani: “Yayi, ine nkhukhumba kugura pa mtengo wake wose, chifukwa ningatora chara icho ntchako na kupeleka kwa Yehova nesi kupeleka sembe zakotcha izo ine nindatayepo chilichose.”+ 25  Ntheura Davide wakamupimira Orinani mashekele* gha golide 600 kugura malo ghara. 26  Davide wakazengera Yehova jotchero+ penepara, wakapelekapo sembe zakotcha na sembe zawenenawene, ndipo wakachema pa Yehova, uyo wakamuzgora na moto+ kufuma kuchanya pa jotchero la sembe yakotcha. 27  Penepapo Yehova wakaphalira mungelo+ kuti wawezgere lupanga lwake umo lukukhala. 28  Pa nyengo yira, Davide wakati wawona kuti Yehova wamuzgora pa malo ghakupwanthirapo gha Orinani Muyebusi, wakalutilira kupeleka sembe penepara. 29  Kweni chihema cha Yehova icho Mozesi wakapanga mu mapopa, na jotchero la sembe yakotcha vikaŵa ku malo ghapachanya ku Gibiyoni pa nyengo yira.+ 30  Ndipouli, Davide wakalutako yayi kukafumba kwa Chiuta panthazi pake, chifukwa wakawopanga lupanga lwa mungelo wa Yehova.

Mazgu Ghamusi

Pangayowoyekaso kuti, “wakususka.”
Mazgu gheneko, “Unipe.”
Mazgu gheneko, “icho ntchiwemi mu maso ghake.”
Shekele limoza likuyana na magiramu 11.4. Wonani Vyakusazgirapo B14.