Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

1 Midauko 18:1-17

IVYO VILI MU BUKU ILI

  • Nkhondo izo Davide wakatonda (1-13)

  • Ŵanthu ŵa maudindo mu ufumu wa Davide (14-17)

18  Pamanyuma, Davide wakawukira Ŵafilisiti na kuŵathereska, wakapoka Gati+ na mizi yake mu mawoko gha Ŵafilisiti.+  Kufuma apo, wakathereska Mowabu.+ Ŵamowabu ŵakazgoka ŵateŵeti ŵa Davide ndipo ŵakizanga na mithulo.+  Davide wakathereska Hadadezeri+ themba la Zoba+ pafupi na Hamati+ apo wakalutanga kukakhozga mazaza ghake ku Mlonga wa Yufurate.+  Davide wakapoka magileta 1,000, ŵapamahachi 7,000, na ŵasilikari ŵakwenda pasi 20,000.+ Penepapo Davide wakadumura misipa ya mahachi ghose, wakalekapo waka 100.+  Ŵasiriya ŵa ku Damaseko ŵakati ŵiza kuzakawovwira Hadadezeri themba la Zoba, Davide wakakomapo Ŵasiriya 22,000.+  Kufuma apo, Davide wakaŵika ŵasilikari mu Siriya wa ku Damaseko. Ŵasiriya ŵakazgoka ŵateŵeti ŵa Davide, ndipo ŵakizanga na mithulo. Yehova wakamovwiranga Davide kuthereska ŵalwani ŵake kulikose uko wakalutanga.+  Davide wakatoraso viskango vyagolide ku ŵateŵeti ŵa Hadadezeri, wakiza navyo ku Yerusalemu.  Davide wakatora mkuŵa unandi chomene kufuma ku Tibati na Kuni, misumba ya Hadadezeri. Mkuŵa uwu Solomoni wakapangira Nyanja yamkuŵa,+ mizati, na viteŵetero vyamkuŵa.+  Toyu themba la Hamati wakati wapulika kuti Davide wathereska ŵankhondo wose ŵa Hadadezeri+ themba la Zoba,+ 10  nyengo yeneyiyo wakatuma mwana wake Hadoramu kwa Themba Davide kukamuwona na kumuwonga chifukwa chakuti wakarwa na kuthereska Hadadezeri, (pakuti kanandi Hadadezeri wakarwanga na Toyu), ndipo wakiza na mtundu wose wa vinthu vyagolide, siliva, na mkuŵa. 11  Vinthu ivi Themba Davide likavituŵiskira Yehova,+ pamoza na siliva na golide ivyo likayora ku mitundu yose, kwa Edomu, Mowabu, Ŵaamoni,+ Ŵafilisiti,+ na Ŵaamaleki.+ 12  Abishayi+ mwana wa Zeruya+ wakakoma Ŵaedomu 18,000 mu Dambo la Mchere.+ 13  Wakaŵika ŵasilikari mu Edomu, ndipo Ŵaedomu wose ŵakazgoka ŵateŵeti ŵa Davide.+ Yehova wakamovwiranga Davide kuthereska ŵalwani ŵake kulikose uko wakalutanga.+ 14  Davide wakalutilira kuwusa pa Israyeli yose,+ ndipo wakachitiranga ŵanthu ŵake wose urunji na kweruzga mwakunyoloka.+ 15  Yowabu mwana wa Zeruya wakaŵa mulongozgi wa ŵankhondo,+ Yehoshafati+ mwana wa Ahiludi wakaŵa wakulemba mdauko. 16  Zadoki mwana wa Ahitubu na Ahimeleki mwana wa Abiyatara ŵakaŵa ŵasembe, ndipo Shavisha wakaŵa mulembi. 17  Benaya mwana wa Yehoyada wakalaŵiliranga Ŵakereti+ na Ŵapeleti,+ ndipo ŵana ŵa Davide ŵakaŵa ŵakwamba mu maudindo kufuma pa themba.

Mazgu Ghamusi