Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

1 Midauko 13:1-14

IVYO VILI MU BUKU ILI

  • Likasa latoleka kufuma ku Kiriyati-yerimu (1-14)

13  Davide wakadumbiskana na ŵalongozgi ŵa vikwi, ŵa mahandiredi na mulongozgi waliyose.+  Ndipo Davide wakati ku mpingo wose wa Israyeli: “Usange ntchiwemi kwa imwe na chakuzomerezgeka kwa Yehova Chiuta withu, tiyeni titume mazgu ku ŵabali ŵithu wose awo ŵakhalako mu vigaŵa vyose vya Israyeli, ku ŵasembe, na Ŵalevi mu misumba+ yawo na malo ghakuliskako viŵeto, kuti ŵazakawungane nase.  Tikatore Likasa+ la Chiuta withu.” Pakuti mu mazuŵa gha Sauli ŵakaŵa nalo na ntchito yayi.+  Mpingo wose ukakolerana kukalitora, pakuti ŵanthu wose ŵakawona kuti ntchiwemi.  Ntheura Davide wakawunganya Israyeli yose kufuma ku mlonga* wa Eguputo m’paka ku Lebo-hamati*+ kuti ŵakatore Likasa la Chiuta waunenesko ku Kiriyati-yerimu.+  Davide na Israyeli yose ŵakakwera ku Baala,+ ku Kiriyati-yerimu, kwa Yuda, kukatora Likasa la Yehova, Chiuta waunenesko, uyo wakukhala pachanya* pa ŵakerubi,+ apo zina lake likuchemeka.  Kweni ŵakaŵika Likasa la Chiuta waunenesko mu gileta liphya+ na kufuma nalo mu nyumba ya Abinadabu. Uza na Ahiyo ndiwo ŵakendeskanga gileta.+  Davide na Israyeli yose ŵakasekeleranga chomene pamaso pa Chiuta waunenesko na nkhongono zawo zose. Pakaŵa kwimba sumu, kulizga ŵabango, vyakwimbira vya vingwe, tung’oma,+ makumbalo,*+ na mbata.+  Ŵakati ŵafika pa malo ghakupwanthirapo gha Kidoni, Uza wakanyoloska woko lake na kukora Likasa, pakuti ng’ombe zikaŵa pafupi kuligudubura. 10  Penepapo ukali wa Yehova ukagolera pa Uza, wakamutimba chifukwa wakanyoloskera woko lake pa Likasa,+ ndipo wakafwira pamaso pa Chiuta.+ 11  Kweni Davide wakakwiya chifukwa chakuti ukali wa Yehova ukagolera pa Uza. Ndipo malo ghara ghakuchemeka Perezi-uza* m’paka lero. 12  Pa zuŵa lira, Davide wakawopa chomene Chiuta waunenesko, wakati: “Kasi ningiza nalo wuli Likasa la Chiuta waunenesko kwa ine?”+ 13  Davide wakatondeka kwiza nalo Likasa uko iyo wakaŵa mu Msumba wa Davide, kweni wakalitolera ku nyumba ya Obedi-edomu Mugiti. 14  Likasa la Chiuta waunenesko likaŵa mu nyumba ya Obedi-edomu, ndipo likakhala mu nyumba yake myezi yitatu. Yehova wakatumbika nyumba ya Obedi-edomu na vyose ivyo wakaŵa navyo.+

Mazgu Ghamusi

Panji kuti, “kufuma ku Shihori.”
Panji kuti, “pakunjilira ku Hamati.”
Pangayowoyekaso kuti, “pakati.”
“Kumbalo,” ntchinthu chakuvungulika nga ni mbale icho ŵakwimbira.
Kung’anamura kuti, “Apo Uza Wakaphwamulikira.”