Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Baibolo la pa Intaneti

MALEMBA GHAKUPATULIKA MU MANG'ANAMULIRO GHA CHARU CHIPHYA

Ŵeruzgi 17:1-13

IVYO VILI MU BUKU ILI

  • Vikozgo vya Mika na wasembe wake (1-13)

17  Mu chigaŵa cha mapiri cha Efurayimu+ mukaŵa munthu zina lake Mika.  Iyo wakayowoya na anyina kuti: “Masiliva 1,100 agho ghakatoleka kwa imwe, ndipo nkhapulika mukutemberapo nthembo, ghali na ine. Ndine nkhatora.” Anyina ŵakati: “Yehova wamutumbike mwana wane.”  Ntheura wakawezga masiliva 1,100 kwa anyina. Kweni anyina ŵakati: “Nituŵiskirenge Yehova siliva lakufuma mu woko lane kuti mwana wane wapangire chikozgo chakuŵaja na chikozgo chachisulo.*+ Sono nkhuwezgera kwa iwe.”  Wakati wawezga siliva kwa anyina, anyina ŵakatora masiliva 200, ŵakaghapeleka kwa wakufura* siliva. Iyo wakapangira chikozgo chakuŵaja na chikozgo chachisulo.* Vikaŵikika mu nyumba ya Mika.  Mika uyu wakaŵa na nyumba ya ŵachiuta, wakapanga efodi+ na vikozgo vya terafimu,*+ ndipo wakimika* yumoza wa ŵana ŵake kuŵa wasembe* wake.+  Mu mazuŵa ghara, mukaŵavya themba mu Israyeli.+ Waliyose wakachitanga icho ntchakwenelera mu maso ghake.*+  Sono mu Betelehemu+ ku Yuda mukaŵa munyamata munyake uyo wakaŵa wa mbumba ya Yuda. Iyo wakaŵa Mulevi,+ ndipo wakaŵa kuti wakhalako kanyengo.  Munthu uyu wakafuma mu msumba wa Betelehemu mu Yuda kukapenja malo ghakukhalako. Apo wakendanga, wakafika ku chigaŵa cha mapiri cha Efurayimu ku nyumba ya Mika.+  Penepapo Mika wakati kwa iyo: “Kasi wafuma nkhu?” Iyo wakati: “Ndine Mulevi wakufuma ku Betelehemu mu Yuda, ndipo nkhupenja malo ghakukhalako.” 10  Ntheura Mika wakati kwa iyo: “Ukhale na ine, uŵe dada* na wasembe wane. Nikupenge masiliva 10 pa chaka, vyakuvwara, na chakurya.” Mulevi yura wakakhala nadi. 11  Mulevi yura wakazomera kukhala na Mika, ndipo munyamata yura wakaŵa nga njumoza wa ŵana ŵake. 12  Kweniso Mika wakimika* Mulevi yura kuŵa wasembe wake,+ ndipo wakakhalanga mu nyumba ya Mika. 13  Penepapo Mika wakati: “Sono namanya kuti Yehova wanichitirenge uwemi, chifukwa Mulevi ndiyo ngwasembe wane.”

Mazgu Ghamusi

Panji kuti, “chikozgo chakusongonora.”
Mazgu ghanyake, “wakuskana.”
Panji kuti, “chikozgo chakusongonora.”
Panji kuti, “ŵachiuta ŵa pa nyumba; ŵangoza.”
Mazgu gheneko, “wakazuzga woko la.”
Mazgu ghanyake, “musofi.”
Panji kuti, “icho wakaghanaghananga kuti ntchakwenelera.”
Panji kuti, “wakunipa fundo.”
Mazgu gheneko, “wakazuzga woko la.”