Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Baibolo la pa Intaneti | MALEMBA GHAKUPATULIKA MU MANG'ANAMULIRO GHA CHARU CHIPHYA

Ŵahebere 5:1-14

IVYO VILI MU BUKU ILI

  • Umo Yesu wakuluskira ŵasembe ŵanyake (1-10)

    • Nga umo vikaŵira na Melekizedeki (6, 10)

    • Wakasambira kupulikira kwizira mu ivyo wakasuzgika navyo (8)

    • Wakuŵapa chiponosko chamuyirayira (9)

  • Chakurya chakukhoma (11-14)

5  Wasembe mukuru waliyose uyo wakutoleka mu ŵanthu, wakwimikika m’malo mwa iwo pa vinthu vya Chiuta+ kuti wapelekenge vyawanangwa na sembe chifukwa cha zakwananga.+  Iyo wakuŵachitira chiwuravi ŵanthu ŵambura kumanya kanthu na ŵakwananga,* pakuti nayo wakulimbana na kulopwa kwake.  Lekani wakupeleka sembe ya zakwananga zake nga umo wakupelekera ya zakwananga za ŵanthu wose.+  Munthu wakupika ntchindi izi mu khumbo lake yayi, kweni wakuzipokera pekha para wachemeka na Chiuta, nga umo vikaŵira na Aroni.+  Khristu nayo wakajichindika yekha yayi+ pakuŵa wasembe mukuru, kweni wakachindikika na uyo wakayowoya nayo kuti: “Iwe ndiwe Mwana wane, muhanya uno nazgoka wuso.”+  Kweniso nga umo wakayowoyera pa malo ghanyake kuti: “Ndiwe wasembe muyirayira nga umo vikaŵira na Melekizedeki.”+  Mu umoyo wake wa pa charu chapasi,* Khristu wakaŵeyelera na kulomba, pamoza na kulira chomene na masozi,+ kwa Uyo wakaŵa na nkhongono zakumuponoska ku nyifwa, ndipo wakapulikikwa chifukwa cha kopa Chiuta.  Nangauli wakaŵa mwana, wakasambira kupulikira kwizira mu vinthu ivyo wakasuzgika navyo.+  Wakati wazgoka wakufikapo,+ wakaŵa na mulimo wa kuŵapa chiponosko chamuyirayira wose awo ŵakumupulikira.+ 10  Vili nthena chifukwa wali kusoleka na Chiuta kuŵa wasembe mukuru nga umo vikaŵira na Melekizedeki.+ 11  Tili na vinandi vyakuti tiyowoye vya iyo, ndipo ntchakusuzga kuvilongosora, chifukwa mukupulika luŵiro yayi. 12  Nangauli pasono* mukwenera kuŵa ŵasambizgi, mukukhumbikwiraso munthu kuti wamusambizgani kufuma pakwamba vinthu vyakwambilira+ vya mazgu ghakupatulika gha Chiuta. Mwazgokaso nga ni awo ŵakukhumbikwira mkaka, chakurya chakukhoma yayi. 13  Pakuti waliyose uyo wakulutilira kumwa mkaka, wandamanye mazgu gha urunji, chifukwa ni mwana muchoko.+ 14  Kweni chakurya chakukhoma ntcha ŵanthu ŵakukhwima, awo ŵali kuzgoŵezga nkhongono zawo zakamanyiro* kupambaniska pakati pa chiwemi na chiheni.

Mazgu Ghamusi

Panji kuti, “ŵakupuluka.”
Mazgu gheneko, “Mazuŵa agho wakaŵira mu thupi.”
Mazgu gheneko, “kuyana na nyengo.”
Panji kuti, “nkhongono zawo zakaghanaghaniro.”