Pa February 11, 2024, kukachitika maseŵero gha bola ghakumanyikwa na zina lakuti Super Bowl, ndipo maseŵero agha ghakachitikira ku Las Vegas, Nevada, U.S.A. Mu sabata iyo maseŵero agha ghakaŵa pafupi kuchitika, ŵanthu pafupifupi 300,000 ŵakaluta ku malo agha. Ŵabali na ŵadumbu ŵakaŵika tumashelufu twa mabuku mu malo 50 agho ŵanthu ŵakajumphanga chomene ku Las Vegas Boulevard. Mabuku ghakulongosora Baibolo ghakaŵikika mu viyowoyero 9. Ŵabali na ŵadumbu pafupifupi 1,500 ŵakachitako upharazgi uwu. Pasi apa pali vinyake mwa vinthu viwemi ivyo vikachitika pa nyengo ya upharazgi wapadera uwu.

Mwanalume munyake wakajumpha pafupi na kashelufu ka mabuku apo pakalembeka fumbo lakuti, “Kasi Charu Ichi Chiponenge?” Mwaluŵiro wakiza pafupi na Ŵakaboni awo ŵakimilira pafupi na kashelufu aka. Wakayowoya kuti wakwenjerwa chomene na vinthu viheni ivyo vikuchitika pa charu ndipo wakakondwa kupulika ivyo Baibolo likulayizga pa Yeremiya 29:11. Wakadumbiskana na ŵabali aŵa kwa nyengo yakujumpha ora limoza. Pambere wandanyamuke, wakalongoraso kuti ngwakunweka kukawungana nase.

Ku malo ghanyake kufupi na sitediyamu, mulonda wakawona pa shelufu apo pakalembeka fumbo lakuyana waka lakuti, “Kasi Charu Ichi Chiponenge?” Pakuti wakaŵa wachali kugwira ntchito, wakaphalira ŵabali kuti wizengeso para wamalizga ntchito yake. Nyengo yichoko waka yikati yajumphapo, wakizaso ndipo wakalongosora kuti mwasonosono wali kwambako kuŵazga Baibolo payekha. Ŵabali ŵakati ŵamuphalira umo tikuchitira pakusambira Baibolo, munthu uyu wakanweka chomene kuti wamanye vinandi. Ntheura ŵabali ŵakanozga vyakuti munthu munyake wasambirenge nayo Baibolo.

Zuŵa lakulondezgapo pambere maseŵero agha ghandachitike, ŵabali ŵakapharazgira mwanakazi munyake mu upharazgi wa ku nyumba na nyumba. Mwanakazi uyu wakayowoya kuti wakawona pa TV vyakukhwaskana na mashelufu yithu gha mabuku. Iyo wakayowoya kuti: “Mukuchita ntchito yakuzirwa chomene. Mu nyengo zakusuzga izi, tikukhumbikwira nadi chinthu chinyake chakuti chitipenge chigomezgo.” Kufuma apo, wakafumba uko Ŵakaboni ŵa Yehova ŵakuchitira maungano ghawo kweniso na nyengo yake.

Tikukondwa kuti ŵanthu ŵakulutilira kupulikira apo ‘vinjeru vikuchemerezga’ mu misewu kwizira mu upharazgi wapadera uwu, kuti Yehova Chiuta withu wapike uchindami.—Zintharika 1:20, 21.