“Yehova Wakuwona Masuzgo Ghane”

JULANI

Pa April 3, 2025, Khoti la Sovetskiy ilo lili mu Msumba wa Chelyabinsk lili kudumura kuti Mubali Maksim Khamatshin wali na mulandu ndipo lili kumupa chilango kuti wakakhale mu jele kwa vyaka 6. Mulandu wake ŵati ŵadumura waka, nyengo yeneyiyo ŵakaluta nayo ku jele.

Vyakukhwaskana na munthu uyu

Maksim Khamatshin

Chaka cha kubabikira: 1996 (Biryusinsk, Chigaŵa cha Irkutsk)

Wakabatizika: 2007

Mbiri yake: Wakugwira ntchito ya vya magesi. Wakatorana na Adelina mu 2019

Mulandu uwo wali kupika: Kuchitiska maungano gha Ŵakaboni ŵa Yehova

Chilango: Kukhala mu jele vyaka 6

Ivyo Wakayowoya

Kasi ni suzgo wuli likuru ilo mukulimbana nalo pa nyengo iyi?

Ntchipusu yayi kwa ine kuti nilutilire kuzikira na kulutilira kuwona vinthu mwakwenelera. Nyengo zinyake nkhughanaghana vinandi chomene, ndipo nkhufipa mtima na ivyo vichitikenge munthazi. Para vyaŵa nthena nkhujipulika nga Davide apo wakayowoya pa Salimo 55:6 kuti: “Niŵenge na mapapindo nga ni njiŵa! Mphanyi naphululukira kutali na kukakhala mu malo ghakuvikilirika.” Kweni nkhupembuzgika pakumanya kuti Yehova wakuwona masuzgo ghane, na kupulika malurombo ghane. Ndipouli ine pamoza na muwoli wane tikujikumbuska kuti tikwenera yayi kwenjerwa chomene, m’malo mwake tikwenera kughanaghanira umo Yehova watitumbikira kweniso kughanaghanira ivyo wakutichitira pasono. Para nkhuwona umo wakunovwilira, nkhuŵa na chigomezgo chose kuti nyengo zose wakuŵa nane na kunovwira kuŵa na mtende wa mu mtima.

Nga Mubali Maksim, nase tikukhozgeka pakumanya kuti tikuthemba Yehova uyo chitemwa chake ntchakugomezgeka kweniso kuti “lusungu lwake lukumara chara.”—Chitengero cha Yeremiya 3:22.

Panji Mungatemwa Kuŵerengaso Nkhani Izi

NKHANI ZA PA CHARU CHOSE

Ŵakaboni ŵa Yehova Ŵakujalirika mu Jele Chifukwa cha Chipulikano Chawo—Kuyana na Malo

Uko Ŵakaboni ŵa Yehova ŵali kujalirika mu jele, nyengo zinyake ŵakuŵachitira nkhaza, chifukwa waka cha chipulikano chawo na kuchita vinthu mwakuyana na wanangwa wawo.