Pakati pa January na July 2022, maofesi ghaphya 5 ghakung’anamulirako mabuku ghakamba kugwira ntchito ku Mexico. Chiŵelengero ichi chapangiska kuti pasono mu chigaŵa cha ofesi ya munthavi ya Central America muŵe maofesi ghakung’anamulirako mabuku ghakukwana 25. Maofesi ghaphya 5 agha, ghawovwirenge kuti awo ŵakung’anamura mabuku mu Chitarascan, Chitzotzil, Chizapotec (Isthmus), Chiotomi (Mezquital Valley), na Chichol, ŵakhalenge ku vigaŵa ivyo kuli ŵanthu ŵanandi ŵakuyowoya viyowoyero ivi. Mu myezi yikwiza iyi, pajulikengeso maofesi ghanyake 8 ghakung’anamulirako mabuku mu chigaŵa cha ofesi ya munthavi ya Central America, ndipo pasono nthena ŵabali ŵali kwamba kale kunozgekera ntchito ya kuzengaso ghanyake 34.

Ntchakuzirwa chomene kuti awo ŵakuchita mulimo wa kung’anamura ŵakhalenge na kugwilira ntchito ku chigaŵa icho kuli ŵanthu ŵanandi ŵa chiyowoyero icho ŵakung’anamura. Mudumbu Marcela Hernández, uyo wakuchitako mulimo wa kung’anamura mu Chitzotzil ndipo wachita mulimo uwu kwa vyaka vinandi uku wali pa ofesi ya munthavi, wakati: “Apo nkhaŵa pa ofesi ya munthavi, nkhamba kuwona kuti namba kung’anamura vinthu vyakusuzga kuvipulikiska. Kweni pasono ningati vili makora chifukwa nkhuŵapulika ŵabali ŵakuyowoya chiyowoyero ichi ku mpingo panji mu upharazgi ndipo vyanovwira kuti ning’anamurenge umo ŵanthu ŵakuyowoyera nadi zuŵa na zuŵa.”

Maofesi ghakung’anamulirako mabuku agha ghakuwoneka makora chomene ndipo ŵanthu ŵakughalumba. Kanandi waka tikuwona ŵanthu ŵakuyima na kwamba kudaŵira umo ghakuwonekera ndipo ŵanyake ŵakuchita na kujambura vithuzi. Mwanakazi munyake uyo wali na sitoro yake chapafupi na ofesi yakung’anamulirako mabuku, wakakondwa chomene kupulika vyakukhwaskana na ntchito iyo yikuchitika pa ofesi yithu, mwakuti m’paka nayo wakamba kuphyera nthowa yakuluta ku sitoro yake kweniso kutozga pafupipafupi mu sitoro. Mwanakazi uyu wakati, “Nane nili pafupi na nyumba ya Chiuta.”

Ntchakuwonekerathu kuti Yehova wakutumbika ntchito yose iyo yikuchitika mu maofesi agha. Tikumuwonga chomene chifukwa cha kutovwira kuti ntchito yithu yakung’anamura yilute panthazi.—Salimo 127:1.