Pa December 4, 2020, Ŵakaboni ŵa Yehova 28, (ŵanalume 26 na ŵanakazi ŵaŵiri) ŵakafumiskika mu jele, ŵati ŵajalirika chifukwa cha chipulikano chawo kwa vyaka vyakwamba pa 5 m’paka 26. Pa January 29, 2021, Kaboni mwanalume yumoza wakafumiskika mu jele wati wakhalamo kwa vyaka vyakujumpha 12 ndipo ŵanyakeso ŵatatu ŵakafumiskika pa February 1, 2021 (mwanalume yumoza na ŵanakazi ŵaŵiri). Ŵakakhala mu jele kwa vyaka vyakwamba pa vinayi m’paka 9. Pasono Ŵakaboni ŵa Yehova 20, ŵachali mu jele (ŵanalume 14 na ŵanakazi 6).

Charu cha Eritrea chikukaka na kujalira mu jele Ŵakaboni ŵa Yehova, kusazgapo ŵanakazi na ŵachekuru, kwambura kuŵazenga panji kuŵasanga na mulandu, ndipo ŵakujalirika chifukwa cha kuchita vinthu vyakukhwaskana na kusopa panji vifukwa vyambura kumanyikwa makora. Pulezidenti wa charu ichi Afewerki wakati Ŵakaboni wose mbanangwaso yayi kuyana na ivyo pulezidenti wakayowoya pa October 25, 1994. Vili nthena chifukwa chakuti Ŵakaboni ŵakatorapo chigaŵa yayi apo charu ichi chikalweranga wanangwa wake mu 1993 kweniso chifukwa chakuti ŵakukana kunjira usilikari. Pambere ŵandayambe kuchichizga waliyose kunjira usilikari, ŵalaraŵalara ŵa charu cha Eritrea ŵakazomeranga kupeleka ntchito zinyake ku ŵanthu awo ŵakana kunjira usilikari. Ŵakaboni ŵanandi ŵakagwirako ntchito izi ndipo ŵakalongozgekanga na ŵalara ŵa boma ili. Ŵamazaza aŵa ŵakapeleka ma satifiketi ghakulongora kuti ŵanthu aŵa ŵamalizga kugwira ntchito ya boma ndipo kanandi ŵakaŵalumbanga chifukwa cha kulimbikira kwawo. Ndipouli chifukwa cha ivyo pulezidenti wakayowoya, awo ŵakuwona vya chivikiliro mu charu ichi ŵakujalira mu jele Ŵakaboni ŵa Yehova, na kwamba kuŵatambuzga kweniso kuŵachitira nkhaza zikuru na chilato chakuti Ŵakaboni aŵa ŵataye chipulikano chawo.

Ŵakaboni ŵanayi ŵali kufwira mu jele ku Eritrea, ndipo ŵanyake ŵatatu awo mbachekuru ŵakafwa ŵati ŵafumiskika waka mu jele chifukwa cha nkhaza izo ŵakakumana nazo apo ŵakaŵa mu jele.

Mu 2018, Ŵakaboni ŵaŵiri ŵakafwa ŵati ŵaŵasamuskira ku jele la Mai Serwa. Habtemichael Tesfamariam wakafwa na vyaka 76 pa January 3, kweniso Habtemichael Mekonen wakafwa na vyaka 77 pa March 6. Ŵamazaza ŵa charu cha Eritrea ŵakajalira ŵanalume aŵa mu 2008 kwambura mulandu.

Mu 2011 na 2012, Ŵakaboni ŵaŵiri ŵakafwa chifukwa cha nkhaza izo ŵakaŵachitira apo ŵakaŵa mu jele la Meitir Camp. Misghina Gebretinsae, wa vyaka 62, wakafwa mu July 2011 chifukwa chakuti ŵakamuŵika mu chipinda icho mukawotchanga chomene kuti walangike. Yohannes Haile, wa vyaka 68, nayo wakafwa pa August 16, 2012, chifukwa cha chilango chakuyana waka wati wakhala mu jele vyaka vinayi. Ŵakaboni ŵachekuru ŵatatu, Kahsai Mekonnen, Goitom Gebrekristos, na Tsehaye Tesfariam, ŵakafwa ŵati ŵafumiskika waka mu jele chifukwa cha nkhaza izo ŵakaŵachitira apo ŵakaŵa mu jele la Meitir Camp.

Charu cha Eritrea chikulutilira kusulako ivyo chikaphalirika na mawupu ghakuwona vya wanangwa wa ŵanthu. Mawupu ghakuwona vya wanangwa wa ŵanthu ghakasuska ivyo charu ichi chikuchita pa kuleka kuchindika wanangwa wa ŵanthu ndipo mawupu agha ghakati chikwenera kuchitapo kanthu mwaluŵiro.

Mu 2014, wupu wa Human Rights Council (HRC) ukazomerezga lipoti ilo ukapokera kufuma ku awo ŵakulwera wanangwa wa ŵanthu lakuyowoya umo vinthu viliri pa nkhani ya wanangwa ku Eritrea. Lipoti ili likachiskanga ŵamazaza kuti ŵakwenera kuchindika wanangwa wakuti munthu wangakana kunjira usilikari chifukwa cha njuŵi yake kuyana na ivyo vyaru vyose vikakolerana ‘kweniso kuti ŵakayidi wose mbanangwa kupokera wovwiri wa chipatala . . . Ndiposo ŵakwenera kuleka kuchitira nkhaza awo ŵajalirika mu jele kuyana na ivyo vyaru vyose vili kukolerana’. Mu 2015, wupu wa HRC ukati charu cha Eritrea chikwenera “kupeleka ntchito zinyake ku ŵanthu awo ŵakana kunjira usilikari chifukwa cha njuŵi yawo.”

Mu 2016, wupu wa Human Rights ku Eritrea ukati ŵamazaza ŵa charu ichi ŵali na mulandu chifukwa cha kuchitira nkhaza ŵakayidi kweniso chifukwa cha kujalira mu jele Ŵakaboni ŵa Yehova na ŵanthu ŵanyake pa vifukwa vyakukhwaskana na chisopa kweniso mtundu uwo ŵakufuma.

Mu 2017, wupu wa African Committee of Experts on the Rights and Welfare of the Child (ACERWC) ukati ngwakudandawura chifukwa ŵana ŵa mu charu ichi awo ŵapapi ŵawo Mbakaboni, ŵakuchitirika nkhaza nangauli ŵali na wanangwa wakuti ŵakwenera kuŵa ŵakuvikilirika ku nkhaza za mtundu uliwose. Wupu wa ACERWC ukatiso charu cha Eritrea chikwenera “kuchitapo kanthu kuti wanangwa wakuyowoya wa ŵana uleke kukandilizgika kweniso wakuti ŵalondezgenge njuŵi yawo na kuchita ivyo ŵakugomezga kuyana na chisopa chawo.”

Mu 2018, wupu wa African Commission on Human and Peoples’ Rights ukati charu cha Eritrea “chikwenera kuchitapo kanthu mwaluŵiro kuti chileke kuswa wanangwa wa ŵanthu awo ŵajalirika mu jele kusazgapo . . . na Ŵakaboni ŵa Yehova” ndiposo kuti ŵasande makora ivyo vikapangiska nyifwa ya Ŵakaboni awo ŵakafwira mu jele. Wupu uwu ukadidimizgapo kuti charu cha Eritrea chikwenera kuwoneseska kuti chafumiskapo dango ilo chili kuŵika lakuti Ŵakaboni ŵa Yehova mbenekaya ŵa charu ichi yayi ndipo ŵalije wanangwa.

Mu May 2019, wupu wa UN Human Rights Committee (CCPR) ukachiska charu cha Eritrea kuti chipeleke wanangwa wa kusopa kweniso kuchita ivyo ukugomezga kwa waliyose. Ndipo chikwenera “kufumiska mu jele wose awo ŵakajalirika chifukwa cha chisopa chawo kusazgapo na Ŵakaboni ŵa Yehova.” Wupu uwu ukatiso charu ichi “chiwoneseske kuti chasintha dango lakuchichizga usilikari na kwamba kupeleka ntchito zinyake ku ŵanthu awo ŵakana kunjira usilikari chifukwa cha njuŵi yawo.”

Ŵakaboni ŵanandi ŵanalume awo ŵali kujalirika mu jele, ŵakuphalirika yayi apo ŵafumirenge ndipo ŵakuŵafumiska yayi mpaka nyifwa yawo panji mpaka ŵakhale pachoko waka kufwa. Pakuti pasono palije malango agho ghangavikilira wanangwa wawo, ŵabali aŵa para ŵajalirika ndikuti ŵakukhazga kukhala umoyo wawo wose mu jele.

1. April 15, 2021

   Ŵakaboni ŵa Yehova 20 ŵachali mu jele.

2. February 1, 2021

   Ŵakaboni ŵatatu ŵafumiskika mu jele.

3. January 29, 2021

   Kaboni yumoza wafumiskika mu jele.

4. December 4, 2020

   Ŵakaboni 28 ŵafumiskika mu jele.

5. March 6, 2018

   Habtemichael Mekonen, wafwa na vyaka 77, ŵati ŵamusamuskira ku jele la Mai Serwa.

6. January 3, 2018

   Habtemichael Tesfamariam, wafwa na vyaka 76, ŵati ŵamusamuskira ku jele la Mai Serwa.

7. July 2017

   Ŵakaboni wose awo ŵakaŵa mu jele la Meitir Camp ŵakusamuskikira ku jele la Mai Serwa kuwaro kwa Asmara.

8. July 25, 2014

   Ŵanandi awo ŵakajalirika pa April 14 ŵafumiskika, kweni ŵanyake 20 awo ŵakajalirika pa April 27 ŵandafumiskike.

9. April 27, 2014

   Ŵakaboni 31, ŵakakika apo ŵachitanga maungano.

10. April 14, 2014

    Ŵakaboni ŵakujumpha 90 ŵakakika apo ŵachitanga Chikumbusko cha nyifwa ya Khristu.

11. August 16, 2012

    Yohannes Haile, wafwa na vyaka 68, uku wali mu jele umo ŵakamuchitiranga nkhaza zakofya.

12. July 2011

    Misghina Gebretinsae, wafwa na vyaka 62, uku wali mu jele umo ŵakamuchitiranga nkhaza zakofya.

13. June 28, 2009

    Ŵamazaza ŵafika ku nyumba ya Kaboni wa Yehova mwakubuchizga na kukaka Ŵakaboni wose 23 awo ŵachitanga maungano mu nyumba iyi, ŵa vyaka vya pakati pa 2 mpaka 80.

14. April 28, 2009

    Ŵamazaza ŵakusamuska ŵanthu wose awo ŵajalirika mu ma siteshoni gha ŵapolisi kupaturako Kaboni yumoza na kuluta nawo ku jele la Meitir Camp.

15. July 8, 2008

    Ŵamazaza ŵamba kusecha nyumba za Ŵakaboni ŵa Yehova na malo gha ntchito na kukaka Ŵakaboni 24, ŵanandi mwa iwo ndiwo ŵali na udindo wa kupwelelera mbumba zawo.

16. May 2002

    Boma lajara visopa vyose ivyo vikuleka kulondezga vigomezgo vya visopa vinayi ivyo vili kuzomerezgeka.

17. October 25, 1994

    Pulezidenti wapeleka dango lakuti Ŵakaboni ŵa Yehova mbenekaya yayi ndipo dango ili lapoka wanangwa wawo.

18. September 17, 1994

    Paulos Eyasu, Isaac Mogos, na Negede Teklemariam ŵajalirika mu jele kwambura chifukwa ndipo mpaka sono ŵandafumiskike.

19. Mu ma 1940

    Ŵakaboni ŵa Yehova ŵakwamba kusangika mu charu cha Eritrea.