Mu September 2024, Ŵakaboni ŵa Yehova mu vyaru 240 ŵakachitako upharazgi wapadera wakwambiska masambiro gha Baibolo. Ŵabali na ŵadumbu pa charu chose ŵakagwiliskira ntchito mpata wuliwose uwo ŵakaŵa nawo kuti ŵalongore ŵanthu umo tikusambilira Baibolo mwakugwiliskira ntchito buku la Mungakondwa na Umoyo Kwamuyirayira! Wonani vinthu vinyake vyakukondweska ivyo vikachitika mu mwezi uwu.

Chile

Mwanakazi munyake wa ku Chile wa vyaka 30, wakawona kashelufu kithu ka mabuku pa malo ghanyake apo wakaŵa mu basi. Basi yati yayima, mwanakazi uyu kwizira pa windo la basi wakajambura kachidindo (QR code), ako kakaŵa pa chikhwangwani icho chikuŵa pa kashelufu ndipo chikuchiska ŵanthu kupempha kusambira Baibolo kwaulere. Ivi vikamulongozgera ku webusayiti yithu ya jw.org. Wati wajura webusayiti yithu iyi pa foni yake, wakasanga nkhani ya mutu wakuti “Kasi Ninjani Uyo Mungamugomezga?—Kasi Baibolo Likuti Wuli?” Wati waŵerenga nkhani iyi, mwanakazi uyu wakapempha kuti Ŵakaboni ŵa Yehova ŵamwendere kunyumba kwake. Ndipo pati pajumpha mazuŵa ghachoko waka, banja linyake la Ŵakaboni ŵa Yehova likaluta kunyumba kwake. Mwanakazi uyu wakaphalira banja ili kuti wakalombanga kwa Chiuta kuti wamovwire kumanya umo wangamusopera munthowa yakwenelera. Banja ili likamupempha kuti lisambirenge nayo Baibolo ndipo mwanakazi uyu wakazomera nyengo yeneyiyo. Panyengo ya sambiro, mwanakazi uyu wakayowoya kuti wakukondwa chomene na mavidiyo agho wakuwonelera para wakusambira Baibolo. Kufika pasono, mwanakazi uyu wali kumalizga kusambira mutu wachitatu mu buku la Mungakondwa na Umoyo Kwamuyirayira! ndipo wakulutilira kusambira Baibolo.

Senegal

Mwanakazi munyake ku Senegal wakapulika ŵadumbu ŵaŵiri ŵakudumbiskana na mwanalume munyake fundo za mu Baibolo, kuwaro kwa nyumba yake. Mwanakazi uyu wakakondwa chomene na ivyo wakapulika ntheura wakafumira kuwaro kuti wakakumane nawo pambere ŵandalute. Apo ŵakadumbiskananga nkhani yakukhwaskana na vinthu vyambura urunji ivyo vikuchitika, ŵadumbu ŵaŵiri aŵa, ŵakamuŵazgira lemba la Yesaya 32:16, 17 na kumulongora ivyo Baibolo likulayizga mu sambiro 02 mu buku la Mungakondwa na Umoyo Kwamuyirayira! Mwanakazi uyu wakamba kulira apo wakalongosoranga masuzgo ghakuru agho wakumanapo nagho pa umoyo wake. Pamanyuma pakuti ŵamupembuzga na kumuŵelengera lemba la 1 Petrosi 5:7, ŵadumbu aŵa ŵakamupempha kuti ŵasambirenge nayo Baibolo ndipo nyengo yeneyiyo wakazomera.

Taiwan

Apo mubali munyake wakapharazganga ku nyumba na nyumba, wakakumana na munyamata munyake uyo wakenjweranga na umo vinthu vizamuŵira pa umoyo wake munthazi. Mubali uyu wakamuŵelengera lemba la Yesaya 65:21, 22 ndipo wakafumba munyamata uyu usange wangakondwa kuzakakhala mu charu icho waliyose wazamuŵa wakukondwa na ntchito yake. Mubali yura wakamulongosolera ivyo Baibolo likulayizga mwakugwiliskira ntchito sambiro 02, fundo 4 mu burosha la Mungakondwa na Umoyo Kwamuyirayira! Ndipo pamanyuma wakamulongora umo sambiro la Baibolo likuchitikira. Munyamata uyu wakayowoya kuti wakakondwa chomene na chidumbirano ichi ndipo wakazomera kusambira Baibolo. Pati pajumpha masabata ghachoko waka, dada wa munyamata uyu wakayowoya kuti wakakondwa na ivyo mwana wake wakasambiranga ndipo nayo wakamba kusambira Baibolo. Pasono, wose dada na mwana ŵakusambira Baibolo mwakukhazikika.

Ukraine

Apo ŵakapharazganga nyumba na nyumba mu muzi uchoko ku Ukraine, ŵabali ŵithu ŵakaŵazgira mwanalume munyake lemba la Daniyeli 2:44, ndipo ŵakalongosora kuti Ufumu wa Chiuta wekha ndiwo uzamumazga masuzgo ghose agho ŵanthu ŵakukumana nagho. Mwanalume uyu wakakondwa chomene ndipo wakaphalira ŵabali aŵa kuti wakuŵazga chomene Baibolo mwakuti wali na mafumbo ghanandi. Iyo wakayowoya kuti wakalindiliranga Ŵakaboni ŵa Yehova kuti ŵize ku nyumba kwake ndipo wakayezga kupenja Nyumba ya Ufumu iyo yili kufupi na uko wakukhala. Ŵabali ŵakamulongosolera kuti para wangamba kusambira Baibolo wangasanga mazgoro gha mafumbo ghake ndipo ŵakamulongora umo tikuchitira pakusambira Baibolo. Mwakukondwa, mwanalume uyu wakazomera kusambira Baibolo ndipo pasono wakulutilira kusambira Baibolo mwakukhazikika.

Tili ŵakukondwa kupulika malipoti ghakukondweska agha pa upharazgi wapadera wa pacharu chose uwo tikaŵa nawo. Tikuwonga chomene Yehova chifukwa cha kutumbika ŵabali na ŵadumbu pa charu chose, chifukwa chakuŵikapo mtima kovwira ŵanthu ŵamitima yiwemi, kuti ŵamanye vinandi vyakukhwaskana na iyo kweniso mazgu ghake.—1 Ŵatesalonika 2:13.

Pasi apa pali vithuzi ivyo vikulongora ŵabali na ŵadumbu kufuma mu vyaru vyakupambanapambana mwakukondwa ŵakuchitako upharazgi wapadera mu September 2024.