Lutani apo pali nkhani

Lutani pa menyu yachiŵiri

Ŵakaboni ŵa Yehova

Chitumbuka

MARCH 7, 2017
SOUTH KOREA

Boma la South Korea Likutambuzga Dong-hyuk Shin

Boma la South Korea Likutambuzga Dong-hyuk Shin

Boma la South Korea likujalira mu jele ŵanthu ŵanandi awo ŵakukana usilikari. Likutambuzgaso ŵanalume awo ŵakana kuŵa mu gulu la ŵasilikari ŵakukolerapo chifukwa cha ivyo ŵakugomezga kweniso njuŵi yawo.

Apo Dong-hyuk Shin wa ku South Korea wakaŵa mwana, wakamanya kuti zuŵa linyake wazamuchemeka ku usilikari. Wakati wachemeka, wakaluta nadi ndipo wakamalizga masambiro gha usilikari mu 2005. Wati wamalizga waka, ŵakamulemba pa gulu la ŵasilikari ŵakukolerapo ndipo wakeneranga kuchita masambiro ghanyake gha usilikari kwa vyaka vyakujumpha 8.

Wati wawerako ku masambiro gha usilikari Shin wakamba kusambira Baibolo. Uthenga wa mu Baibolo wakuti ŵanthu ŵakwenera kuŵa pa mtende ukamufika pa mtima ndipo wakamba kukana usilikari. Wakati wachemeka kuti wakalutizge masambiro ghanyake gha usilikari mu March 2006, wakakana chifukwa wakawona kuti njuŵi yake yikumuzomezgaso yayi kuchita usilikari.

Palije Uyo Wakwenera Kwendera Njuŵi Yake

Charu cha South Korea chikuzomelezga waliyose yayi kwendera njuŵi yake pa nkhani ya usilikari. Pa sono charu ichi chaphalira Ŵakaboni ŵa Yehova 40 kuti ŵakasambire vya usilikari, kweni iwo ŵakukana chifukwa cha njuŵi yawo.

Boma likakana ivyo Shin wakapempha. M’malo mwake mu 2006 pera, likamuchema maulendo 30. Shin wakalutilira kuchemeka kwa vyaka 7. Kufuma mu March 2006 m’paka December 2013, wakachemeka maulendo 118 kuti wakalutizge masambiro ghanyake gha usilikari. * Kwa vyaka vyose ivi Shin wakakananga mwantchindi para ŵamuchema. Chifukwa chakukana, wakapika milandu kwa maulendo 49, ndipo kwa maulendo 69 wakawonekera mu khoti kusazgapo khoti la apilu. Pa milandu yose iyi, kwa maulendo 35 khoti likadumura kuti wali na mulandu.

“Palijeso Nthowa Yinyake”

Makhoti ghakamanya kuti Shin wakulondezga njuŵi yake. Pa October 7, 2014, khoti la Ulsan District likati: “Ntchakupulikikwa kuti kufuma waka apo Dong-hyuk Shin, wakamba kusopa na Ŵakaboni ŵa Yehova wakuwona kuti palijeso chinyake icho wangachita padera pakuswa waka dango la boma lakuti wakwenera kunjira usilikari. Vikumusuzga kuchita usilikari chifukwa cha njuŵi yake na ivyo wakugomezga.”

Nangauli khoti ili likamupulikiska Shin, kweni makhoti ku South Korea ghakuchichizgika kulondezga dango la kukhwaskana na ntchito ya usilikari. Makhoti ghakamulipiliska ndalama zinandi zakujumpha madola 13,322 gha ku America. Kwa maulendo 6 ŵakadumura kuti wajalirike mu jele, ndipo pa ulendo uliwose wakeneranga kukhala mu jele kwa myezi 6 pa avereji. Kweni nyengo zinyake m’malo mwakujalirika mu jele ŵakamupanga ntchito zinyake. Nyengo yinyake wakapika chilango cha kugwira ntchito mu chigaŵa icho wakukhala kwa maora 200.

Shin wakati: “Nkhasuzgikanga chomene maghanoghano ndipo nkhafipanga mtima. Nkhaghanaghananga kuti chiyezgo ichi chimarenge yayi. Chifukwa chakuti kanandi nkhalutanga ku khoti vikapangiska kuti banja lakwithu lambe kusuzgika maghanoghano. Amama nawo ŵakasuzgika maghanoghano nga ndine ndipo ŵakamba kulwaralwara. Nati namanya kuti ŵakusuzgika chifukwa cha ine, mtima wane ukasweka. Nakuti nkhakavuka chomene pa nyengo iyi. Chifukwa cha milandu, nkhajombanga chomene ku ntchito. Ivi vikanipangiska kuti nisinthe ntchito maulendo 7.”

Boma Likaswa Phangano Ilo Vyaru Vikakolerana

Shin wakapanga apilu milandu yose ku makhoti gha ku South Korea, kweni ghakamovwira yayi. Khoti Likuru likakana maapilu ghake maulendo 4. Mu June 2016, Shin wati wawona kuti makhoti agha ghakumovwira yayi, wakadandawulira Komiti ya United Nations yakuwona wanangwa wa ŵanthu. Iyo wakati boma la South Korea likulondezga yayi phangano ilo vyaru vili kukolerana (International Covenant on Civil and Political Rights) ilo likupeleka wanangwa kwa munthu wakusankha ntchito iyo wangagwira. Ntheura boma lili kumubudira pakumuzenga milandu mwakuwerezgawerezga kwambura chifukwa chakupulikikwa. Iyo wakadandawura pa vifukwa vitatu ivi:

  • Usange boma likupeleka mwakuwerezgawerezga mulandu kwa munthu uyo wakana ntchito ya usilikari chifukwa cha njuŵi yake, ndikuti lindazenge makora mulandu kuyana na dango ilo vyaru vili kukolerana.

  • Usange boma likulutilira kuchema munthu kuti wakasambire vya usilikari na kumupa mulandu para wakana, ndikuti likuchichizga munthu kugwira ntchito ya usilikari. Shin wakukwenyelera chomene chifukwa cha milandu iyi. Kweniso boma lamuyuyura na kutimbanizga chomene wanangwa wake wakulondezga ivyo wakugomezga.

  • Boma likaswa wanangwa wake wakulondezga njuŵi yake na ivyo wakugomezga pakumupa mulandu chifukwa chakuti wakakana usilikari.

Wakugomezga Kuti Visinthenge

Shin wakugomezga kuti ŵadumulenge makora mulandu wake, chifukwa Komiti yakuwona wanangwa wa ŵanthu (UN Human Rights Committee) yikuyowoya mwakuwerezgawerezga kuti boma la South Korea likwenera kuchindika wanangwa wa awo ŵakukana usilikari chifukwa cha njuŵi yawo. * Wakukhazga kuti boma lilekenge kuchichizga ŵanthu kunjira usilikari. Shin wakati: “Nkhudandawura yayi kulondezga ivyo nkhusambira mu Baibolo kweniso njuŵi yane, kweni nkhudandawura na nkhaza izo boma likunichitira. Nkhugomezga kuti boma la South Korea lichindikenge wanangwa wa munthu uyo wakukana ntchito za boma izo zikususkana na njuŵi yake.” Ivi ndivyo Ŵakaboni ŵa Yehova ku South Korea kweniso pa charu chose ŵakukhazga.

^ ndime 7 Dong-hyuk Shin wakachemeka maulendo 30 mu 2006, maulendo 35 mu 2007, maulendo 15 mu 2008, maulendo 9 mu 2009, maulendo 17 mu 2010, na maulendo 12 mu 2011. Mu 2012 na 2013, Shin wakeneranga yayi kusambira vya usilikari, ntheura wakachemeka yayi.

^ ndime 18 The UN Human Rights Committee has issued five Views finding that South Korea violated Article 18, “the right to freedom of thought, conscience and religion”: Yeo-bum Yoon and Myung-jin Choi v. Republic of Korea, Communication No. 1321-1322/2004, U.N. Doc. CCPR/C/88/D/1321-1322/2004 (November 3, 2006); Eu-min Jung et al. v. Republic of Korea, Communication No. 1593-1603/2007, U.N. Doc. CCPR/C/98/D/1593-1603/2007 (March 23, 2010); Min-kyu Jeong et al. v. Republic of Korea, Communication No. 1642-1741/2007, U.N. Doc. CCPR/C/101/D/1642-1741/2007 (March 24, 2011); Jong-nam Kim et al. v. Republic of Korea, Communication No. 1786/2008, U.N. Doc. CCPR/C/106/D/1786/2008 (October 25, 2012); and Young-kwan Kim et al. v. Republic of Korea, Communication No.  2179/2012, U.N. Doc. CCPR/C/112/D/2179/2012 (October 15, 2014).