Lutani apo pali nkhani

Lutani pa menyu yachiŵiri

Ŵakaboni ŵa Yehova

Chitumbuka

FEBRUARY 11, 2013
RUSSIA

“Tichali mu 1937 Yayi”

“Tichali mu 1937 Yayi”

Pa Epril 16, 2012, Aleksandr Solovyov uyo wakukhala mu msumba wa Perm’ ku central Russia, ndipo njumoza wa Ŵakaboni ŵa Yehova, wakaphalirika kuti walipire madola pafupifupi 30 gha United States (1,000 rubles) chifukwa ‘chakuchitiska maungano agho boma likatenge likukanizga’ mu holo ya lenti.

Mweruzgi wa khoti likuru wakategherezga makora “maukaboni” ghose agho boma likapeleka kuti Solovyov wali na mulandu. Paumaliro, iyo wakakana ivyo khoti lichoko likagamura ndipo wakati Solovyov wakwenera yayi kupeleka ndalama izo ŵakamuphalira.

Pamanyuma pa chigamuro chake, mweruzgi uyu wakati kwa Solovyov: “Mbunenesko kuti malango gha boma ghakusinthasintha ndipo ŵanthu ŵanyake ŵakuchita vinthu mwakutemwera, kweni tichali mu 1937 yayi apo tikajaliranga dala kumaso nangauli pakaŵanga ukaboni wakukwana wakuti boma ndilo likabudiskanga. Ntchito iyo ukuchita yikovwira chomene ŵanthu kusintha nkharo zawo ziheni.

Mu July 1937, mulongozgi wa chipani cha Soviet uyo wakapulikanga yayi vya ŵanyake wakapeleka dango (Order 00447) ilo likachitiska ŵanthu ŵanandi kuŵa na wofi. Wose awo boma la Soviet likawonanga kuti ŵakulondezga yayi dango ili ŵakakolekanga na kukweruzgika pa vifukwa vyambura kupulikikwa. Mafayelo gha boma ghakulongora kuti ŵanthu ŵanandi ŵakatumizgika ku misasa kukagwira ntchito zinonono ndipo ŵanyake ŵakujumpha 300,000 ŵakakomeka.